Mongqol-un niuča tobča'an 1. činggis-qahan-nu huja'ur de'ere tenggeri-eče jaya'atu töreksen börte-činō aju'u
gergei inu qo'ai-maral aji'ai tenggis ketüljü ireba
onan-müren-nü teri'ün-e burqan-qaldun-na nuntuqlaju töreksen batačiqan aju'u
2. batačiqan-nu kö'ün tamača tamača-yin kö'ün qoričar-mergen qoričar-mergen-nü kö'ün a'ujam-boro'ul a'ujam-boro'ul-un kö'ün sali-qača'u sali-qača'u-yin kö'ün yeke-nidün yeke-nidün-nü kö'ün sem-soči sem-soči-yin kö'ün qarču 3. qarču-yin kö'ün borjigidai-mergen mongqoljin-qo'a gergeitü aju'u
borjigidai-mergen-nü kö'ün toroqoljin-bayan boroqčin-qo'a gergeitü boroldai-suyalbi jala'utu dayir boro qoyar külü'üt aqtastu büle'e
toroqoljin-nu kö'ün duwa-soqor dobun-mergen qoyar büle'e
4. duwa-soqor manglai dumda qaqča nidütü qurban ne'ürit qajar-a qaraqu büle'e
5. niken üdür duwa-soqor dobun-mergen de'ü-lü'e-be'en burqan-qaldun de'ere qarba
duwa-soqor burqan-qaldun de'ereče qaraju tünggelik-qoroqan huru'u niken bölök irgen newüjü oroju ayisuqu-yi qaraju üjejü 6. ügülerün tede newüjü ayisuqun irgen-nü dotora niken qara'utai tergen-ü öljige-de niken ökin sayin buyu gü'ün-ne ese ökteksen bö'esü dobun-mergen de'ü-de'en čimada quyuya ke'ejü dobun-mergen de'ü-yü'en üjere ileba
7. dobun-mergen tede irgen-dür gürü'esü ünen gü qo'a sayin aldar nere yeketei alan-qo'a neretei gü'ün-ne ber ökte'ei üdü'üi ökin aju'u
8. tede bölök irgen ber köl-barqujin-tögüm-ün ejen barqudai-mergen-nü ökin barqujin-qo'a neretei ökin-ni qori-tumad-un noyan qorilartai-mergen-ne ökdeksen aju'u
qori-tumad-un qajar-a ariq-usun-na qorilartai-mergen-nü barqujin-qo'a-ča töreksen alan-qo'a neretei ökin tere 
9. qorilartai-mergen qori-tumad-un qajar-tur-iyan buluqan keremün görö'etei qajar-iyan qorilalduju mawulalduju qorilar oboqtu bolju burqan-qaldun-nu görö'esün görü'üli sayitu qajar sayin ke'en burqan-qaldun-nu ejet burqan-bosqaqsan sinči-bayan uriangqai-tur newüjü ayisun aju'u
qori-tumad-un qorilartai-mergen-nü ökin ariq-usun-na töreksen alan-qo'a-yi tende quyuju dobun-mergen-nü abuqsan yosun teyimü 
10. alan-qo'a dobun-mergen-tür irejü qoyar kö'ün töre'ülbi bügünütei belgünütei nereten büle'e
11. duwa-soqor aqa inu dörben kö'ütü büle'e
tedüi atala duwa-soqor aqa inu ügei boluba
duwa-soqor ügei boluqsan-u qoyina dörben kö'üt inu dobun-mergen abaqa-yu'an uruq-a ülü bolqan doromjilaju qaqačaju gejü newüba
dörben oboqtan bolju dörben irgen tede bolba
12. te'ün-ü qoyina niken üdür dobun-mergen toqočaq-ündür de'ere görö'elere qarba
hoi dotora uriangqadai gü'ün  čö'e buqu alaju qabirqas inu abit inu siraju bügü-yi jolqaju 13. dobun-mergen ügülerün nökör sirolqa-da kejü'ü 
öksü ke'ejü a'ušgitu jildü arasun inu abču čö'e buqu-yin miqa gübčin-i dobun-mergen-ne ökba
14. dobun-mergen tere čö'e buqu-yi ačiju ayisurun ja'ura niken yadanggi gü'ün kö'ün-be'en kötöljü yabuqu-yi jolqaju 15. dobun-mergen ya'un gü'ün či ke'en asaqu'asu tere gü'ün ügülerün bi ma'aliq-baya'udai yadaju yabumu tere görö'esün-ü miqan-ača nada ök bi ene kö'ün-be'en čimada öksü kejü'ü 
16. dobun-mergen tere üge-tür čö'e buqu-yin örö'ele quya inu ququlju ökjü tere kö'ün-ni inu abčiraju ger dotora jaruju aqu büle'e
17. teyin atala dobun-mergen ügei bolba
dobun-mergen-i ügei boluqsan-u qoyina alan-qo'a ere ügei'üi bö'et qurban kö'üt töre'ülbi buqu-qadagi buqatu-salji bodončar-mungqaq nereten büle'e
18. urida dobun-mergen-eče töreksen belgünütei bügünütei qoyar kö'üt inu eke-yü'en alan-qo'a-yin ečine ügüleldürün ene eke bidan-u aqa de'ü üye qaya gü'ün ügei ere ügei'üi bö'etele ede qurban kö'üt töre'ülbi ger dotora qaqča ma'aliq-baya'udai gü'ün buyu ede qurban kö'üt te'ün-ü'ei bui je ke'en eke-yü'en ečine keleldüküi-yi eke anu alan-qo'a uqaju 19. qabur niken üdür köngsilemel qonin činaju belgünütei  bügünütei buqu-qatagi buqatu-salji bodončar-mungqaq ede tabun kö'üd-iyen jergelen sa'ūlju niji'el müsüt ququlutqun ke'ejü ökba
niji'el-i ya'u bayi'ulqun ququčiju o'orba
basa tabun müsüt qamtu čuqlaju ququlutqun kejü ökba
tabu'ula tabun čuqtai müsüt gü'üleldün bariju bitü'üljü ququlun yadaba
20. tende alan-qo'a eke inu ügülebi ta belgünütei bügünütei qoyar kö'üt minu namayi ede qurban kö'üd-i töre'ülbi ken-ü ya'un-u kö'üt buyu ke'en sereldün keleldümüi sereküi ber tanu jöb 21. sönit büri čeügen sira gü'ün ger-ün erüge dotoqa-yin gege-'er oroju ke'eli minu bilijü gege'en inu ke'eli-tür minu singgegü büle'e
qarurun naran sara-yin kil-iyer sira noqai metü sičabaljaju qarqu büle'e
deleme yekin ügület ta tewüber uqa'asu temdek inu tenggiri-yin kö'üt buyu je qara teri'ütü gü'ün-tür qanilqan yekin ügület ta qamuq-un qat bolu'asu qaračus tende uqat je ke'eba
22. basa alan-qo'a tabun kö'üt-te'en söyü-'er üge ügülerün ta tabun kö'üt minu qaqča ke'eli-eče töreba
ta tuqar-un tabun müsüt metü qaqča qaqča bolu'asu tere niji'el müsüt metü ken-e ber kilbar-a ququldaqun ta tere čuqtai müsüt metü qamtu niken eyeten bolu'asu ken-e ber kilbar-a yekin bolqun ta ke'ebi atala alan-qo'a eke anu ügei bolbi 
23. eke-yü'en alan-qo'a-yi ügei boluqsan-nu qoyina aqa-nar de'ü-ner tabu'ula adūsun ide'e-ben qubiyaldurun belgünütei  bügünütei buqu-qatagi buqatu-salji dörbe'üle abulčaba
bodončar-a mungqaq budawu buyu ke'en uruq-a ülü to'an qubi ese ökba
24. bodončar uruq-a ese to'aqdaju ende atala ya'un ke'ejü qol da'aritu qodoli se'ültü oroq-singqula-yi unuju ükü'esü inu üküsügei a'asu inu asuqai ke'ejü onan-müren huru'u yorčiju talbiba
yorčiju baljun-aral gürčü tende ebesün nembüle ger kijü tende aba sa'uba
25. teyin aqui-dur-iyan boroqčin qarčiqai qara quru bariju iden büküi-yi üjejü qol da'aritu qodoli se'ültü oroq-singqula-yin kilqasun-bar huraqalaju bariju asaraba
26. ideküi ide'en ügei arun činō-yin qun-tur qorqaqsan görö'esün mariyaju qarbuju alaju ideldü'et činō-yin ideksen-ni temgüldüjü ide'et ö'er-ün qo'olai-da'an qarčiqai-ba'an ber teji'eldün tere hon qarba
27. qabur boluba
noqot ireküi čaq-tur qarčiqai-ba'an teyile'üljü o'orba
noqot qalawut qoji'ulas tutum qongsi'ut hünji'üles tutum hüngsi'üt hünistele talbiba
28. düyiren gerü-dača tünggelik-qoroqan huru'u bölök irgen newüjü ireba
bodončar tede irgen-tür qarčiqai-ba'an o'oru'at otču üdür esükčilejü söni ebesün nembüle ger-dür-iyen irejü qonoqu büle'e
29. tede irgen bodončar-un qarčiqai quyu'asu ese ökba
tede irgen bodončar-i ken-ü'ei ba
ya'un-u'ai be ke'en asaqqu  ügei bodončar be tede irgen-i ya'un irgen ke'en asa'ulčaqu ügei yabulduba
30. buqu-qatagi aqa inu bodončar-mungqaq de'ü-yü'en ene onan-müren huru'u odula'a ke'en erin irejü tünggelik-qoroqan huru'u newüjü irekset irgen-tür teyimü teyimü gü'ün teyimü morintu büle'e ke'en sura'asu 31. tede irgen ügülerün gü'ün ber morin ber činu suraqu-tur adali buyu qarčiqaitu je buyu üdür büri man-tur irejü esükčilejü odumu söni maqa qa'a qonoq aju'u
hörene ümere-eče kei bolu'asu qarčiqai-bar bari'uluqsan noqut qalawud-un ödün hüsün anu burqaliq časun metü butaraju keyisjü iremü ende oyira buyu je edö'e iregü čaq bolba
qorumut güliče ke'eba
32. qorum atala tünggelik-qoroqan ö'ede niken gü'ün ayisun buyu gürjü irebesü bodončar mün aju'u
buqu-qatagi aqa inu üje'et taniju abu'at uduritču onan-müren ö'ede qataraju yorčiju talbiba
33. bodončar buqu-qatagi aqa-yu'an qoyinača daqaju qadaraju yabuju ügülerün aqa aqa beye teri'ütü de'el jaqatu sayin ke'eba
aqa inu buqu-qatagi tere üge inu ya'un-a ber ese bolqaba
34. basa mün üge ügüle'esü aqa inu ya'un-a ber ülü bolqan qari'u inu ese dongqotba
bodončar yabuju basa mün gü üge ügüleba
tere üge-tür aqa inu ügülerün tuqar-ača mün mün ya'un üge ügülemü či ke'eba
35. tendeče bodončar ügülerün tuqar-un tünggelik-qoroqan-a bükün irgen yeke üčügen mawui sayin teri'ü si'ira ügei'ün sača'un bui kilbar irgen bui bida teden-i ha'uluya ke'eba
36. tendeče aqa inu ügülerün je teyin bö'esü ger-tür-iyen gürčü aqa-nar de'ü-ner eyetüldüjü tede irgen-i ha'uluya ke'eldüjü 37. ger-tür-iyen gürü'et aqa-nar de'ü-ner keleleldüjü morilaba
mün bodončar alginči ha'ulqaba
38. bodončar alginči ha'ulju dumda ke'elitei eme-yi bariju ya'ujin gü'ün či ke'en hasaqba
tere eme ügülerün jarči'ut adangqan uriangqajin bi ke'eba
39. tede irgen-i aqa-nar de'ü-ner tabu'ula dawuliju adu'un ide'en-e haran tutqar-a aqui sa'uqui-a gürba
40. tere dumda ke'elitei eme bodončar-tur irejü kö'ülebi jat irgen-ü kö'ün büle'e ke'en jajiradai nereyitba
jadaran-u ebüge tere boluba
tere jadaradai-yin kö'ün tügü'üdei neretü büle'e
tügü'üdei-yin kö'ün büri-bulčiru büle'e
büri-bulčiru-yin kö'ün qara-qada'an büle'e
qara-qada'an-nu kö'ün jamuqa büle'e
jadaran oboqtan tede boluba
41. tere eme basa bodončar-ača niken kö'ün töre'ülbi bariju abuqsan eme büle'e ke'en tere kö'ün-i ba'aridai nereyitba
ba'arin-u ebüge tere boluba
ba'aridai-yin kö'ün čiduqul-bökö čiduqul-bökö emes olotu büle'e
kö'ün inu mene metü töreba
menen-ba'arin oboqtan tede boluba
42. belgünütei belgünüt oboqtan boluba
bügünütei bügünüt oboqtan boluba
buqu-qatagi qatagin oboqtan boluba
buqutu-salji salji'ut oboqtan boluba
bodončar borjigin oboqtan boluba
43. bodončar-un ablin eme-deče töreksen barim-si'iratu-qabiči neretü büle'e
tere qabiči-ba'atur-un eke-yin inje ireksen-i bodončar tataju büle'e
niken kö'ün töreba
jewüredei neretü büle'e
jewüredei urida jügelitü oron büle'e
44. bodončar ügei boluqsan-u qoyina tere jewüredei-yi ger daru'a adangqa-uriangqadai gü'ün alu'a te'ün-ü'ei bui je ke'ejü jügeli-deče qarq.aju jewüreyit oboqtu boluqaju jeüred-ün ebüge tere boluba
45. qabiči-ba'atur-un kö'ün menen-tudun büle'e
menen-tudun-nu kö'ün qači-külük qačin qači'u qačula qači'un qaraldai način-ba'atur dolo'an büle'e
46. qači-külüg-ün kö'ün qaidu nomolun-eke-deče töreksen büle'e
qačin-nu kö'ün noyagidai neretei büle'e
noyamsik aburitu tula noyakin oboqtan boluba
qači'u-yin kö'ün barulatai neretü büle'e
yeke be'etü ide'en-e baruq büle'e
barulas oboqtan boluba
qačula-yin kö'ün ide'en-e baruq tula yeke-barula üčügen-barula nereyitčü barulas oboqtan bolqaju erdemtü-barula tödö'en-barula teri'üten barulas tede boluba
qaraldai-yin kö'üt buda'an qutqulaqu eki teri'ü üge'ün tula buda'at oboqtan tede boluba
qači'un-nu kö'ün adarkidai neretü büle'e
aqa de'ü ja'ura adaruqči tula adargin oboqtan bolba
način-ba'atur-un kö'üt  uru'udai mangqutai neretan büle'e
uru'ut mangqut oboqtan tede boluba
način-ba'atur-un ablin eme-deče töreksen siju'udai doqoladai nereten büle'e
47. qaidu-yin kö'üt bai-singqor-doqsin čaraqai-lingqu čaujin-örtegei qurban büle'e
bai-singqor-doqsin-u kö'ün tumbinai-sečen büle'e
čaraqai-lingqu-yin kö'ün senggüm-bilge ambaqai-tan tayiči'ut oboqtan boluba
čaraqai-lingqu-yin berigen eme-deče töreksen besütei neretü büle'e
besüt oboqtan tede boluba
čaujin-örtegei-yin kö'üt oronar qongqotan arulat sönit qabturqas geniges oboqtan tede boluba
48. tumbinai-sečen-nü kö'ün qabul-qahan sem-sečüle qoyar büle'e
sem-sečüle-yin kö'ün bültečü-ba'atur büle'e
qabul-qahan-nu kö'üt dolo'an büle'e
angqa yeke inu ökin-barqaq bartan-ba'atur qutuqtu-mönggür qutula-qahan qulan qada'an tödö'en-otčigin ede dolo'an büle'e
49. ökin-barqaq-un kö'ün qutuqtu-yürki büle'e
qutuqtu-yürki-yin kö'üt seče-beki taiču qoyar büle'e
yürki oboqtan tede boluba
50. bartan-ba'atur-un kö'üt mönggetü-kiyan nekün-taisi yisügei-ba'atur dāritai-otčigin ede dörben büle'e
qutuqtu-mönggür-ün kö'ün büri-bökö büle'e
onan-nu tün-tür qurimlaqui-tur belgütei-yin mürü qangqas čabčiqsan tere büle'e
51. qutula-qahan-nu kö'üt joči girma'u altan qurban büle'e
qulan-ba'atur-un kö'ün yeke-čeren büle'e
badai kisiliq  qoyar darqand-un noyan tere büle'e
qada'an tödö'en qoyar uruq üge'ün büle'e
52. qamuq mongqol-i qabul-qahan meden aba
qabul-qahan-nu qoyina qabul-qahan-nu üge-ber dolo'an kö'üd-iyen bö'etele senggüm-bilge-yin kö'ün ambaqai-qahan qamuq mongqol-i meden aba
53. buyur-na'ur kölen-na'ur qoyar ja'ura ursi'un-müren-ne bükün ayiri'ut-buiru'ut-tatar irgen-e ambaqai-qahan ökin ökčü ö'esün ökin-iyen hüdejü otqu bolun tatar jüyin irgen ambaqai-qahan-ni bariju kitad-un altan-qahan-na abču otqui-tur ambaqai-qahan besütei gü'ün balaqači elčin-i'er ügülejü ilerün qabul-qahan-nu dolo'an kö'üd-ün dumdatu qutula-da ügülerün harban kö'üd-ün dotora qada'an-taisi-da ügüle ke'en ügülejü ilerün qamuq-un qahan ulus-un ejen boluju öki-ben ö'esün hüdeküi-ben nama-'ar kesetkün tatar irgen-e bariqda'a bi tabun quru'ud-iyan kimul tamutala harban quru'ud-iyan ha'uttala hači minu aburan soritqun ke'ejü ilejü'ü 
54. tere čaq-tur yisügei-ba'atur onan-müren-ne sibawulan yabuqui-tur merkid-ün yeke-čiledü olqunu'ut irgen-eče öki abču e'üsgejü ayisuqu-yi jolqaju önggeyijü üje'esü öngge jisü busitai öki qatu üjejü ger-tür-iyen qarin ha'ulju nekün-taisi aqa-yu'an dāritai-otčigin de'ü-ben uduritču irejü'üi 
55. gürküi-lü'e čiledü ayuju qurdun qubitu aju'u
qubi-yu'an quya inu deletčü quburi nambalis buruqui-lu'a qoyinača  inu qurba'ula uda'aralduba
čiledü qosi'un qučilis qariju tergen-dür-iyen ireküi-lü'e tende hö'elün-üjin ügülerün tede qurban haran-i uqaba-'ü či čirai čirai-ača busut bui amin-tur činu gürküi čiraitan bui amin ele činu bö'esü öljige tutum ökit qara'u tutum qatut bui amin ele činu bö'esü öki qatu oluyi je či busu nerete-yi hö'elün taki nereyidüyü je či amin-iyan qoroq hünür minu hünüsčü yabu ke'en čamča-ban mültüljü morin de'ereče naruyitču abqui-lu'a qurba'ula qosi'un qučilduju gürčü aisuqu-lu'a čiledü qurdun qubi-yin quya inu deletčü juqus duta'aju onan-müren ö'ede duta'aba
56. qurba'ula qoyinača nekejü dolo'an quburi dabatala hüldejü qariju irejü hö'elün-üjin-i yisügei-ba'atur delbege-deče kötöljü nekün-taisi aqa inu uduritču dāritai-otčigin de'ü inu kiligü dergečejü ayisuqui-tur hö'elün-üjin ügülerün aqa minu čiledü kei ö'ede kegül-iyen keyisümser ke'er qajar-a ke'eli-ben ölösümser büliyi
edö'e ker ele qoyar sibülger-iyen niken-te aru de'ere-yen o'orču niken-te ebür-ān de'ere o'orču niken-te uruqsi-da niken-te qoyinaqsi-da ker ele kijü odumui ke'et onan-müren-ni tolkistala hoi jubur dawuristala yeke dawu-bar uyilaju ayisuqui-tur dāritai-otčigin dergečejü yabuju ügülerün teberigü činu daba'at olon dababa
uyilaqdaqu činu usut olon ketülba
qayila'asu qarayiju ülü üjegü čimayi qayibasu qa'uluqa  inu ülü olqu či sem boli ke'ejü itqaba
hö'elün-üjin-i yisügei tedüi ger-dür-iyen abčiraba
hö'elün-üjin-i yisügei-yin abčira qsan yosun teyimü 57. ambaqai-qahan-nu qada'an qutula qoyar-i nereyitčü ilekse'er qamuq mongqol tayiči'ut onan-nu qorqonaq-jubur quraju qutula-yi qahan bolqaba
mongqol-un jirqalang debsen qurimlan jirqaqu büle'e
qutula-yi qa ergü'et qorqonaq-un saqlaqar-modun horčin qabirqa-ta ha'uluqa  ebüdük-te ölkek bolutala debseba
58. qutula qahan bolu'at qada'an-taisi qoyar tatar irgen-tür morilaba
tatar-un kötön-baraqa jali-buqa qoyar-tur harban qurban-ta qatqulduju ambaqai-qahan-nu ösöl ösön kisal kisan yadaba
59. tende yisügei-ba'atur tatar-un temüjin-üge qori-buqa teri'üten tatar-i dawuliju ire'asu tende hö'elün-üjin ke'elitei bürün onan-nu deli'ün-boldaq-a büküi-tür jöb tende činggis-qahan törejü'üi 
töreküi-tür bara'un qar-tur-iyan si'a-yin tedüi nödün qatqun törejü'üi 
tatar-un temüjin-üge-yi abčiraqsan-tur töreba ke'en temüjin nere ökküi teyimü 60. yisügei-ba'atur-un hö'elün-üjin-eče temüjin qasar qači'un temüge ede dörben kö'üt töreba
temülün neretei niken ökin törebi temüjin-ni yisün nasutu büküi-tür joči-qasar dolo'an nasutu büle'e
qači'un-elči tabun nasutu büle'e
temüge-otčigin qunan büle'e
temülün ölegetei büle'e
61. yisügei-ba'atur temüjin-ni yisün nasutu büküi-tür hö'elün-eke-yin törgüt olqunu'ut irgen-tür naqaču-nar-ača inu  öki quyusu ke'en temüjin-ni abu'at yorčiba
otqui-tur čekčer čiqurgu qoyar-un ja'ura onggiradai dei-sečen-ni jolqaba
62. dei-sečen ügülerün yisügei quda ken-tür joriju ayisula'a ke'ejü'ü 
yisügei-ba'atur ügülerün ene kö'ün-ü minu naqaču-nar olqunu'ut irgen-tür öki quyusu ke'en ayisulu'a ke'ejü'ü 
dei-sečen ügülerün ene kö'ün činu nidün-tür-iyen qaltu ni'ur-tur-iyan geretü kö'ün bui 63. yisügei quda bi ene söni jewüdün jewüdüleba
bi čaqān singqor naran sara qoyar-i atqun nisju irejü qar de'ere minu tu'uba
ene jewüdün-niyen gü'ün-e ügülerün naran sara-yi qaraju üjekden büle'e
edö'e ene singqor atquju abčiraju qar-tur minu tu'uba
čaqān bawuba
yambar ele sayi üje'ülümü ke'ejü yisügei quda ene jewüdün minu čimayi ele kö'ü-be'en uduritču iregüi-e üjeksen aju'u
jewüdün sayin jewüdüleba
ya'un jewüdün aqu ta kiyat irgen-ü sülder irejü ja'aqaqsan aju'u
64. ba
onggirat irgen erte üdür-eče je'e-yin jisün ökin-ü önggeten ulus ülü temečet qačar qo'a ökid-i qahan boluqsan-a tanu qasaq tergen-tür unu'ulju qara bu'ura kölgejü qatara'ulju otču qatun sa'urin-tur qamtu sa'ūlumu ba
ulus irgen ülü temečet ba
öngge sayit ökid-iyen ösgejü öljigetei tergen-tür unu'ulju öle bu'ura kölgejü e'üsgejü otču ündür sa'urin-tur öre'ele etet sa'ūlqui ba
erten-eče onggirat irgen qatun qalqatan ökit öčilten je'e-yin jisün ökin-ü öngge-ber büle'e
ba
65. nu'un kö'üt manu nuntuq qarayu ökin kö'ün manu  öngge üjekdeyü yisügei quda ger-tür minu oduya ökin minu üčü'ügen buyu quda üjetügei ke'ejü dei-sečen ger-tür-iyen uduritču bawūlba
66. öki inu üjebesü ni'ur-tur-iyan geretei nidün-tür-iyen qaltai ökin-i üjejü oyin-tur-iyan oro'ulba
temüjin-eče niken nasun yeke harbantai aju'u
börte neretei söni qonoju manaqasi öki inu quyubasu dei-sečen ügülerün olon-ta-wū quyu'ulju ökbesü de'ejilekdegü čö'en-te-wū quyu'ulju ökbesü doromjilaqdaqu ökin gü'ün-nü jaya'an töreksen e'üten-tür ötölgü ügei ökin-iyen be öksü kö'ün-iyen be güreget-te talbiju ot ke'eba
je bolulčaju yisügei-ba'atur ügülerün kö'ü-ben güreget-te talbisu kö'ü minu noqai-yača čočimtawu büle'e
quda kö'ü minu noqai-yača bu soči'ul ke'et kötöl morin-iyan belge ökčü temüjin-ni güreget-te talbiju otču 67. yisügei-ba'atur ja'ura čekčer-ün sira-ke'er-e tatar irgen qurimlan büküi-tür jolqaju undāsču qurim-tur anu bawulba
tede tatar tanin aju'u
yisügei-kiyan ire'ei ke'et uridan-u dawuliqdaqsan kegesü-ben duratču oyisuladun qujirju qoro qoliju ökči'üi ja'ura mawui otču qurban qonoq yabuju ger-tür-iyen gürü'et mawui bolju 68. yisügei-ba'atur ügülerün dotora minu mawui bui dergede ken bui ke'ejü qongqotadai čaraqa-ebügen-ü kö'ün mönglik oyira bui ke'esü uriju ire'üljü ügülerün čaqa minu mönglik kö'üt üčügetü büle'e
bi kö'ü-ben temüjin-i güriget-te  talbiju irerün ja'ura tatar irgen-e oyisulaqda'a bi dotora minu mawui buyu üčüget qočoruqsat de'ü-ner-iyen belbisün bergen-iyen asaraqu-yi či mede kö'ü minu temüjin-i ötörken otču abču ire čaqa minu mönglik ke'et nökčiba
69. yisügei-ba'atur-un üge-yi busi ülü bolqan mönglik otču dei-sečen-ne ügülerün yisügei aqa temüjin-i masi möröljü öre-ben ebedümü temüjin-i abura ireba ke'ejü'ü 
dei-sečen ügülerün quda kö'ü-ben mörölgü bö'esü ottuqai üjejü ötör iretuqai ke'ejü mönglik-ečige temüjin-i abču ireba
70. tere qabur ambaqai-qahan-nu qatut örbei soqatai jirin yekes-e qajaru inerü qaruqsan-tur hö'elün-üjin otču qojit gürčü qojida'u'uldaju hö'elün-üjin örbei soqatai jirin-e ügülerün yisügei-ba'atur-i ükübe-'ü ke'ejü kö'üd-i minu yeke ülü boluqui-yača yekes-ün kesig-eče bile'ür-eče sarqud-ača yekin qojida'ulumui ta üje'et ideküi ülü sergü'ülün newükün boluba ta ke'ejü'ü 
71. tere üge-tür örbei soqatai jirin qatut ügülerün uriju ülü ökteküi mörtei či učira'asu idegü yosutai či gürejü ülü öktegü mörtei či gürte'esü idegü yosutai či ambaqai-qahan-ni ükübe-'ü či ke'ejü hö'elün-ne gürtele eyin ke'ekdeküi bolbi
72. arqa-ča eden-i ekes kö'üd-i nuntuq-tur gejü newütkün ta ber bu abču yabutqun ke'et manaqarsi üdür-eče tayiči'ud-un tarqutai-kiriltuq tödö'en-girte-tan taiči'ut onan-müren huru'u gödölba
hö'elün-üjin-ni ekes kö'üd-i gejü newükderün qongqo tadai čaraqa-ebügen otču itqaqu-tur tödö'en-girte ügülerün če'el usun niduralu'a čeügen čilawun čewürelu'a ke'e'et newüje'ei čaraqa-ebügen-i ker itqaqu či ke'en qoyinača jida-bar jo qudus qatquju'u 73. čaraqa-ebügen yaratu bolju ger-tür-iyen irejü berke kebdeküi-tür temüjin üjere otču'u tende qongqotadai čaraqa-ebügen ügülerün sayin ečige-yin činu guriyaqdaqsan ulus-i manu bürin-ü ulus abču newükderün itqaqu bolun eyin kikdeba kejü'ü 
te'ün-tür temüjin uyila'at qarču yorčiba
hö'elün-üjin gejü newükderün tuqlaju beye-ber morilaju jarimut irgen-i ičuqaba
tede ber ičuqaqdaqsan irgen ülü toqtan tayiji'ud-un qoyinača newüjü'üi 
74. tayiči'ut aqa de'ü hö'elün-üjin-ni belbisün-ni kö'üt üčüget ekes kö'üd-i nuntuq-tur gejü newükdejü hö'elün-üjin eme mergen törejü üčüget kö'üd-iyen teji'erün ukitala boqtalaju hōjitala büselejü onan-müren ö'ede irada güyijü ölirsün moyilsun temgüjü üdür söni qo'olai teji'eba
sölsütei töreksen üjin eke sutan kö'üd-iyen teji'erün čigörsün sirō bariju südün čičigina uquju teji'ebi eke üjin-nü qaliyarsun manggirsun-iyar teji'ekset kö'üt qat bolura gürbi jarčimtai üjin eke-yin ja'uqasu-bar teji'ekset kö'üt jasaqtan sečet bolba
75. qo'a üjin-nü qoqosun manggirsu-'ar teji'ekset qa'uluqat  kö'üt qoyira'ut sayit bolba
eres sayit bolun baraju erekün omoqun ele boldaba
eke-yü'en teji'eye ke'eldüjü  eke onan-nu ergi de'ere sa'uju elgü'ür geügi jasalduju eremdek jemdek jiqasu elgüjü geügilejü je'ü-ber geügi eke'üljü jebüge qadara geügilejü čilüme gubči'ur huyaju jiramut jiqasu si'üjü jiči eke-yü'en hači teji'eba
76. niken üdür temüjin qasar bekter belgütei dörben qamtu sa'uju geügi tataqui-tur dotora niken gege'en soqosun oroju'ui temüjin qasar qoyar-ača bekter belgütei qoyar buliju abuba
temüjin qasar qoyar ger-tür irejü üjin eke-de ügülerün niken gege'en soqosun geügi ja'uqsan-i bekter belgütei aqa de'ü qoyar-a buliju abdaba ba ke'esü üjin eke ügülerün yegü'üje'ei aqa-nar de'ü-ner yekin teyin kildümüi ta se'üder-eče busu nökör ügei se'ül-eče busu čiču'a ügei bui bida tayiči'ut aqa de'ü-yeyen qasi'u ker aburaqun bida ke'ejü büküi-tür erte alan eke-yin tabun kö'üt metü yekin eye üge'ün bui ta bütügei ke'ebi 77. tendeče temüjin qasar qoyar ülü ta'alan ügülerün öčigen niken-te bilji'ur qodoliduqsan-i teyin gü buliju abula'a edö'e basa teyin gü buliba
qamtu ker alduqun bida ke'et e'üten o'orču qarču yorčiba
bekter hulqun de'ere sirqa aqta-tan yisün mori qaraju sa'u büküi-tür temüjin ümereče daldatču qasar emüneče daldatču sumu-ban salbaju gürküi-tür bekter üje'et ügülerün tayiči'ut aqa de'ü-yin qasi'un dawusun yadan hači ken-e aburan čidaqun-u ke'ejü büküi-tür namayi yekin nidün-ü surmusun aman-u qaqasun bolqamui ta se'üder-eče busu nökör ügei se'ül-eče busu čiču'a ügei-tür yekin teyin setkiba
ta qolumta  minu bu bürelgetkün belgütei-yi bu tebčitkün ke'e'et jabilan sa'uju güličeba
temüjin qasar qoyar emüneče ümereče ötermelejü otba
78. ger-tür irejü oroqui-lu'a üjin eke qoyar kö'üked-ü'en čirai uqaju ügülerün baraqsat qala'un-ača minu qalat qarurun qar-dur-iyan qara nödün qatqun töreligi ene qarbisu-ban qajaqu qasar noqai metü qada-tur dobtulqu qablan metü a'ur-iyan darun yadaqu arslan metü amidu jalgisu kegü manggus metü se'üder-tür-iyen dobtulqu singqor metü sem-iyer jalgiqu čuraq metü botoqan-iyan borbi qajaqu bu'ura metü boroqan-tur siqaqu činō metü kö'üd-iyen gelin yadaju kö'üd-iyen idegü anggir metü kebdesi-yen könde'esü ömergü čö'eböri metü bariju ülü sa'araqu bars metü balamut dobtulqu baruq metü baraba
se'üder-eče busu nökör ügei-tür se'ül-eče busu čiču'a ügei-tür tayiči'ut aqa de'ü-yin qasi'un dawusun yadan büküi-tür hači ken-e aburaqun-u ke'ejü büküi-tür ker aya ke'en eyin kildümüi ta ke'en kö'üd-iyen qa'učin üges qadalun ötögüs üges orkidun masi mawulabi
79. tedüi atala tayiči'ud-un tarqutai-kiriltuq turqa'ud-iyan uduritču qoluqat qo'ojiju'u silüget siberijü'ü  ke'en irejü'üi 
ayuju ekes kö'üt aqa-nar de'ü-ner siqui hoi-tur qorqolaju belgütei mudut ququru tatalaju sibe'e bariju qasar qarbulalduju qači'un temüge temülün qurban-i jabaja'ura dürüjü bulqaldun büküi-tür tayiči'ut ungsiju ügülerün aqa-ban temüjin-i ile busud-i tanu kerek ügei ke'en ungsiqdaju temüjin-i morila'ulju  buru'utqan hoi-tur duta'aju otqui-yi tayiči'ut üjejü hüldejü tergüne-ündür-ün siqui-dur sirquju orobasu tayiči'ut oron yadaju siqui-dur horčin sakiju 80. temüjin siqui dotora qurban qonoju qarsu ke'en mori-yan kötöljü ayisuqui-tur morin-ača eme'el inu mültürejü qočorču'u qariju üje'esü eme'el kömüldürgelekse'er olanglaqsa'ar mültürejü qočorču'u olang-či boltuqai kömüldürge basa ker mültüregü büle'e
tenggeri itqan aqu-yū ke'ejü qariju basa qurban qonoba
basa qarču ayisuqui-tur siqui-yin amasar-a qosiliq-un tedüi čaqān gürü amasar-a böklen unaju'u
tenggeri itqan aqu-yū ke'ejü qariju basa qurban qonoba
basa yisün qonoq ide'en ügei aju nere ügei ker ükükdeküi qarsu ke'ejü tere amasar böklen unaqsan qosiliq-un tedüi čaqān gürü horčin qarbasu ülü bolqu modud-i sumuči kituqai-bar-iyan hoqtori'at mori-yan qaltari'ulu'at qarqui-lu'a tayiči'ut sakiju aju'u
bariju abču otba
81. temüjin-i tarqutai-kiriltuq abču otču ulus irgen-dür-iyen jasaqlaju ayil-tur niken qono'ulun qono'ulun bitü'ülün yabuqui-tur jun-u teri'ün sara-yin harban jirwa'an-a hula'an tergel üdür tayiči'ut onan-nu ergi de'ere qurimlalduju naran singge'esü tarqaba
temüjin-i tere qurim-tur gelbüre kö'ün gü'ün abčiraju büle'e
qurim-un haran-i tarqa'ulun tere gelbüre kö'ün-eče buqa'u tataju abču heki inu niken-te deledü'et güyijü onan-nu tün dotora kebte'esü üjekdegü ke'ejü usun-u qarki-tur gedergü kebdejü buqa'u-ban usun huru'u urusqan ni'ur  ile kebdeba
82. tere aldaqsan gü'ün yeke dawu-bar bariya gü'ün aldaba ke'en qayilaqui-tur tarqaqsat tayiči'ut quriju irejü üdür metü sara'ur-a onan-nu tün-ni bedereba
qarki-tur kebtejü büküi-yi suldusun sorqan-sira jöb da'ariju üjejü ügülerün jöb) ele eyimü arqatu-yin tula nidün-dür-iyen qaltu ni'ur-tur-iyan geretü ke'en tayiči'ut aqa de'ü-de'en teyin ele naitaqdan aju'u
či teyin gü kebte ülü ja'aqu bi ke'et nökčiba
basa qarin bedereye ke'eldüküi-tür sorqan-sira ügülerün mün mün mör-i'er-en ese üjeksen qajar-iyan üje'et qarin bedereye ke'eba
je gü ke'eldüba
mün mün mör-iyer qarin bederejü basa sorqan-sira da'ariju ügülerün aqa de'ü činu ama-'an sidü-ben bile'üden ayisu teyin kebte qada'uji gü ke'et nökčiba
83. basa qarin bedereye ke'eldüküi-tür sorqan-sira basa ügülerün tayiči'ut kö'üt ta gege'en čaqa'an üdür gübčin gü'ü aldaba
edö'e qarangqui söni ker olqun bida basa mün mün mör-iyer ese üjeksen qajar-iyan üje'et qarin bedere'et tarqaju manaqar üdür či'ulju eriye qa'a otqu tere buqa'utu gü'ün ke'eba
je ke'eldüjü qarin bederejü sorqan-sira basa da'ariju ügülerün edüi bedere'et qariju manaqar eriye ke'eldüba
edö'e man-i tarqa'ulun baraju eke-ben de'ü-ner-iyen erin ot namayi üjeba ke'en gü'ün-e üjekde'esü üjekdebe ke'en bu kelele ke'et nökčiba
84. ani tarqa'ulun baraju dotora-ban setkijü öčigen ayil  bitü'üljü qono'ulqui-tur sorqan-sira-yin ger-tür qonobasu čimbai čilawun qoyar kö'üt inu örö jirüge-ben ebetčü söni namayi üjejü buqa'u minu abču sulalaju qono'a'ululāi edö'e basa sorqan-sira namayi üjejü ülü ja'an nökčin aba
edö'e mün-kü tede namayi aburamu je ke'ejü sorqan-sira-yin ger erin onan-müren huru'u yorčiba
85. ger-ün belge sün tüsürü'et esüg-iyen söni-de üdür čayitala bülekü büle'e
tere belge sonosču yabubasu büle'ür-ün dawu sonosču gürčü ger-tür inu orobasu sorqan-sira eke-ben de'ü-ner-iyen erin ot ese-'ü kelelü'e bi yekin ireba či ke'eba
čimbai čilawun qoyar kö'üt inu ügülerün sibawuqan-i turumtai buta-tur qorqobasu buta aburaju'ui edö'e bidan-tur ireksen-i yekin teyin ke'emü či ke'en ečige-yü'en üge ülü ta'alan buqa'u inu čučalju qal-tur tülejü qoyitu nungqasutu tergen-tür unu'ulju qada'an neretei döyi-ben amitu gü'ün-e bu kelele ke'ejü asara'ulba
86. qutu'ar üdür gü'ün ni'uba je ke'eldüjü ö'er ja'ura nengjileldüya ke'eldüjü nengjileldüba
sorqan-sira-yin ger-tür tergen-tür iseri-yin dōro gürtele nengjijü qoyitu nungqasutu tergen-tür unuju amasar-a büküi nungqasu tatalaju köl-tür gürküi-tür sorqan-sira ene basa eyimü qala'un-a nungqasun dotora ker da'usqu ke'esü nengji'ülsün bawuju yorčiba
87. nengji'ül-i oduqsan-u qoyina sorqan-sira ügülerün namayi hünesü-'er keyisgen aldaba
edö'e eke-ben de'ü-ner-iyen  erin ot ke'ejü aman čaqa'an eremük qulaqčin-i unu'ulju tel quriqan bolqaju gö'ür nambuqa jasaju eme'el ülü ögün kete ülü ögün numu ökčü qoyar sumu ökba
tedüi jasaju ileba
88. temüjin teyin odu'at sibe'elejü qorqolaqsan qajar-dur-iyan gürčü ebesün-ü alurqai-bar onan-müren ö'ede möčgijü höröneče kimurqa-qoroqan oroju iren aju'u
tere ö'ede möčgiyet kimurqa-qoroqan-nu beder-qosi 'un-u qorčuqui-boldaq-a büküi-tür jolqalduba
89. tende neyileldüjü otču burqan-qaldun-u ebür-e gürelgü dotora senggür-qoroqan-u qara-jirügen-ü kökö-na'ur nuntuqlaju aqui-tur tarbaqat küčügür alaju iden büle'e
90. niken üdür sirqa aqta-tan naiman morit ger-ün dergede bayiju büküi-yi de'erme irejü üjetele de'ermetčü yorčiba
yabuqat üjejü qočorba
belgütei oqodur dargi qongqor-i unuju tarbaqačilara otču büle'e
üdesi naran singgeksen-ü qoyina belgütei dargi oqodur qongqor-tur tarbaqat ačiju niqsaqaljatala yabuqan kötöljü ireba
sirqa aqta-tan-i de'erme abču otba
ke'esü belgütei ügülerün bi nekesü ke'eba
qasar ügülerün či ülü čidaqu bi nekesü ke'eba
temüjin ügülerün ta ülü čidaqu bi nekesü ke'ejü dargi qongqor-i temüjin unuju sirqa aqta-tan-i ebesün-ü alurqai-bar möčgijü qurban qonoju manaqar erte mör-tür olon adu'un-tur niken gürümele kö'ün gü'ün ge'ü sa'an aqu-yi jolqaju sirqa aqta-tan-i surabasu tere kö'ün ügülerün ene manaqar naran urququ-yin urida sirqa aqta-tan  naiman morit e'über hüldejü yorčiba
mör inu bi ja'aju öksü ke'et oqodur qongqor-i talbi'ulju temüjin-ne oroq singqula-yi unu'ulba
mün ö'esün qurdun qubi-yi unuba
ger-dür-iyen ba
ülü odun nambuqa sa'uluqa-ban ke'er-e buquju talbiba
nökör či bürün masi mungtaniju ayisu aju'u
ere-yin mung niken bui je bi čimatur nököčesü ečige minu naqu-bayan ke'ekdeyü bi qaqča kö'ün inu bi bo'orču neretü bui ke'e'et sirqa aqta-tan-u mör-iyar inu möčgijü qurban qonoju üdesi naran quburi tasin büküi-tür niken güri'en irgen-tür gürba
sirqa aqta-tan naiman morit tere yeke güri'en-ü kija'ar-a ebesülen bayiju büküi-yi üjeba
temüjin ügülerün nökör či ende bayi bi sirqa aqta-tan tede bui hüldejü qarsuqai ke'eba
bo'orču ügülerün nököčesü ke'en irele'e bi ende yekin bayiqu ke'et qamtu dobtulju oro'at sirqa aqta-tan-i hüldejü qarba
91. qoyinača haran ubur subur nekejü ayisu niken čaqa'an moritu gü'ün u'urqa bariju qaqča-'ar küyičejü ayisu bo'orču ügülerün nökör numu sumu nada ača bi qarbulaldusu ke'eba
temüjin ügülerün minu tula či erüste'üjei bi qarbulaldusu ke'ejü esergü qarin qarbulalduba
tere čaqa'an moritu gü'ün u'urqa-bar-iyan dokiju bayiba
qoyitus nököt küyičejü ireba
naran singgejü otba
dü'üsin bolju ayisu qoyitu tede haran baru'an boldaju bayiju qočorba
92. tere söni düli'et qurban üdür qurban söni dülijü gürba
temüjin ügülerün nökör bi čima-dača anggida ede morid-iyan  abqu'ū büle'e
qubiyalduya kedüi-yi abqu ke'emü ke'ebe bo'orču ügülerün bi sayin nökör-i čimayi mungtaniju ayisu ke'en sayin nökör-e tusa bolsu ke'en nököčejü ireba
bi ölje-'ü ke'ejü abqu bi ečige minu naqu-bayan neretü buyu naqu-bayan-nu qaqča kö'ün inu bi buyu ečige-yin minu jü'eksen nada tügetele buyu bi ülü abqu tusa boluqsan minu ya'un tusa bolqu ülü abqu ke'eba
93. naqu-bayan-nu ger-tür gürba
naqu-bayan kö'ün-ben bo'orču-yi jabqaju nisun nilbusu-bar aju'u
genete gürtejü kö'ü-ben üjejü niken-te uyilamu niken-te dongqodumu kö'ün inu bo'orču ügülerün ya'un bolba
sayin nökör mungtaniju ayisun aju'u
nököčejü odula'a bi edö'e ireba
ke'et ha'ulju otču ke'er-e buquqsan nambuqa sa'uluqa-ban abčiraba
temüjin-ne tel quriqan alaju günesü ögü'et nambuqa de'ürge jasaju günesüle'ülba
naqu-bayan ügülerün qoyar jala'us bui ta üjeldüktüt mono qoyina bu tebčildüktüt ke'eba
temüjin otču qurban söni qurban üdür yorčiju senggür-qoroqan-a ger-tür-iyen gürba
hö'elün-eke qasar ki'et de'ü-ner inu herüjü aju üjejü bayasba
94. tendeče temüjin belgütei qoyar dei-sečen-nü börte-üjin-i yisün nasutu büküi-tür üjejü irekse'er qaqačaju büle'e
kelüren-müren huru'u erin otba
čekčer čiqurqu qoyar-un ja'ura dei-sečen onggirat tende aju'u
dei-sečen temüjin-i üjejü masi yeke bayasču ügülerün tayiči'ut aqa de'ü činu naitamu ke'en medejü masi herüjü čököle'ei aran üjeba je  čimayi ke'et börte-üjin-i neyile'üle'et e'üsgeba
e'üsgen ayisurun dei-sečen ja'ura kelüren-ü uraq-čöl nū-dača qariba
gergei inu börte-üjin-ü eke čotan neretei büliyi čotan öki-yen hüdejü gürelgü dotora senggür-qoroqan-a büküi-tür gürgejü ireba
95. čotan-ni qari'ulu'at belgütei-yi bo'orču-yi nököčeye ke'en uriju ileba
bo'orču belgütei-yi gürge'ülü'et ečige-dür-iyen ülü kelelen bögötür qongqor-i unu'at boro örmüge-ben böktürü'et belgütei-lü'e ireba
tere nököčekse'er nököčeküi yosun teyimü 96. senggür-qoroqan-ača newüjü kelüren-müren-ü teri'ün bürgi-ergi-de nuntuqlan bawuju čotan eke-yin sitkül ke'en qara buluqan daqu abčiraju büle'e
tere daqu-yi temüjin qasar belgütei qurban abču otču erte üdür yisügei-qan ečige-lü'e kereyit irgen-ü ong-qan anda ke'eldüksen aju'u
ečige-lü'e minu anda ke'eldüksen ečige metü bui je ke'en ong-qan-i tu'ula-yin qara tün-ne buyu ke'en medejü otba
ong-qan-tur temüjin gürčü ügülerün erte üdür ečige-lü'e minu anda ke'eldüksen aju'u
ečige gü metü buyu je ke'ejü gergei bawülju emüsgel čimada abčiraba ke'en buluqan daqu ökba
ong-qan masi bayasču ügülerün qara buluqan daqu-yin qari'u qaqačaqsan ulus-i činu qamtutqaju öksü buluqan daqu-yin qari'u butaraqsan ulus-i činu bügütkeldüjü öksü bököre-yin bökse-tür čekere-yin če'eji-tür aduqai ke'eba
97. tendeče qariju bürgi-ergi-de büküi-tür burqan-qaldun- ača uriangqadai gü'ün jarči'udai ebügen kü'ürge-ben ürčü jelme neretü kö'ün-iyen uduritču irejü jarči'udai ügülerün onan-nu deli'ün-boldaq-a büküi-tür temüjin-i töröküi-tür buluqan nelkei ögüle'e bi ene kö'ü-ben jelme-yi ögüle'e gü bi üčügen ke'en abču odula'a edö'e jelme-yi eme'el-iyen toqu'ul e'üde-'en negü'ül ke'ejü ökba
98. kelüren-müren-nü teri'ün-e bürgi-ergi-de bawuju büküi-tür niken manaqar erde gerel siral üdür geyin büküi-tür hö'elün-eke-yin ger dotora gödölküi qo'aqčin-emegen bosču ügülerün eke eke öter bos qajar derbelümüi tübüri'ün sonostamu jalqamsiqtan tayiči'ut ayisun aqun-ü eke öter bos ke'ebi 99. hö'elün-eke ügülerün kö'üd-i öter seri'ülütkün ke'et hö'elün-eke öter gü bosbi temüjin-tan kö'üt öterlen gü bosu'at morid-iyan bariju temüjin niken mori unuba
hö'elün-eke niken mori unuba
qasar niken mori unuba
qači'un niken mori unuba
temüge-otčigin niken mori unuba
belgütei niken mori unuba
bo'orču niken mori unuba
jelme niken mori unuba
temülün-ni hö'elün-eke ebür-tür-iyen de'ürbe niken mori kötöl jasaba
börte-üjin-e mori dutaba
100. temüjin aqa-nar de'ü-ner morilaju erte bö'ete burqan jük qarba
qo'aqčin-emegen börte-üjin-i ni'usu ke'en böken qara'utai tergen-tür unu'ulju bö'ere alaq hüker köljü tenggelik-qoroqan ö'ede gödöljü ayisun büküi-tür herü baru-da üdür geyin  büküi-tür esergün-eče čerik haran qataraju hergijü gürčü irejü ya'un gü'ün či ke'en hasaqba
qo'aqčin-emegen ügülerün bi temüjin-ü'ei bui yeke ger-tür qonin kirqara irele'e ger-tür-iyen qariju ayisi ke'ebi tendeče ügülerün temüjin ger-tür buyu-'ū ger keji'e buyu ke'ebi qo'aqčin-emegen ügülerün ger-či oyira buyu temüjin-i büküi-yi ügei ese uqabi qoyinača bosu'at irebi bi ke'ebi 101. tede čeri'üt tedüi qataraba
qo'aqčin-emegen bö'ere alaq hüker-iyen deledü'et öterlen ne'ügü bolun tergen-ü tenggeli ququs otba
tenggeli-ben ququraqdaju yabuqad-iyar hoi-tur güyijü oroya ke'eldün büküi-tür daruča müt čeri'üt belgütei-yin eke-yi sundula'ulduju qoyar köt  inu čerbegelje'üljü qadaraju gürčü ire'et ene tergen dotora ya'un te'ejü amu ke'eba
qo'aqčin-emegen ügülerün ungqasun te'ejü amu ke'ebi tede čeri'üd-ün aqa-nar inu ügülerün de'ü-ner kö'üd-iyen bawuju üjetkün ke'eba
de'ü-ner kö'üt inu bawuju qa'atai tergen-ü qa'alqa abqui-lu'a dotora qatuqje  gü'ün sa'uju imayi tergen-eče čirčü bawūlju qo'aqčin jirin-i sundula'ulju abu'at temüjin-ü qoyinača ebesün-ü alurqai-bar möčgijü burqan jük qarba
102. temüjin-ü qoyinača burqan-qaldun-ni qurban-ta quči'ulju erüsün yadaba
eyin teyin bulji'asu ümbü sibar berke hoi inu čatqulang moqai-ya sirqu'asu ülü bolqu berke siqui qoyinača inu daqaju erüsün yadaju'ui tede qurban merkit aju'u
uduyit-merkid-ün toqto'a uwas-merkid-ün dayir-usun qa'at-merkid- ün qa'atai-darmala ede qurban merkit erten-ü hö'elün-eke-yi čiledü-dača buliju abdala'ai ke'en edö'e tere ösöl ösön irekset aju'u
tede merkit ügüleldürün hö'elün-nü hači aburan edö'e emes-i anu abuba
hači-yan aburaba
bida ke'eldüjü burqan-qaldun-nača bawuju geyit-tür-iyen ajiraba
103. temüjin tede qurban merkit maqat geyit-tür-iyen ajiraba-yū bükčü-'ü amui ke'en belgütei bo'orču jelme qurban-i merkid-ün qoyinača uqa'uta qurban qonoq daqa'ulju merkid-i küngke'üljü temüjin burqan de'ereče bawuju ebče'ü-ben mö'eletčü ügülerün qo'aqčin-eke-yi solangqa bolju sonosqu-yin tula ünen bolju üjegü-yin tula büdün beye-'en buru'udun bugiya moritu buqu-yin horum horumlaju burqasun ger gerlen burqan de'ere qarula'a burqan-qaldun-a bö'esün-ü tedüi amin-iyan bulji'uldaba
bi qaqčaqan amin-iyan qayiralan qaqča moritu qandaqai-yin horum horumlaju qalqasun ger gerlen qaldun de'ere qarula'a bi qaldun-burqan-a qarča-yin tedüi amin-iyan qalqalaqdaba je bi masi ayu'uldaba
bi burqan-qaldun-i manaqar büri maliyasuqai üdür büri öčisügei uruq-un uruq minu uqatuqai ke'en naran esergü büse-ben güjü'ün-dür-iyen erigelejü maqalai-ban qar-tur-iyan se'ejigelejü qar-iyan ebče'ün-dür-iyen mö'eletčü naran jük yisün-te sögötčü sačuli öči'üli ökba
104. tedüi kelelejü temüjin qasar belgütei qurban kereyid-ün to'oril ong-qan-tur tu'ula-müren-nü qara tün-na büküi-tür  otču ügülerün qurban merkit-te genen büküi-tür irejü eme kö'ü-ben dauliju abdaba
qan ečige minu eme kö'ü aburaju öktügei ke'en ireba ba ke'eba
tere üge-yin qari'u to'oril ong-qan ügülerün bi nidöni čimada ese-'ü ügülele'e buluqan daqu nada abčirarun ečige-yin čaq-un anda ke'eldüksen ečige metü buyu je ke'en emüsgekde'esü tende bi ügülerün buluqan daqu-yin qari'u butaraqsan ulus-i činu bügütgeldüjü öksü qara buluqan daqu-yin qari'u qaqačaqsan ulus-i činu qamtutqalduju öksü ke'en čekerei-yin če'eji-tür atuqai bökörei-yin bökse-tür atuqai ese-'ü ke'ele'e bi edö'e tere üge-dür-iyen gürün buluqan daqu-yin qari'u bügüde merkid-i büreltele börte-üjin-i činu aburaju öksü bi qara buluqan daqu-yin qari'u qamuq merkid-i qaltačiju qatun börte-yi činu qari'ulju abčiraya bida či jamuqa de'ü-de kelen kijü ile jamuqa de'ü qorqonaq-jubur-a bui je bi endeče qoyar tümet morilasu bara'un qar bolun jamuqa de'ü qoyar tümet bolju jewün qar bolun morilatuqai bidan-u bolja'an jamuqa-dača boltuqai ke'eba
105. temüjin qasar belgütei qurban to'oril-qan-nača qariju ger-tür-iyen gürčü temüjin jamuqa-tur qasar belgütei qoyar-i ilerün jamuqa anda-da ügüle ke'en ügülejü ilerün qurban merkit-te irejü oro-ban hoqtorqu boldaqda'a bi önör nikentan busut-ū bida ösöl-iyen ker ösökün ebür-iyen hemtülde'e bi heligen-ü uruq busut-ū bida hači-yan ker hačilaqun bida ke'ejü ileba
jamuqa anda-da ügülejü ileksen üge edüi basa kereyid-ün  to'oril-qan-nu ügüleksen üges-i jamuqa-da ügülejü ilerün erde üdür yisügei-qan ečige-de minu tusa sayi kikdeksen-i setkijü nököčesü bi qoyar tümet bolju bara'un qar bolun morilasu jamuqa de'ü-de kelelejü ile jamuqa de'ü qoyar tümet morilatuqai qamtutqu bolja'an jamuqa de'ü-deče boltuqai ke'eba
ede üges-i da'usqan baraju jamuqa ügülerün temüjin anda-yi oro hoqtorqu bolba ke'en medejü örö minu ebetba
ebür hemtereba ke'en medejü helige minu ebetba
ösöl-iyen ösön uduyit uwas-merkid-i ülütkejü üjin-börte-yen aburaya hači-yan aburan qamuq qa'at-merkid-i qaltačiju qatun börte-yü'en qari'ulun aburaya edö'e tere gölme dabsiqui-tur kö'ürge-yin dawu bolqaju kökidek toqto'a bu'ura-ke'er-e bui je dabčitu qor darbaljaqui-tur dayijiq či dayir-usun edö'e orqon selengge qoyar-un ja'ura talqun-aral-a bui je qamqa'ulsun keyisküi-tür qara hoi temečekči qa'atai-darmala edö'e qaraji-ke'er-e bui je edö'e bida dötelen kilqo-müren-ni kinggüs saqal bayan esen atuqai sal huyaju oroya tere kökidek toqto'a-yin erüge de'ere inu oroju erkin e'ede inu embürü da'ariju eme kö'ün inu ečültele hawuluya qutuq e'ede inu ququru da'ariju qotola ulus-i inu qo'osun boltala hawuluya 106. jamuqa basa ügülerün temüjin anda to'oril-qan aqa qoyar-a ügüle ke'en ügülerün bi bürün qara'atu tuk-iyan sačuba
bi qara buqa-yin arasun-niyar büriksen bürkiren büküi dawutu kö'ürge-ben deletba
bi qara qurdun-iyan unuba
bi  qatangqu de'el-iyen emüsba
bi qatan jida-ban bariba
bi qatqurasutu sumun-iyan onolaba
bi qa'at-merkit-tür qatquldun morilaya bö'et ke'en ügüle urtu qara'atu tuk-iyan sačuba
bi hüker-ün arasu-bar büriksen ötken dawutu kö'ürge-ben deletba
bi oroq qurdun-iyan unuba
bi hüdesütü quyag-iyan emüsba
bi onggitu üldü-be'en bariba
bi onotu sumun-iyan onolaba
bi uduyit-merkit-tür üküldüya bö'et ke'en ügüle to'oril-qan aqa morilarun burqan-qaldun-u ebür-iyer temüjin anda-yi da'ari'at irejü onan-müren-nü teri'ün-e botoqan-bo'orji-da boljalduya endeče morilarun onan-müren ö'ede anda-yin ulus ende bui anda-yin ulus-ača niken tümen bi endeče niken tümen qoyar tümen bolju onan-müren ö'ede otču botoqan-bo'orji-da boljāl qajar-a neyileldüya ke'en ügülejü ileba
107. jamuqa-yin ede üges inu qasar belgütei qoyar irejü temüjin-e ügülejü to'oril-qan-na kelen gürgeba
to'oril-qan jamuqa-yin ede üges gürge'ülü'et qoyar tümet morilaba
to'oril-qan morilarun burqan-qaldun-u ebür kelüren-ü bürgi-ergi jorin ayisi ke'en temüjin bürgi-ergi-de bürün mör-tür bui ke'en jayilan tünggelik ö'ede newüjü tana-qorqon-a burqan-qaldun-u ebür bawuju temüjin tendeče čerik e'üsgejü to'oril-qan niken tümen to'oril-qa-nu de'ü jaqa-gambu niken tümen qoyar tümend-iyer kimurqa-qorqon-u ayil-qaraqana-da bawuju büküi-tür neyilen bawuba
108. temüjin to'oril-qan jaqa-gambu qurban qamtutču  tendeče gödöljü onan-nu teri'ün botoqan-bo'orji-da gürbesü jamuqa boljāl qajar-a qurban üdür urida gürčü'üi jamuqa ede temüjin to'oril jaqa-gambu-tan-u čeri'üd-i üje'et jamuqa qoyar tümet čeri'üd-iyen jasaju bayiju'ui ede ber temüjin to'oril-qan jaqa-gambu-tan čeri'üd-iyen jasa'at gü gürülčejü jiči tanilduju jamuqa ügülerün boro'an ber bolu'asu boljāl-tur qura ber bolu'asu qural-tur bu qojidaya ese-'ü ke'eldüle'ei bida mongqol je andaqartan busut-ū je-deče qojidaqsan-i jerge-deče qarqaya ke'eldüle'ei ke'eba
jamuqa-yin üge-tür to'oril-qan ügülerün boljāl qajar-a qurban üdür qojit bayiba ke'en qodulaqu-yi čimarlaqu-yi jamuqa de'ü medetügei ke'eba
boljāl-un čimar edüi ügüleldüjü 109. botoqan-bo'orjin-ača gödöljü kilqo-müren-ne gürčü sal huyaju ketülü'et bu'ura-ke'er-e toqto'a-beki-yin erüge de'ereče erkin e'ede embürü da'arin oroju eme kö'ü inu ečültele dauliba
quduq e'ede inu ququru da'ariju qotola ulus inu qokiratala dauliba
toqto'a-beki-yi kebte'e bö'etele gürgü-yi kilqo-müren-ne bükün jiqačin buluqačin görö'ülüčin talbiqsat dayin ayisi ke'en söni dülin kelen gürgen otču'ui tere kelen gürge'ülü'et toqto'a uwas-merkid-ün dayir-usun qoyar qamtutču selengge huru'u barqujin oron čö'en beyes-iyen duta'an buru'utču'ui 110. merkid-ün ulus selengge huru'u söni-de dürbejü yabuqui-tur bidan-u čeri'üt dürbejü yabuqun merkid-i söni-de gü daručaju dawulin talan yabuqui-tur temüjin dürbejü ayisuqun  irgen-tür börte börte ke'en ungsiju yabuqui-tur učiraju börte-üjin tede dürbekün irgen-tür büjü'üi 
temüjin-ü dawu sonosču taniju tergen-eče bawu'at güyijü irejü börte-üjin qo'aqčin jirin temüjin-ü jilu'a čilbur söni taniju bariju'ui sara'ur büle'e
üje'esü börte-üjin-i taniju teberildün tusulčaba
tendeče temüjin to'oril-qan jamuqa anda qoyar-a mün söni bö'et ügülejü ilerün erigü kereg-iyen olba
bi söni bu düliye ende bawuya bida ke'ejü ileba
merkid-ün ulus dürbejü ayisuqui-yi söni-de sandurču ayisuqui ja'ura mün tende bawuju qonoba
börte-üjin-i teyin jolqalduju merkit irgen-eče aburaqsan yosun eyimü 111. türün urida uduyit-merkid-ün toqto'a-beki uwas-merkid-ün dayir-usun qa'atai-darmala ede qurban merkit qurban ja'ut haran üdür-ün erte toqto'a-beki-yin de'ü yeke-čiledü-deče yisügei-ba'atur-a hö'elün-eke-yi buliju abtalāi ke'en te'ün-i ösön hačiran otču'ui temüjin-i burqan-qaldun-ni qurban-ta quči'ulqui-tur börte-üjin-i tende erüsčü čiledü-yin de'ü čilger-bökö-de asara'uluqsan aju'u
tere asaraqsan'ar aju čilger-bökö dayijiju qarurun ügülerün qara kere'e qalisu körisü idegü jaya'atu bö'etele qalawun toqura'un-i idesü ke'en jesin aju'u
qatar mawui čilger bi qatun üjin-tür qalqu bolun qamuq merkit-te huntawu qaraču mawu čilger qara teri'ün-dür-iyen gürtegü bolba
qaqčaqan amin-iyan qoroqun qarangqu qabčal sirqusu qalqa ken-e boldaqu-yū bi quladu mawu sibawun quluqana küčügene idegü jayātu bö'etele qun toqura'un-i  idesü ke'en jesin aju'u
qunar mawu čilger bi qutuqtai sutai üjin-i quriyaju iregü bolun qotola merkit-e huntawu bolba
qokir mawu čilger qokimai teri'ün-dür-iyen gürtegü bolba
bi qorqosun-u tedüi amin-iyan qoroqun qaratu qarangqu qabčal-a sirqusu qorqosun-u tedüi amin-a minu qoriya'an ken-e boldaqu-yū bi ke'e'et daijin duta'aju'u
112. qa'atai-darmala-yi erüsba
abčiraju qabtasun buqa'u emüsgejü qaldun-burqan-na jori'ulba
belgütei-yin eke tere ayil-tur buyu ke'en ja'aqdaju belgütei eke-yü'en abura otču ger-tür inu belgütei bara'un e'üten-ber oroqu-lu'a eke inu nabtarqai nekei de'eltei jewün e'uten-ber qaru'at qadana busu gü'ün-ne ügülerün kö'üt minu qat bolju'u ke'ekdemüi bi ende mawui gü'ün-tür tübejü edö'e kö'üd-iyen ni'ur ker üjeküi bi ke'et güyijü siqui hoi-tur sirquju'u tedüi erijü ese oldalāi belgütei-noyan merkidei ele yasutu gü'ün-ni eke-yi minu abčira ke'ejü qodolitqu büle'e
burqan-ni qučilduqsat qurban ja'ut merkid-i uruq-un uruq-a gürtele hünesü-'er keyistele ülitgeba
hülekset eme kö'ün anu ebüritkün medüs-i ebüritba
e'üten-tür oro'ul-daqun medüs-i e'üten-dür-iyen oro'ulba
113. to'oril-qan jamuqa qoyar-i temüjin büsiren ügülerün qan ečige minu jamuqa anda qoyar-a nököčekdejü tenggiri qajar-a güčü nemekdejü erketü tenggiri-de nereyitčü eke etügen-e gürgejü ere hačitu merkit irgen-i ebür ba anu hoqtorqui bolqaba helige ba anu hemtelba bida oro ba anu hoqtorqui bolqaba uruq-un ba gü'ün-ni ülütgeba bida hüleksed-i ba anu arbilaba je bida merkit irgen-i tedüi busangqaju ičuya ke'eldüba
114. uduyit-merkit dürberün buluqan maqalaitu maral-un qodun qudusutu ilkin jarqaq usun-u buluqan jalqaqsan de'eltü tabun nasutu küčü neretü nidün-dür-iyen qaltu kö'üken-i bidan-u čeri'üt nuntuq-tur qočoruqsan-i olju abčiraju hö'elün-eke-de sauqa abču otču ökba
115. temüjin to'oril-qan jamuqa qurban qamtutču merkid-ün čorqan ger čoqoli'ulju čoqtai eme-yi arbilaju orqan selengge qoyar-un talqun-aral-ača ičurun temüjin jamuqa qoyar qamtutču qorqonaq-jubur jorin ičuba
to'oril-qan ičurun burqan-qaldun-nu gerü-ber hökörtü-jubur da'arin qača'uratu-subčit huliyatu-subčit da'arin görü'en inu abala'at tu'ula-yin qara tün-ni jorin ičuba
116. temüjin jamuqa qoyar qorqonaq-jubur-a neyilen bawuju erten-ü anda bolulčaqsan-iyan duradulčan anda tungqulduju amaralduya ke'eldüba
angqa urida anda bolulčarun temüjin harban niken nasutu büküi-tür jamuqa quraltuq si'a temüjin-ne ökčü temüjin-ü činggültüktü si'a anda bolulčaju anda ke'eldüksen onan-nu mölsün-tür si'aljaqui-tur tende anda ke'eldüle'ei te'ün-ü qoyina qabur alanggir numutan qarbiyaldun büküi-tür jamuqa bura'u-yin qoyar eber ni'aju nükelejü dawutu yor-iyan temüjin-e ökčü temüjin-ü arča manglaitu qodoli araljiju andačilalduba
nököte anda ke'eldüksen yosun teyimü  117. uridus ötögüs-ün üge sonosču anda gü'ün amin niken ülü tebčildün amin-u ariči boluyu ke'en amaralduqui yosun teyimü edö'e basa anda tungqulduju amaraya ke'eldüjü temüjin merkid-ün toqto'a-yi arbilaju abuqsan altan büse jamuqa anda-da büsele'ülba
toqto'a-yin esgel qali'un-i jamuqa anda-da unu'ulba
jamuqa uwas-merkid-ün dayir-usun-i arbilaju abuqsan altan büse temüjin anda-da büsele'ülba
dayir-usun-u gü ebertü ünügün čaqa'an-i temüjin-e unu'ulba
qorqonaq-jubur-un quldaqar-qun-nu ebür-e saqlaqar-mudun-a anda ke'eldüjü amaralduju qurimlan toyilan jirqalduju söni könjile-de'en qaqča qonolduqun büle'e
118. temüjin jamuqa qoyar amaraldurun niken hon nökö'e hon-u jarim amaralduju tere aqsan nuntuq-ača niken üdür newüye ke'eldüjü newürün jun-nu teri'ün sara-yin harban jirqo'an-a hula'an tergel üdür newüba
temüjin jamuqa qoyar qamtu terged-ün urida yabuju ayisurun jamuqa ügülerün temüjin anda anda a'ula siqan bawuya adu'učin bidan-u alačuq-a gürtügei qol-tur siqan bawuya qoninčit quriqačit bidan-u qo'olai-a gürtügei ke'eba
temüjin jamuqa-yin ene üge-yi uqan yadaju sem-iyer bayiju qočorču ne'üri dumda terget güličejü ne'üri bö'et temüjin hö'elün-eke-de jamuqa anda ügülemü a'ula-tur siqan bawuya adu'učin bidan-u alačuq-a gürtügei qol-tur siqan bawuya qoninčit quriqačit bidan-u qo'olai-a gürtügei ke'en ügülemü bi ene üge inu uqan yadaju qari'u inu  ya'u ba
ese ügüleba
bi eke-deče asaqsu ke'en ireba bi ke'eba
hö'elün-eke-yi dongqodu'a üdü'üi-e börte-üjin ügülerün jamuqa anda uyidangqa ke'ekden büle'e
edö'e bidan-ača uyitqu čaq bolba
tuqar-un jamuqa anda-yin keleleksen kelen bida-tur bö'et jesigü üge buyu bida bu bawuya ene gödölükse'er sili'ui-a qaqačan söni dülin gödölüya bö'et ke'eba
119. börte-üjin-ü üge-ber jöbsiyejü ülü bawun söni dülin gödöljü ayisuqui-tur ja'ura mör-tür tayiči'ud-i da'ariba
tayiči'ut ber kökijü mün söni bö'et jöričen jamuqa jük gödölba gü tayiči'ud-un besüd-ün nuntuq-tur niken üčügen kököčü neretü kö'ün-i nuntuq-tur qočoruqsan-i bidan-u'ai abu'at irejü hö'elün-eke-de ökba
hö'elün-eke tejiyeba
120. tere söni dülijü üdür geyi'esü üje'esü jalayir-un qači'un-toqura'un qaraqai-toqura'un qaraldai-toqura'un ede qurban toqura'un aqa-nar de'ü-ner söni dülildüjü ayisun aju'u
basa tarqud-un qada'an daldurqan aqa-nar de'ü-ner tabun tarqut ayisun gü aju'u
basa mönggetü-kiyan-u kö'ün önggür-tan čangsi'ut baya'ud-iyar-ān ayisun gü aju'u
barulas-ača qubilai qudus aqa-nar de'ü-ner ireba
mangqud-ača jetei doqolqu-čerbi aqa de'ü qoyar ireba
bo'orču-yin de'ü ögölen-čerbi arulad-ača qaqačaju aqa-dur-iyan bo'orču-tur neyilen ireba gü jelme-yin de'ü ča'urqan sübe'etei-ba'atur uriangqan-ača qaqačaju jelme-tür neyilen ireba
besüd-eče degei küčügür aqa de'ü qoyar ireba gü suldus-ača čilgütei taki tayiči'udai aqa-nar de'ü-ner  ireba gü jalayir-un seče-domoq arqai-qasar bala qoyar kö'üd-iyer-en ireba gü qongqotan-ača söyiketü-čerbi ireba gü sükeken-ü jegei-qongdaqor-un kö'ün sükegei-je'ün ireba gü ne'üdei čaqa'an-uwa ireba gü olqunu'ud-un kinggiyadai qorolas-ača seči'ür dörben-eče moči-bedü'ün ireba gü ikires-ün butu ende güreget-te yabuqsa'ar ireba gü noyakin-ača jungso ireba gü oronar-ača jirqo'an ireba gü barulas-ača suqu-sečen qaračar kö'ün-lü'e-ben ireba gü basa ba'arin-u qorči üsün-ebügen kökö-čos menen-ba'arin-iyer-en niken güre'en ireba gü 121. qorči irejü ügülerün bodončar boqdo-yin bariju abuqsan eme-deče töreksen ba
jamuqa-lu'a ke'eli niketen keke qaqčatan büle'ei ba
jamuqa-dača ülü qaqačaqun büle'e ba ja'arin irejü nadur nidün-dür-iyen üje'ülba
qo'aqčin üni'en irejü jamuqa-yi horčiju yabuju ger tergen inu mürgüle'et jamuqa-yi mürgüjü öre'ele eber-iyen ququraju soljir ebertü bolju eber minu ača ke'en ke'en jamuqa-yin jük mö'ören mö'ören siro'ai sačun sačun bayimu muqular qo'a hüker yeke gerlüge de'ere ergüjü köljü jitküjü temüjin-ü qoyinača yeke terge'ür-iyer mö'ören mö'ören ayisurun tenggiri qajar eyetüldüjü temüjin-i ulus-un ejen boltuqai ke'en ulus te'ejü abču ayisu ke'en ja'arit nidün-tür üje'üljü nadur ji'amui temüjin či ulus-un ejen bolu'asu namayi ji'aqsan-u tula ker jirqa'ulqu či ke'eba
temüjin ügülerün ünen teyin ulus mede'ülü'esü tümen-ü noyan bolqasu  ke'eba
ele edü törö-yi ji'aqsan gü'ün-ni namayi tümen-ü noyan bolu'asu ya'un jirqalang bui tümen-ü noyan bolqa'at ulus-un qo'as sayit ökit darqalan abqa'ulju qučin ba
emestü bolqa basa ya'u ba
keleleksen-i minu esergü sonos ke'eba
122. qunan teri'üten geniges niken güre'en ireba gü basa dāritai-otčigin niken güre'en ireba gü jadaran-ača mulqalqu ireba gü basa ünjin saqayit niken güre'en ireba gü jamuqa-dača tedüi qaqačan gödölüyet kimurqa-qoroqan-u ayil-qaraqana bawuju büküi-tür basa jamuqa-dača qaqačaju jürkin-ü sorqatu-jürki-yin kö'ün sača-beki taiču qoyar niken güre'en basa nekün-taisi-yin kö'ün qučar-beki niken güre'en basa qutula-qan-u kö'ün altan-otčigin niken güre'en ede basa jamuqa-dača qaqačan gödöljü temüjin-i kimurqa-qoroqan-u ayil-qaraqana-da bawuju büküi-tür neyilen bawuba
tendeče newüjü gürelgü dotora senggür-qoroqan-u qara-jürügen-ü kökö-na'ur bawuba
123. altan qučar sača-beki bürün  eyetüldüjü temüjin-e ügülerün čimayi qan bolqaya temüjin-i qan bolu'asu ba
olon dayin-tur alginči ha'ulju öngge sayin ökin qatun ordo ger qari irgen-ü qačar qo'a qatun öki qarqam sayin aqta qatara'ulju abčiraju öksü ba
oro'a görö'esün abala'asu uturaju öksü ba ke'er-ün görö'esün-ü ke'eli inu niketele siqaju öksü qun-u görö'esün-ü quya inu niketele siqaju öksü ba
qatqulduqui üdür qala činu busi bolqa'asu qari siri-deče qatun eme-deče manu qaqača'ulju qara teri'ü manu qajar kösör-tür gejü ot engke  üdür eye činu ebde'esü eres harad-ača eme kö'üd-eče manu hiriče'üljü eje ügei qajar-a gejü ot edüi üge baralduju eyin aman aldaju temüjin-i činggis-qahan ke'en nereyitčü qan bolqaba
124. činggis-qahan bolu'at bo'orču-yin de'ü ögölei-čerbi qor aqsaba
qači'un-toqura'un qor aqsaba
jetei doqolqu-čerbi aqa de'ü qoyar qor aqsaba
önggür söyiketü-čerbi qada'an-daldurqan qurban ügülerün manaqar-un undān bu megüde'ülsügei üde-yin undān bu osoldasuqai ke'en bawurčin bolba
degei ügülerün silegü irge šülen bolqaju manaqar bu megüdesü qonoq-tur bu qojidasu alaqči'ut qonind-i adu'ulaju alam dü'ürgesü qongqoqči'ut qonind-i adu'ulaju qoton dü'ürgesü qo'olančar mawui büle'e
bi qonint adu'ulaju qonjiyasun idesü bi degei qonint adu'ulaba
de'ü inu güčügür ügülerün čo'orqatai tergen-i či'ü inu bu či'üde'ülsü tenggisgetei tergen-i terge'ür de'ere bu te'üre'ülsü ke'ejü ger tergen doyasu ke'eba
dödei-čerbi ger dotora gergen tutqar-i basa'alasuqai ke'eba
qubilai čilgütei qarqai-toqura'un qurban-ni qasar-lu'a bolun üldüs aqsaju güčürgegün-i güjü'üt anu kinggüritkün omorqaqun-i omori'ut onglajitqun ke'eba
belgütei qaraldai-toqura'un qoyar-i aqta barituqai aqtačin boltuqai ke'eba
tayiči'udai qutu moriči mulqalqu qurban-ni adu'u adūlatuqai ke'eba
arqai-qasar taqai sükegei ča'urqan dörben-ni qola-yin qo'očaq oyira-yin odora boltuqai ke'eba
sübe'etei-ba'adur ügülerün quluqana bolju  quriyaldusu qara keri'e bolju qada'un bügün-i qarmaldusu nembe'e isgei bolju nemürleldün sorisu gerisge isgei bolju ger jük gerisgeleldün sorisu ke'eba
125. tende činggis-qahan qan bolju bo'orču jelme qoyar-a ügülerün ta qoyar namayi se'üder-eče busu nökör ügei-tür se'üder bolju setkil minu amu'ulba je ta setkil-tür aduqai ke'eba
se'ül-eče busu čiču'a ügei-tür se'ül bolju jirüge minu amu'ulba je ta če'eji dotora minu aduqai ke'eba
ta qoyar urida bayiqsa'ar ede bügün-i aqalaju ülü-'ü aqun ta ke'eba
basa činggis-qahan ügülerün tenggiri qajar-a güčü nemejü ihe'ekde'esü ta jamuqa anda-ača namayi ke'en setkijü nököčesü ke'en irekset ötögüs öljeten nököt minu ülü-'ü bolu'ujai ta ke'eba
jük jük tüsiba
tan-i 126. činggis-qahan-ni qan bolqaba ke'en kereyid-ün to'oril-qan-tur daqai sügegei qoyar-i elči ileba
to'oril-qan temüjin kö'ün-i minu qan bolqaqu nai jöb mongqol qa üge'ün ker aqun ta ene eye-ben bu ebdetkün eye janggi-ben bu talutqun jaqa-ban bu tamtulutqun ke'ejü ilejü 127. arqai-qasar ča'urqan qoyar-i jamuqa-tur elči ile'esü jamuqa ügülerün altan qučar qoyar-a ügüle ke'en ügülejü ilerün altan qučar ta qoyar temüjin anda ba qoyar ja'ura anda-yin sübe'e sečijü qabirqa qatquju yekin qaqača'ulba ta 
anda ba qoyar-i ülü qaqača'ulun qamtu büküi-tür temüjin anda-yi qan yekin ese bolqaba
ta edö'e yambar ele setkil setkijü qan  bolqaba
ta altan qučar ta qoyar ügüleksen üges-tür-iyen gürün anda-yin setkil amu'ulju anda-da minu sayiqa-tur gü nököčejü ögütkün ke'ejü ilejü 128. te'ün-ü qoyina jamuqa-yin de'ü taičar jalama-yin ebür-e ölegei-bulaq-a bürün bidan-u sa'ari-ke'er-e bügü joči-darmala-yin adu'un de'ermedüre otču'ui taičar joči-darmala-yin adu'un de'ermetčü abču otču'ui joči-darmala adu'u-ban de'ermetčü ottaju nököd-iyen jürüge yadaqdaju mün joči-darmala nekejü otču söni adu'un-u'an kiji'ar-a gürčü morin-u'an del de'ere helige-ber-iyen kebtejü gürčü taičar-un niru'u inu ququru qarbuju ala'at adu'u-ban abu'at irejü'ü 
129. de'ü-ben taičar-i alaqdaba ke'en jamuqa teri'üten jadaran harban qurban qarin nököčejü qurban tümet bolju ala'u'ut-turqa'ud-iyar dabaju činggis-qahan-tur morilaju ayisai ke'en ikires-eče mülke-totaq boroldai qoyar činggis-qahan-ni gürelgü-de büküi-tür kelen gürgen irejü'üi 
ene kelen mede'et činggis-qahan harban qurban güre'et büle'ei qurban gü tümet bolju jamuqa-yin esergü inu morilaju dalan-baljut bayilduju činggis-qahan jamuqa-da tende gödölgekdejü onon-u jerene-qabčiqai-a qorba
jamuqa ügülerün onon-u jerene-de qorqaba
bida ke'ejü qarirun činos-un kö'üd-i dalan toqo'ot bučalqaju ne'üdei čaqa'an-u'a-yin teri'ü inu hoqtolju morin-u se'ül-tür čirčü otču'ui 130. tende jamuqa-yi tendeče qari'ulu'at uru'ud-un  jürčedei uru'ud-iyan uduridu'at mangqud-un quyuldar mangqud-iyan uduridu'at jamuqa-dača qaqačaju činggis-qahan-tur ireba
qongqotadai mönglik-ečige tende jamuqa-tur aju mönglik-ečige dolo'an kö'üt-lü'e-ben jamuqa-dača qaqačaju tende činggis-qahan-tur neyilen ireba
jamuqa-dača edün irgen ireba ke'en činggis-qahan ör-tür-iyen ulus ireba ke'en bayasču činggis-qahan hö'elün-üjin qasar jürkin-ü sača-beki taiču-tan bolun onan-u tün-tür qurimlaya ke'eldüjü qurimlarun činggis-qahan-na hö'elün-üjin-ne qasar-a sača-beki-de ki'et teri'ülen niken tüsürge tüsürčü'üi basa sača-beki-yin üčü'ügen eke ebegei-yi teri'ülen niken tüsürge tüsürküi-yin tula qorijin-qatun qu'určin-qatun jirin nama ülü teri'ülen ebegei-yi teri'ülen ker tüsürüyü ke'en bawurči siki'ür-i ašgiju'ui ašgikdaju bawurči siki'ür ügülerün yisügei-ba'adur nekün-taisi qoyar-i üküküi-yin tula eyin ašgikdaqui minu ya'un ke'e'et yeke dawu-bar uyilaju'ui 131. tere qurim bidan-ača belgütei jasa'at činggis-qahan-nu aqta bariju bayin büle'e
jürkin-eče büri-bökö tere qurim jasan büle'e
bidan-u kirü'ese-eče qadagidai gü'ün čilbur qulaquqsan-ni qulaqai bariju'ui büri-bökö tere gü'ü-ben hoyimasču belgütei nasuda abaldurun bara'un qanču-ban mültüljü ničügün yabuqu büle'e
teyin mültülüksen ničügün mürü inu büri-bökö üldü-'er qangqas čabčiju'u belgütei teyin čabčiqdaju bö'et ya'un-a ba
ülü bolqan ülü senggeren čisun čuburi'ulju yabuqui-yi činggis-qahan se'üder-tür sa'uju qurim dotorača üjejü qarču  irejü ügülerün ker eyin kikden büle'ei bida keküi-tür belgütei ügülerün mer üdü'üi büle'e
minu tula aqa de'ü-tür mawuqalin bolulča'ujai bi ülü aljaqu bi ila'ari buyu aqa de'ü-tür sayi ijilidülčen büküi-tür aqa bütügei qorumut bayi ke'eba
132. činggis-qahan belgütei tedüi itqa'asu ülü bolun modun-u gesi'üt ququru tatalaju itüges-ün büle'üt suqučiju abču ašgilalduju jürkin-i ilaqču qorijin-qadun qu'určin-qadun jirin-i buliju abuba
jiči müt jokilduya ke'ekdejü qorijin-qadun qu'určin-qadun jirin-i iču'aju jokilduya ke'en elčileldün büküi-tür kitat irgen-ü altan-qan tatar-un megüjin-se'ültü-ten eye-dür-iyen ülü oroqdarun ongging-čingsang-a čeri'üt jasaju bu sa'ara bö'et ke'ejü ilejü'üi 
ongging-čingsang megüjin-se'ültü teri'üten tatar-i ulja ö'ede adu'u ide'en salte türijü ayisi ke'en kelen medeba
tere kelen mede'et 133. činggis-qahan ügülerün erte üdür-eče tatar irgen ebüges ečiges-i baraqsat öšten irgen büle'e
edö'e ene qanalqa-tur qamsaya bida ke'e'et to'oril-qan-tur altan-qan-u ongging-čingsang tatar-un megüjin-se'ültü teri'üten tatar-i ulja ö'ede türijü ayisi ke'emüi ebüges ečiges-i bidan-u baraqsat tatar-i qamsaya bida to'oril-qan ečige öter iretügei ke'en ene kelen gürgen elčin ileba
ene kelen gürge'ülü'et to'oril-qan ügülerün kö'ün minu jöb kelelejü ilejü'ü 
qamsaya bida ke'e'et qutu'ar üdür čerig-iyen či'ulqaju čerik e'üsgejü to'oril-qan öterlen iktünejü činggis-qahan to'oril-qan qoyar jürkin-ü sača-beki  taiču teri'üten jürkin-e kelelejü ilerün erte üdür-eče ebüges ečiges-i bidan-u baraqsat tatar-i edö'e ene qanalqa-tur qamsaya qamtu morilaya ke'ejü ileba
jürkin-e irekdeküi-eče jirqo'an üdüt güličejü yadaju činggis-qahan to'oril-qan qoyar qamtu čerik e'üsčü ulja huru'u ongging-čingsang-lu'a qamsan ayisuqui-tur ulja-yin qusutu-sitü'en naratu-sitü'en-e tatar-un megüjin teri'üten tatar tende qorqa bariju'ui činggis-qahan to'oril-qan qoyar teyin qorqalaqsad-i megüjin-se'ültü-yi qorqan-ača inu bariju megüjin-se'ültü-yi tende alaju mönggün ölegei tanatu könjile inu činggis-qahan tende abula'ai 134. megüjin-se'ültü-yi alaba ke'en činggis-qahan to'oril-qan qoyar ongging-čingsang-un esergü otba ongging-čingsang megüjin-se'ültü-yi alaju'ui ke'en mede'et masi bayasču činggis-qahan-a ja'ut-quri nere ökba
gereyid-ün to'oril-a ong nere tende ökba
ong-qan nere ongging-čingsang-un nereyidükse'er tendeče bolba
ongging-čingsang ügülerün megüjin-se'ültü-yi qamsaju alaqsan tanu altan-qan-a masi yeke tusa kiba
ta ene tusa-yi tanu altan-qan-a öčisü bi činggis-qahan-a e'ün-eče yeke nere nemeküi-yi jeutau nere ökgü-yi altan-qan medetügei ke'eba
ongging-čingsang tendeče tedüi bayasču ičuba
činggis-qahan ong-qan qoyar tende tatar-i da'uliju qubiyalduju abulčaju geyit-tür-iyen qariju bawuba
135. tatar-un qorqalaqsan naratu-sitü'en-e bawuqsan nuntuq-tur talaqui-tur niken üčügen kö'üken-i geksen-i bidan-u  čeri'üt nuntuq-ača olju'ui altan e'emek dörebčitü dasi torqan buluqa'ar dotorlaqsan heligebčitü üčü'ügen kö'üken-i abčiraju činggis-qahan hö'elün-eke-de sauqa ke'en ökba
hö'elün-eke ügülerün sayin gü'ün-ü kö'ün aju'u
 je huja'ur sayitu gü'ün-ü uruq buyu je tabun kö'üd-iyen de'ü jirqodu'ar kö'ün bolqan sikiken-quduqu ke'en nereyitčü eke asaraba
136. činggis-qahan-u a'uruq hariltu-na'ur-a büle'ei a'uru'ut-tur qočoruqsan-i jürkin tabin haran-u qubčan tonoju'ui harban haran-i alaju'ui jürkin-e teyin kikdeba ke'en bidan-u a'uru'ut-tur qočoruqsat činggis-qahan-a ja'abasu ene kelen sonosu'at činggis-qahan masi kilinglaju ügülerün jürkin-ne ker eyin kikden büle'ei bida onan-u tün-tür qurimlaqui-tur bawurči siki'ür-i müt gü ašgiba
belgütei-yin mürü müt gü čabčiba
jokilduya ke'ekdejü qorijin-qadun qu'určin jirin-i iču'aju ökba
bida te'ün-ü qoyina erten-ü öšten kišten ebüges ečiges-i bidan-u baraqsat tatar-i qamsan morilaya ke'en jürkin-i jirqo'an üdüt güličejü ese gü irekdeba
edö'e basa dayisun-tur siqan dayisun müt gü boluyi ke'e'et činggis-qahan jürkin-tür morilaba
jürkin-i kelüren-ü ködö'e-aral-un dolo'an-bolda'ut-ta büküi-tür irgen inu dawuliba
sača-beki taiču qoyar čö'en bes-iyen duta'aba
qoyinača anu nekejü teletü-amasar-a güyičejü sača-beki taiču qoyar-i bariba
bariju činggis-qahan sača taiču qoyar-a ügülerün erte üdür bida ya'u ke'eldüle'ei ke'ekdejü sača taiču qoyar ügülerün ügüleksen üge-dür-iyen ba
ese  gürba
üges-tür manu gürge ke'e'et üges-iyen mederejü tüsijü ökba
üges-i anu medere'üljü üges-tür anu gürgen büte'ejü mün tende geba
137. sača taiču qoyar-i büte'et qariju irejü jürkin-ü irge gödölgeküi-tür jalayir-un telegetü-bayan-u kö'ün gü'ün-u'a čila'un-qayiči jebke qurban tede jürkin-tür aju'ui gü'ün-u'a muqali buqa qoyar kö'üd-iyer-iyen a'uljaju ügülerün bosoqa-yin činu bo'ol boltuqai bosoqa-dača činu bulji'asu borbi inu hoqtol e'üten-nü činu emčü bo'ol boltuqai e'üten-neče činu heyilü'esü eliget anu etkejü getkün ke'ejü ökba
čila'un-qayiči tüngge qasi qoyar kö'üd-iyen basa činggis-qahan-tur a'uljaju ügülerün altan bosoqa činu sakiju atuqai ke'en ökba
bi altan bosoqa-dača činu anggida odu'asu ami inu tasulju getkün örgen e'üten ' ergüjü öktügei ke'en ökba
bi örgen e'üten-neče činu ö'ere odu'asu öre inu miderijü getkün ke'eba
jebke-yi qasar-a ökba
jebke jürkin-ü nuntuq-ača boro'ul neretü üčügen kö'üken-i abčiraju hö'elün-eke-de a'ulčan ökba
138. hö'elün-eke merkid-ün nuntuq-ača oldaqsan güčü neretü kö'üken-i tayiči'ud-un dotora besüd-ün nuntuq-ača oldaqsan kököčü neretü kö'üken-i tatar-un nuntuq-ača oldaqsan sigiken-qutuqu neretü kö'üken-i jürkin-ü nuntuq-ača oldaqsan boro'ul neretü kö'üken-i ede dörben-i ger dotora teji'erün hö'elün-eke kö'üt-te'en üdür üjegü-yin nidün söni sonosqu-yin čikin ken-e bolqaqu-yū ke'en ger dotora teji'eba
139. ede jürkin irgen-ü yosun jürkin bolurun qabul-qan-u dolo'an kö'üd-ün angqa aqa ökin-barqaq büle'e
kö'ün inu sorqatu-jürki büle'e
jürkin bolurun qabul-qan-u kö'üd-ün aqa ke'ejü irgen-ü'en dotorača ilqaju helige-tür sölsütü heregei-tür hončitan a'ušgi dü'üreng jirügetü aman dü'üreng a'urtan ere tutum erdemütten bökös güčüten-i ilqaju ökčü a'urtan sölsütan omoqtan jörkimes tula jürkin ke'ekdegü yosun teyimü teyimün omoqtan irgen-i činggis-qahan dorayita'ulju jürkin oboqtu-yi ülitkeba
irgen-i ulus-i inu činggis-qahan ö'er-ün emčü irgen bolqaba
140. činggis-qahan niken üdür büri-bökö belgütei qoyar-i abaldu'uluya ke'eba
büri-bökö jürkin-tür büle'e
büri-bökö belgütei-yi örö'ele qar-iyar bariju örö'ele köl-iyer töyitčü unaqaju ülü gödölgen daruqu büle'e
büri-bökö ulus-un bökö tende belgütei büri-bökö qoyar-i abaldu'ulba
büri-bökö ülü ilaqdaqu gü'ün unaju ökba
belgütei darun yadan mürüdejü sa'ari de'ere qarču belgütei ginčas kijü činggis-qahan-ni üjegü-lü'e qahan ilügei-iyen ja'uba
belgütei uqa otču de'ere inu aqdalaju qoyar jaqas inu solbin megejilen tataju niru'u inu ebüdüklejü ququlju ileba
büri-bökö niru'u-ban ququraju ügülerün belgütei-ye ülü ilaqdaqu büle'e
bi qahan-nača ayuju arqadan unaqu ariyaqu bolun amin-dur-iyan gürteba
bi ke'e'et üküjü ileba
belgütei niru'u inu ququru tata'at čirčü o'orkiju yorčiba
qabul-qan-u dolo'an kö'üd-ün aqa ökin-barqaq büle'e
uda'adu bartan-ba'atur büle'e
kö'ün inu yisügei-ba'atur büle'e
te'ün-ü uda'adu qutuqtu-möngler büle'e
kö'ün inu büri büle'e
barildu'a bartan-ba'atur-un kö'ün-eče alus barqaq-un omoqtan kö'üt-tür nököčekün bolun büri-bökö ulus-un bökö belgütei-ye niru'u-ban ququldaju üküba
141. te'ün-ü qoyina takiya jil qadagin salji'ut qamtutču qadagin-u baqu-čorogi teri'üten qadagin salji'ud-un čirgidai-ba'atur teri'üten dörben tatar-tur jokilduju dörben-ü qaji'un-beki teri'üten tatar-un alči-tatar-un jalin-buqa teri'üten ikires-ün tüge-maqa teri'üten onggired-un dergek emel alqui-tan qorolas-un čoyoq-čaqa'an teri'üten naiman-ača güčü'üt-naiman-u buyiruq-qan merkid-ün toqto'a-beki-yin kö'ün qutu oyirad-un quduqa-beki tayiči'ud-un tarqutai-kiriltuq qodun-örčeng a'uču-ba'atur-tan tayiči'ut edün qarin alqui-bula'a či'ulju jajiradai jamuqa-yi qa ergüye ke'en ajirqa ge'ün ke'üs čabčilalduju andaqalduju tendeče ergüne-müren huru'u newüjü kan-müren ergüne-de čitququ sina'a-yin a'unu'u-da jamuqa-yi tende gür-qa ergüba
gür-qa ergü'et činggis-qahan ong-qan qoyar-tur morilaya ke'eldüba
morilaya ke'eldüksen-i qorolas-un qoridai činggis-qahan-ni gürelgü-de büküi-tür ene kele gürgejü ilejü'ü 
ene kele ire'ülü'et činggis-qahan ong-qan-tur ene kele gürgejü ile'esü ong-qan kele gürge'ülü'et čerik e'üsčü ötörlen činggis-qahan-tur ong-qan gürčü ireba
142. ong-qan-ni ire'ülü'et činggis-qahan ong-qan qoyar qamtutču jamuqa-yin esergü inu morilaya ke'eldüjü kelüren- müren huru'u morilarun činggis-qahan altan qučar dāritai qurban-i manglai yabu'ulba
ong-qan senggüm jaqa-gambu bilge-beki qurban-i manglai yabu'ulba
ede manglan-ača uruqsi basa qara'ul ilerün enegen-güiletü-de niken sa'urin qara'ul talbiba
te'ün-ü činana čekčer-e niken sa'urin qara'ul talbi'ulba
te'ün-ü činana čiqurqu-da niken sa'urin qara'ul talbi'ulba
bidan-u manglan altan qučar senggüm-tan utkiya gürčü bawuya ke'eldün büküi-tür čiqurqu-da talbiqsan qara'ul-ača gü'ün ha'ulju irejü dayin ayisi ke'en kele gürgen ireba
tere kele ire'et ülü bawun dayin-u esergü kele abuya ke'en yabuju gürülčejü kele abču ket bui ke'en asaqu'asu jamuqa-yin manglan mongqol-ača a'uču-ba'atur naiman-u buyiruq-qan merkid-ün toqto'a-beki-yin kö'ün qutu oyirad-un quduqa-beki ede dörben jamuqa-yin manglan yabuju'ui bidan-u manglan teden-tür ungsilalduju ungsiju jilda boldaju manaqar qatqulduya ke'ejü ičuju qol-tur neyilen qonoba
143. manaqarsi yabu'ulju gürülčejü köyiten bayilduju doroqsi de'eksi iquriqaldun jibsi'erülčen büküi-tür müt buyiruq-qan quduqa qoyar jada medekün aju'ui jadalaqun bolun jada hurbaju müt anu de'ere jada bolju'u müt yabun yadaju nuras-tur quladu'at tenggeri-de ese ta'alaqdaba
bida ke'eldü'et butaraju'ui 144. naiman-u buyiruq-qan altai-yin ebür uluq-taq jorin qaqačan ködöljü'üi 
merkid-ün toqto'a-yin kö'ün qutu selengge jorin ködöljü'üi 
oyirad-un quduqa-beki hoi demečen sisgis  jorin ködöljü'üi 
tayiči'ud-un a'uču-ba'atur onan jorin ködöljü'üi 
jamuqa ö'er-iyen qa ergükset irgen-i dawuli'at ergüne huru'u jamuqa qarin ködöljü'üi 
ani teyin butaraqdaju ong-qan ergüne huru'u jamuqa-yi nekeba
činggis-qahan onan jük tayiči'ud-un a'uču-ba'atur-i nekeba
a'uču-ba'atur ulus-tur-iyan gürü'et ulus-iyan dürbe'ülün ködölge'et a'uču-ba'atur qodun-örčeng tayiči'ut onan-u činaji ete'et hüle'üt turastan čeri'üd-iyen jasaju qatqulduya ke'en jasaju baiju'ui činggis-qahan gürü'et tayiji'ut-lu'a qatqulduba
masi ekerün ekerün qatqulduju jilda boldaju mün qatqulduqsan qajar-a sitüldüjü qonoba
ulus ba
dürbejü ayisurun mün gü tende čeri'üt-lü'e-ben qamtu güre'elejü qonolduba
145. činggis-qahan tere qatquldu'an-tur sujiyasu-ban silürtejü čisun töritge'esü ülü bolun amduriqdarun naran singge'ülün mün tende sitüldüjü bawuju bökleksen čisun-i jelme simin simin ama-'an čisudaju jelme busu gü'ün ülü itegen sakilduju sa'uju söni düli boltala bökleksen čisun-i ama-'ar dü'üreng jalki'at asqa'at söni düli nökči'esü činggis-qahan dotora-'an sergüjü ügülerün čisun haqču baraba
unda'asumu bi ke'eba
tendeče jelme maqalai qudusun de'el qubčasun-iyan bügüde-yi talju qaqča doto'ajitu čurama ničügün sitüldüjü bayiqun dayin dotora'un güyijü činana güreleksen irgen-ü tergen-tür anu unuju esü'üt erijü yadaju dürberün ge'üd-iyen ülü sa'an talbiqsat aju'u
esük olun yadaju niken yeke büri'etei taraq tergen-eče inu abu'at  ergüjü ireba
ja'ura odurun ba
irerün ba
gü'ün-ne ese üjekdeba
tenggeri gü ihe'eba je taraq büri'etü-yi abčirat mün jelme ö'esün gü usun erijü abčiraju taraq ji'ürejü qa'an-a ū'ulba
qurban-ta amuju ūju qahan ügülerün dotora nidün minu geyiba ke'e'et öngdeyijü sa'utala üdür geyijü gegen bolju üje'esü tere sa'uqsan horčin jelme-yin simin simin bökleksen čisun asqaqsan horčin namurqan bolju'u činggis-qahan üjejü ügülerün ene ya'un bolumu qolo asqa'asu yambar aju'u ke'eba
tendeče jelme ügülerün čimayi amduriqdarun qolo odu'asu čima-dača aljiyaqui-ača ayuju ya'araju jalkiqu-yi jalki'at asqaqu-yi asqa'at amduriju ke'eli-tür minu teki kedüi oroba ke'eba
činggis-qahan basa ügülerün namayi eyimü bolju gebten bö'etele ničügün yekin güyijü oroba
či bariqda'asu namayi eyimü-yi ülü-'ü ji'aqu büle'e či ke'eba
jelme ügülerün minu setkil ničügün odurun ker ber bariqda'asu bi dan-tur oroqu duratu büle'e
uqaju bariju alaya ke'en qubčasun minu bügüde-yi talju qaqča emüdün talu'a üdü'üi-e mültüs alda'ulju dan-tur edüi idürejü ireba bi ke'egü büle'e
namayi ünen bolqaju qubčasun nada ökjü asaraqu büle'e
bi morin unu'at üjetele edüi ja'ura ülü-'ü iregü büle'e
bi teyin setkijü qa'an-u hangqaqsan setkil erüssügei ke'en nidün qara eyin setkijü odulu'a bi ke'eba
činggis-qahan ügülerün edö'e ya'un ke'egü erte üdür qurban merkit irejü burqan-ni qurban-da quči'ulqui-tur amin minu niken-te abču qarulu'a či edö'e basa haqču büküi čisun-i ama-'ar siminjü amin minu seng telba
či basa hangqaju amturin büküi-tür amin-niyan örejü dayisun gü'ün-tür nidün qara oroju undān qangqaju amin minu oro'ulba
či ede qurban tusas-i činu setkil dotora minu atuqai ke'en jarliq bolba
146. üdür geyin bara'asu sitüldüjü qonoqsat čeri'üt söni bö'et budaraju'ui güre'elekset irgen küngken ülü čidaqun ke'en güre'elekset qajar-ača ese gödöljü'üi 
dürbekset ulus-i ičuqaya ke'en činggis-qahan qonoqsan qajar-ača morilaju dürbekün irgen-i iču'an yabuqui-tur daba'an de'ere niken hula'an de'eltü eme gü'ün temüjin je ke'en yeke dawu-'ar qayilan uyilan bayiqu-yi činggis-qahan ö'esün sonosču ya'un gü'ün-nü eme teyin qayilan buyu ke'en asa'ura gü'ün ileba
tere gü'ün otču asaqbasu tere eme gü'ün ügülerün sorqan-sira-yin ökin bi qada'an neretei ere-yi minu ende čeri'üt bariju alan buyu ere-yü'en alaqdarun temüjin-i ere-yi minu aburatuqai ke'en ungsiju qayilaju uyilaba
bi ke'eba
tere gü'ün irejü činggis-qa'an-a ene üge ügüle'esü činggis-qahan ene üge sonosu'at qataraju gürčü činggis-qahan qada'an-tur bawuju teberildüba
ere-yi inu bidan-u čeri'üt urida alaju'ui tede irge ičuqa'at činggis-qahan yeke čerik mün tende bawuju qonoba
qada'an-i uriju ire'üljü dergečen sa'ūlba
manaqarsi üdür sorqan-sira jebe qoyar tayiči'ud-un tödöge-yin haran aqsat tede qoyar ber ireba gü činggis-qahan sorqan-sira-yi ügülerün güjühün-deki kündü mudun-i köser-e o'oruqsan jaqa-daki jarbiyal mudun-i jayila'uluqsan  ta ečiges kö'üd-ün tusa aju'ui je ta yekin udaba ta ke'eba
sorqan-sira ügülerün bi dotora-'an bölen itkel setkijü büle'ei yekin ya'araqu bi ya'araju urit ire'esü tayiči'ut noyat minu qočoruqsan eme kö'ün adu'un ide'en-i minu hünesü-'er geyisgekün tede ke'ejü ülü ya'aran edö'e qahan-dur-iyan neyilen idürejü ireba ba ke'eba
kelelen bara'asu jöb ke'eba
147. basa činggis-qahan ügülerün köyiten bayilduju iquriqaldun jibsiyerülčen büküi-tür tede niru'un de'ereče sumun irejü minu jebelegü aman čaqān qula-yin aman niri'u inu ququ ken qarbula'a a'ula de'ereče ke'eba
tere üge-tür jebe ügülerün a'ula de'ereče bi qarbula'a edö'e qa'an-a ükü'ülde'esü halaqan-u tedüi qajar hö'ejü qočorsu soyurqaqda'asu qa'an-u emüne če'el usun-i hoqtoru čeügen čilawun čeürü dobtulju öksü gür ke'eksen qajar-a kökö gürü ke'ürü qal ke'eksen-tür qara gürü qamqaru dobtulju öksü ke'eba
činggis-qahan ügülerün dayisun yabuqsan gü'ün alaqsan-iyan dayisurqaqsan-iyan beye-'en ni'uju kele-ben bučaju ayuyu ene bürün ke'esü munda alaqsan-iyan dayisurqaqsan-iyan ülü buča? munda ji'an buyu nököčeltü gü'ün buyu jirqo'adai neretü aju'u
mün jebelegü aman čaqān qula-yi minu aman niru'u qarbuqsan-u tula jebe nereyitčü jebeleye imayi ke'en jebe nereyitčü dergede minu yabu ke'en jarliq bolba
jebe tayiči'ud-ača irejü nököčeksen yosun teyimü 148. činggis-qahan tende tayiči'ud-i dawuliju tayiči'utai yasutu gü'ün-i a'uču-ba'atur qoton-örčeng qudu'udar-tan  tayiči'ud-i uruq-un uruq-a gürtele hünesü-'er keyisgen kiduba
ulus irgen-i anu gödölgejü irejü činggis-qahan quba-qaya übüljeba
149. ničügüt-ba'arin-u sirgü'etü-ebügen alaq naya'a kö'üt-lü'e-ben tayiči'ud-un noyan tarqutai-kiriltuq hoilaju büküi-yi öštü gü'ün büle'e ke'en morilan ülü čidaqu tarqutai-yi bariju tergen-tür unu'ulju sirgü'etü-ebügen alaq naya'a kö'üt-lü'e-ben tarqutai-kiriltug-i bariju ayisuqui-tur tarqutai-kiriltuq-un kö'üt de'ü-ner inu buliju abuya ke'en güyičejü irejü'üi 
kö'üt de'ü-ner-i inu güyičejü ireküi-lü'e sirgü'etü-ebügen bosun yadaqu tarqutai-yi tergen de'ere unuju gedergü de'ere inu aqtalan sa'uju kituqai qarqaju ügülerün kö'ün de'ü-ner činu čimayi buliju abura ireba
čimayi qan-iyan qardaba ke'en ese teki ala'asu qan-iyan qardaba ke'en alaqu gü ala'asu teki mün gü alaqdaqu gü bi mün ele üküküi-dür-iyen dere abun üküsü ke'e'et aqtalaju yeke kituqai-iyar-ān qo'olai inu ququlura gürküi-tür tarqutai-kiriltuq yeke dawu-'ar de'ü-ner kö'üd-iyen qailaju kelelerün sirgü'etü namayi alan buyu alan bara'asu üküksen amin ügei beye minu abču otču yeki'üjei ta namayi ala'ai üdü'üi-e öter qaritqun temüjin namayi ülü alaqu temüjin-i üčügen čaq-tur nidün-dür-iyen qaltu ni'ur-dur-iyan geretü büle'e ke'en ejen ügei nuntuq-tur qočorču amui ke'en abura otču abčiraju surqa'asu surqu metü buyu ke'en sonin üri'e da'aqan surqaqu metü surqan söyin yabula'a ükü'ülsü ke'esü ükü'ülün  yadaqu-yū büle'e
bi edö'e oyi inu oroju amu setkil inu sengterejü amu ke'ekdemüi temüjin namayi ülü ükü'ülgü ta kö'üt de'ü-ner minu öter qaritqun sirgü'etü namayi alaju ile'üjei ke'en yeke dawu-'ar qailaba
kö'üt de'ü-ner inu ügüleldürün ečige-yin amin inu aburaya ke'en ireba
bida sirgü'etü amin inu ükü'ülün bara'asu qo'osun amin ügei beye inu yekikün bida munda ala'ai üdü'üi-e öter qariya ke'eldüjü qariba
teden-i ireküi-tür alaq naya'a-tan sirgü'etü-ebügen-ü kö'üt inu heyilükset ireba
teden-i ire'ülü'et gödöljü ayisurun ja'ura qutuqul-nu'u-da gürü'esü tende naya'a ügülerün bida ene tarqutai-yi bariju gürü'esü činggis-qahan bidan-i tus qan-iyan qardaju irejü'üi 
ke'en činggis-qahan bidan-i tus-iyan qardaju irekset ya'un itegelten haran ede bidan-tur basa ker nököčekün nököčel üge'ün haran tus qan-iyan qardaqsat haran-i mököri'üldekün ke'ejü mököri'üldegün-ü'ü bida munda tarqutai-yi endeče talbiju ilejü bida beyes-iyen činggis-qahan-a güčü ögüre ireba
ba ke'ejü oduya tarqutai-yi bariju-ayisula'ai tus qan-iyan tebčin yadaju üje'et ker ükü'ülkün ke'ejü talbiju ilejü ba
büsiren güčü öksü ke'en ireba
ba ke'eye ke'eba
naya'a-yin ene üge ečiges kö'üt jöbsiyeldüjü tarqutai-kiriltug-i quduqul-nu'u-dača talbiju ilejü müt sirgü'etü-ebügen alaq naya'a kö'üt-lü'e-ben ire'esü yekin irejü ke'eba
sirgü'etü-ebügen činggis-qahan-a ügülerün tarqutai-kiriltug-i bariju ayisurun jiči tus qan-iyan üje'et ker ükü'ülküi ke'ejü tebčin yadaju talbiju ilejü činggis- qahan-na güčü öksü ke'en ireba ke'eba
te'ün-tür činggis-qahan ügülerün qan-iyan tarqutai-yi qardaju irekset bö'esü tus qan-iyan qardaqsat haran-i tan-i urug-iyar mököri'üldekün büle'e
ta tus qan-iyan tebčin yadaqsan setkil tanu jöb bui ke'en naya'a-yi soyurqaba
150. te'ün-ü qoyina činggis-qahan-tur kereyid-ün jaqa-gambu tersüt-te büküi-tür nököčere ireba
tere ireksen-tür merkit qatquldura ire'esü činggis-qahan jaqa-gambu ki'et qatqulduju iču'aba
tende tümen-tübegen olon-dongqayit butaraqsan kereyit irgen ber činggis-qahan-tur oroju ire'üle'ei kereyid-ün ong-qahan bürün urida yisügei-qa'an-u čaq-tur sayi-bar el alduqsan-tur yisügei-qan-lu'a anda ke'eldüksen aju'u
anda ke'eldüküi yosun inu ong-qan ečige-yü'en qurčaqus-buyiruq-qan-u de'ü-ner-iyen alaqu-yin tula gür-qan abaqa-lu'a-ban bulqa bolulčaju qara'un-qabčal sirqu'uldaju ja'un gü'ün qarču yisügei-qan-tur ire'esü yisügei-qan imayi ö'er-dür-iyen irekdejü ö'esün čerik morilaju gür-qan-i qasin jük hüldejü irge orqa inu ong-qan-na abču ögüksen-ü tula anda bolulčaqu tere 151. te'ün-ü qoyina ong-qan-nu de'ü erke-qara ong-qan aqa-da'an alaqdarun buru'utču otču naiman-u inanča-qan-tur oroju'ui inanča-qan čeri'üt ileju jiči ong-qan qurban balaqat bitün yorčiju qara-kidad-un gür-qan-tur oduqsan aju'u
tendeče bulqa bolun uyiqud-un tangqud-un balaqat da'ari'at tabun ima'at sirgü'elejü sa'alduju teme'en-ü čisun qanaju ide'et  yadaju güse'ür-na'ur-a ire'esü činggis-qahan uridu yisügei-qan-lu'a anda ke'eldüksen yosu-'ar taqai-ba'atur sükegei-je'ün qoyar-i elči ile'et kelüren-ü teri'ün-eče činggis-qahan ö'esün esergü otču ölösčü turuju ireba ke'en ong-qan-a qubčiri qubčiju ökčü güre'en dotora oro'ulju teji'eba
tere übül jerge-'er newüjü činggis-qahan quba-qaya-yi übüljeba
152. tende ong-qan-nu de'ü-ner noyat ki'et ügüleldürün ene qan aqa bidan-u üge'ü aburitu hümegei helige ebüritčü yabuyu aqa de'ü-yi baraba
qara-kidat-tur ba
oroba gü ulus ba
joba'amu edö'e e'ün-i ker kikün bida erde üdür ke'esü dolo'an nasutu-yi merkit irgen dawuliju otču qara alaq esige daqu emüsgejü selengge-yin bu'ura-ke'er-e merkid-ün a'ur nödübe gü qurčaqus-buyiruq-qan ečige inu jiči merkit irge ha'ulju kö'ü-ben tende aburaju ire'esü basa tatar-un ajai-qan harban qurban nasutu-yi eke selte basa dawuliju otču teme'ed-iyen adūla'ulun yabuqui-tur ajai-qan-u qoniči abu'at horquju ireba je basa te'ün-ü qoyina naiman-ača ayuju buru'utču sarta'ul-un qajar-a čui-müren-e qara-kidad-un gür-qan-tur otba je tende niken hon ülü da'usun jiči dayijin gödöljü ui'ud-un tang'ud-un qajar-iyar bitüjü yaburun yadaju tabun ima'at sirgü'elejü sa'aju teme'en-ü čisun qanaju idejü qaqča soqor qali'un moritu yadaju temüjin kö'ün-tür ire'esü qubčiri qubčiju teji'eba je edö'e temüjin kö'ün-tür teyin yabuqsan-iyan umartaju hümegei helige ebüritčü yabumu ker kikün bida ke'eldüba
eyin ügüleldüksen  üges-i altun-ašuq ong-qan-a ayilatqaju'u
altun-ašuq ügülerün bi ber ene eye-tür oroldula'a gü jiči qan-iyan čimayi tebčin yadaba ke'ejü tende ong-qan eyin ügüleldükset el-qutur qulbari alin-taisi-tan de'ü-ner-iyen noyad-iyan bari'ulju'ui de'ü-ner-eče jaqa-gambu buru'utču naiman-tur oroju'u teden-i bari'as selte ger-tür oro'ulju ong-qan ügülerün bida ui'ud-un tang'ud-un qajar-iyar ayisuqui-tur ya'u ke'eldüle'ei tanu metü ya'u setkigü bi ke'et ni'ur-tur anu nilbuju bari'as anu talbi'ulba
qan-a ele nilbuqdaju ger-tür bükün haran bügüde-'er bosču nilbuju'ui 
153. tere übül übüljejü noqai jil namur inu činggis-qahan ča'a'an-tatar alči-tatar duta'ut-tatar aluqai-tatar tede tatar-tur dalan-nemürges bayilduju qatqulduqui-yin urida činggis-qahan jasaq ügüleldürun dayisun gü'ü daru'asu olja-tur bu bayiya darun bara'asu tere olja bidan-u'ai bui je qubiyaldut je bida nökör gü'ün-e iču'aqda'asu türün-ü dobtuluqsan qajar-tur-iyan eke'erüya türün-ü dobtulqan-tur ese eke'erüksen gü'ün-i mököri'ülüya ke'en jasaqlalduba
dalan-nemürges qatqulduju tatar-i gödölgeba
daruju ulqui-silügeljit-te ulus-tur anu neyile'üljü dawuliba
čaqān-tatar alči-tatar duta'ut-tatar aluqai-tatar erkit irge tende muqutqaju jasaq ügüleldüksen üges-tür altan qučar dāritai qurban üges-tür ülü gürün olja-tur bayiju'ui üges-tür ese gürba ke'en jebe qubilai qoyar-i ilejü oljalaqsat adu'un ya'u ke abuqsad-i bügüde-yi abqa'ulba
154. tatar-i muqutqaju daulin baraju ulus irgen anu ker kikün ke'en činggis-qahan yeke eye uruk-iyar-iyan qaqča ger-tür oroju eyetüldüba
eyetüldürün erde üdür-eče tatar irgen ebüges ečiges-i baraqsan büle'e
ebüges ečiges-ün ösöl ösöjü kisal kisaju či'ün-tür ülijü kiduju alaju ögüya ülittele kiduya hüleksed-i bo'oliduya jük jük qubiyalduya ke'en eye baralduju ger-teče qaru'asu tatar-un yeke-čeren belgütei-eče yambar eye eyetüldüba ke'en asaqju'u belgütei ügülerün tan-i bügüde-yi či'ün-tür ülijü kiduya ke'eldüba ke'ejü'ü 
belgütei-yin ene üge-tür yeke-čeren tatar-dur-iyan tungqaq talbiju qorqaqlaju'u
qorqaqsat tatar-tur bidan-u čeri'üt e'erekün bolun masi samsiju'u qorqalaqsat tatar-i joboju oro'ulju ülütken či'ün-tür ülijü kiduqui-tur tatar ügüleldürün gü'ün tutum qančun-dur-iyan kituqai qančulaju dere abun üküye ke'eldüjü basa masi gü samsiju'u tedüi tatar-i či'ün-tür ülijü kidun baraju tende činggis-qahan jarliq bolurun bida uruk-iyar-iyan yeke eye baralduqsan-i belgütei-yin ja'aqu-yin tula bidan-u čeri'üt masi samsiyaba
e'ün-ü qoyina yeke eye-tür belgütei bu orotuqai eye baratala qadana bügün-i jasatuqai jasa'at kere'ür-i qulaqai qudal üyileten-i jarqulatuqai eye bara'asu ötök ūqsan-u qoyina belgütei da'aritai qoyar tende orotuqai ke'en jarliq bolba
155. tende tatar-un yeke-čeren-ü ökin yisügen-qatun-i činggis-qahan tende abba
ta'alaqdarun yisügen-qadun ügülerün qahan soyurqa'asu namayi gü'ün-e bodo-da bolqaju asa ramu nadača egeči yisüi neretei nadača de'ere qan gü'ün-e jokiqui aji'ai je sayi güregen güregelen büligi edö'e maqa ene bodulqan-tur qa'aqsi yorčibi ke'ebi ene üge-tür činggis-qahan ügülerün egeči činu čima-dača sayin büksen bö'esü eri'ülüye egeči-yen ire'esü jayilaju ökgü-yü či ke'eba
yisügen-qadun ügülerün qahan soyurqa'asu egeči-yen ele üje'esü egeči-de'en jayilasu ke'eba
ene üge-tür činggis-qahan jarliq tungqa'aju eri'ülü'esü ökteksen güregen-lü'e qamtu hoilaju yabuqu-yi bidan-u čeri'üt jolqaju'ui ere inu tuta'aju'u
yisüi-qatun-i tende abčiraba
yisügen-qadun egeči-yen üje'et urida ügüleksen üge-tür gürün bosču sa'uqsan sa'urin-dur-iyan sa'ūlju mün ö'esün dōro sa'ubi yisügen-qatun-u üge-tür adali boldaju činggis-qahan oyin-dur-iyan oro'ulju yisüi-qatun-i abču jerge-tür sa'ūlba
156. tatar irgen-i daulin baraju niken üdür činggis-qahan qadā sa'uju undālaldurun yisüi-qadun yisügen-qadun jirin-ü dumda sa'uju undālaldun büküi-tür yisüi-qadun yeke-de sewürelbi tende činggis-qahan dotora-'an setkijü bo'orču muqali-tan noyad-i uriju ire'üljü ügülerün ta ede ele či'uluqsat haran bügüde-'er ayimaq ayimaq bayitqun ö'er-eče busu ayimaq-un gü'ün-i ö'ere böldeyitketkün ke'en jarliq bolba
tedüi ayimaq ayimak-iyar-iyan bayi'asu niken jala'ui sayin gürümele gü'ün ayima'ud-ača ö'ere bayiba
či ya'un gü'ün bui ke'esü tere gü'ün ügülerün tatar-un yeke-čeren-ü yisüi neretei ökin ökdeksen güregen gü'ün büle'e
bi dayisun-a dawuliqdarun ayuju buru'utču  yabuju edö'e amurliba je ke'en irejü olon haran dotora ya'u taniqdaqu ke'ejü yabula'a ke'eba
ene üge-yi činggis-qa'an-a öči'esü jarliq bolurun mün gü dayisu setkijü o'orčaq bolju yabuju'u edö'e ya'u görüre irejü'ü 
inu metüs-i či'ün-tür üliba
ya'u sa'aramui nidün-ü ečine getkün ke'eba
tedüi gü mököri'ülba
157. mün noqai jil činggis-qahan-ni tatar irgen-tür morilaqsan-tur ong-qan merkit irgen-tür morilaju toqto'a-beki-yi barqujin-töküm jük hüldejü toqto'a-yin yeke kö'ün tögüs-beki-yi alaju toqto'a-yin qutuqtai ča'alun jirin ökit inu qatut inu abču qutu čila'un qoyar kö'üd-i inu irge selte dawuliju činggis-qa'an-a ya'u ber ese ökba
158. te'ün-ü qoyina činggis-qahan ong-qan qoyar naiman-u güčügüd-ün buyiruq-qan-tur morilaju uluq-taq-un soqoq-usun-a büküi-tür gürčü buyiruq-qan bayildun yadaju altai daban gödölba
soqoq-usun-ača buyiruq-qan-ni nekejü altai daba'ulun qum-singgir-un ürünggü huru'u hüldejü yabuqui-tur yedi-tubluq neretü noyan inu qara'ul yabuju bidan-u qara'ul-a hüldekdejü a'ula ö'ede tuta'aqu bolun olang-niyan tasuraqdaju tende bariqdalu'a ürünggü huru'u hülde'et kisil-baš-na'ur-a güyičejü buyiruq-qan-ni tende muqutqaba
159. tendeče činggis-qahan ong-qan qoyar qariju ayisuqui-tur naiman-u qatqulduqči kökse'ü-sabraq bayidaraq-belčir-e čerik jasaju qatqulduqu bolun aju'u
činggis-qahan ong-qan  qoyar qatqulduya ke'en čerik jasaju gürčü jilda boldaju manaqaru qatqulduya ke'en jerge-'er qonoba
tende ong-qan bayidal-dur-iyan qal-nu'ut tüle'üljü söni bö'et qara-se'ül ö'ede gödöljü'üi 
160. tende jamuqa ong-qan-lu'a qamtu gödölülčejü yaburun ong-qan-a jamuqa ügülerün temüjin anda minu uridača naiman-tur elčitü büle'e
edö'e ese ireba
qan qan aqu qayiruqana bi buyu je ajiraqu bildü'ür anda minu buyu naiman-tur otču'ui je oroqu bolun qočorba ke'ejü'üi 
jamuqa-yin tere üge-tür ubčiqtai gürin-ba'atur ügülerün jusuritču yekin teyin sili'un aqa de'ü-yü'en ulkin jingkün ügüleyü ke'eba
161. činggis-qahan söni mün tende qonoju qatqulduya ke'en manaqar erde üdür geyi'ülün ong-qan-nu bayidal-tur üje'esü ügei boldaju ede či bidan-i tülesilen aju'u
ke'et tendeče činggis-qahan gödöljü eder-altai-yin belčir-iyer ketüljü tere gödölükseyer gödöljü sa'ari-ke'er bawuba
tendeče činggis-qahan qasar qoyar naiman-u tubu'ud-i uqaju haran-a ese to'olāi 162. kökse'ü-sabraq ong-qan-u qoyinača nekejü senggüm-ün eme kö'ü irge orqa selte dawuliju abču ong-qan-u telegetü-amasar-a bükün jarimut irge adu'un ide'e dawuliju abu'at qariju'ui tere so'or-tur merkid-ün toqto'a-yin qutu čila'un qoyar kö'üt tende bürün irge-ben abu'at qaqačaju ečige-dür-iyen neyilen selengge huru'u gödöljü'üi 
163. köksegü-sabraq-a dawuliqdaju ong-qan činggis-qahan-tur elči ilejü'üi 
elči ilerün naiman-a irge orqo-ban eme  kö'ü-ben dawuliqdaba
bi kö'ün-neče-'en dörben külü'üd-i činu quyuju ileba
bi irge orqo minu aburaju öktügei ke'ejü ilejü'üi 
činggis-qahan tende bo'orču muqali boroqul čila'un-ba'atur ede dörben külü'üd-iyen čerik jasaju ileba
ede dörben külü'üd-i gürküi-yin urida hula'an-qut-da senggüm bayilduqu bolun morin-u'an quya qaqdaju abdaqu bolju büküi-tür ede dörben külü'üt gürčü abura'at irge orqa eme kö'ü bügüde-yi aburaju ökba
tende ong-qan ügülerün erde sayin ečige-de inu ene metü odun baraqsan u'lus-iyan aburaju öktele'e edö'e basa kö'ün-ü'en odun baraqsan ulus-i minu dörben külü'üd-iyen ilejü aburaju ökteba
hači qari'ulqu-yi tenggeri qajar-un ihe'el medetügei ke'eba
164. basa ong-qan ügülerün yisügei-ba'atur anda minu odun baraqsan ulus minu niken-te aburaju ökba
temüjin kö'ün basa oduqsan ulus minu aburaju'u ökba
ede ečige kö'ün qoyar odun baraqsan ulus nada quriyaju ögürün ken-ü emüne quriyaju ögün jobomui bi ber edö'e ötölba
namayi ötöljü ündüt-te qaru'asu qa'učitba
bi qa'učitču qaldut-ta qaru'asu qamuq ulus ken medegü de'ü-ner minu aburi ügei'ün bui qaqča kö'ün minu ügei sitü senggüm qaqča buyu temüjin kö'ün-i senggüm-ün aqa bolqaju qoyar kö'ütü bolju amusuqai ke'ejü činggis-qahan-lu'a ong-qan tu'ula-yin qara tün-na quriju ečige kö'ü ke'eldüba
ečige kö'ün ke'eldüküi yosun urida erte üdür yisügei-qan ečige-lü'e ong-qan anda ke'eldüksen yosu-'ar ečige metü ke'ejü ečige  kö'ün ke'eldüküi yosu teyimü üge ügüleldürün olon dayisun-tur ha'ulurun qamtu niken-e ha'uluya oro'a görögesün-tür abalarun niken-e gü qamtu abalaya ke'eldüba
basa činggis-qahan ong-qan qoyar ügüleldürün bida qoyar-i nayidaju südütü moqai-a södürte'esü södürgen-tür bu oroya südü-'er ama-'ar ügüleldüjü büsireya ara'atu moqai-a adarda'asu adarqan-i inu bu abulčaya ama-'ar kele-'er olulčaju büsireye ke'en teyin üge baralduju amara'alin alduba
165. amaraq de'ere dabqur amaraq boluya ke'en činggis-qahan setkijü joči-de senggüm-ün döyi ča'ur-beki-yi quyirun senggüm-ün kö'ün tusaqa-da bidan-u qojin-beki-yi araljin ögüye ke'en quyi'asu tende senggüm ö'er-iyen yekejilen setkijü ügülerün bidan-u uruq andur odu'asu ala'un-a bayiju e'enekče qoyimar qaraqu aju'u
anu uruq bidan-tur ire'esü qoyimar-a sa'uju ala'un-a qaran aju'u ke'en ö'er-iyen yekejilen setkijü bidan-i doromjilan ügülejü ča'ur-beki-yi ülü ögün ese ta'alaju'ui tere üge-tür činggis-qahan dotora-'an ong-qan nilqa-senggüm qoyar-tur dura qočorču'u 166. teyin dura qočoruqsan-i jamuqa uqaju qaqai jil qabur jamuqa altan qučar qardakidai ebügejin noyakin söge'etei to'oril qači'un-beki tede bolun niken eyeten bolju newüjü otču jeje'er-ündür-ün gerü-de berke-elet-te nilqa-senggüm-tür otču jamuqa ulgin ügülerün temüjin anda minu naiman-u tayang-qan-tur keletü elčitü buyu aman inu ečige kö'ü ke'ejü amu  aburi inu ö'ere buyu itegejü'ü 
amui ta ese nende'esü tan-a ya'u bolqu temüjin anda-tur morila'asu bi köndelen-eče oroldusu ke'ejü'üi 
altan qučar qoyar ügülerün ba
hö'elün-eke-yin kö'ün-i aqa-yi alaju de'ü-yi tebčijü öksügei ke'ejü'üi 
ebügejin noyakin qarta'at ügülerün qar inu qardaju köl inu köldejü öksügei ke'ejü'üi 
to'oril ügülerün arqa-ča otču temüjin-i ulus inu abuya ulus-iyan abda'asu ulus ügei'ü bolu'asu yekikün tede ke'ejü'üi 
qači'un-beki ügülerün nilqa-senggüm kö'ün čimayi ya'u setki'esü urtu-yin üjü'ür-e gün-ü hira'ur-a gürülčesü ke'ejü 167. ede üges ügülekdejü nilqa-senggüm ečige-dür-iyen ong-qan-tur tede'er üges sayiqan-töde'en-iyer ügülejü ilejü'üi 
ede'er üges ügülekdejü ong-qan ügülerün kö'ün-i minu temüjin-tür yekin teyin setkin buyu ta eji'e turuq ima-'ar-i bolju bö'et edö'e kö'ün-tür minu teyin mawui setki'esü tenggeri-de ülü ta'alaqdaqun bida jamuqa yabudaq keletü büle'e
jöb-ü'ü tab-u'u ügülen buyu ke'en ese ta'alaju ilejü'üi 
basa senggüm ügülejü ilerün amatu keletü gü'ün ügülen bö'etele yekin ülü büsirekdegü ke'en jiči quči ügülejü ile'et yadaju ö'esün be'en gedün otču ügülerün bel čimayi edüi büküi čaq-tur bidan-i ya'un-a ber ülü bolqan buyu ünen ber qan ečige-yen čimayi čaqa'an-a sača'asu qara-da qaqa'asu qurčaqus-buyiruq-qan ečige-yin činu joban edüi quriyaju aqsan ulus-i činu man-a 'ū mede'ülgü ken-e ber yekin mede'ülgü ke'ejü'üi 
tere üge-tür ong-qan ügülerün čaqa-yan kö'ü-ben ker tebčigü eji'e turuq ima-'ar-i bolju mawui  setki'esü jokiqu-yū tenggeri-de ülü ta'alaqdaqun bida ke'ejü'üi 
tere üge-tür kö'ün inu nilqa-senggüm mawuilaju e'üten o'orču qarču'u jiči kö'ün-ü'en senggüm-ün duran qayiralaju uriju ire'üljü ong-qan ügülerün tenggeri-de maqa ta'alaqdaqun-ū bida kö'ün-i ker tebčisü ke'emüi ta čidan ele üyiledütkün ta medetkün ke'ejü'üi 
168. tendeče senggüm ügülerün müt-lü bidan-u ča'ur-beki-yi quyu büle'e
edö'e bu'uljar idere iretkün ke'en üdür boljaju uriju ire'üljü tende bariya ke'eldüjü je ke'en eye baralduju ča'ur-beki-yi ögüye bu'uljar idere iretkün ke'en ileba
uriqdaju činggis-qahan harban haran ayisurun ja'ura mönglik-ečige-yin ger-tür qono'asu tende mönglik-ečige ügülerün ča'ur-beki-yi quyu'asu müt-lü bidan-i doromjilaju ülü ögün büle'e
edö'e ker buru'uya bu'uljar idere uriju'u ö'ed-iyen yekejilekün haran buru'uya yekin öksü ke'en uriqun büle'ei jöb-ü'ü tab-u'u setkil bui kö'ün uqaju otdaqu qabur bolba
adu'un bidan-u turuqat bui adu'u-ban teji'eye ke'en siltaju ileye ke'ejü ülü odun buqatai kiratai qoyar-i bu'uljar idetkün ke'ejü ilejü činggis-qahan mönglik-ečige-yin ger-teče qariba
buqatai kiratai qoyar-i gürküi-lü'e serekdeba
bida manaqar erte büčijü bariya ke'eldüba
169. teyin büčijü bariya ke'en üge baralduqsan-i altan-u de'ü yeke-čeren ger-dür-iyen irejü ügülerün manaqar erde temüjin-i bariya ke'eldüba
ene üge-yi temüjin-e kelen gürgen  otqu gü'ün-i yambar ele bolqaqdayu ke'ejü'üi 
teyin ügüleküi-tür eme inu alaq-it ügülerün tere deleme üge činu ya'un bolumui haran ba
ünemsige'üjei ke'ejü'üi 
teyin keleleküi-tür adu'uči inu badai sün gürgere irejü ene üge-yi sonosču qariba
badai yorčiju nökör adu'uči kisiliq-a čeren-ü ügüleksen üges ügülejü'ü 
kisiliq ügülerün bi basa otču uqasuqai ke'ejü ger-tür otču'ui čeren-ü kö'ün narin-ke'en qadā sa'uju sumud-iyan hürün sa'uju ügülerün tuqar bida ya'u ke'eldüle'ei kele-ben abdaqun ken-ü ama itqaqun ke'ejü'üi 
teyin ke'et narin-ke'en basa adūči-da'an kisiliq-a ügülerün merkidei-čaqa'an aman-čaqa'an-ke'er qoyar-i bariju abčira huyaju söni erte morilaqu ke'ejü'üi 
kisiliq yorčiju badai-ya ügülerün tuqar-un kelen činu bolqa'aba
maqat bolba
edö'e bida qoyar temüjin-e kelen gürgen yorčiya ke'en üge baralduju merkidei-čaqa'an aman-čaqa'an-ke'er qoyar-i bariju irejü huyaju üdesi bü'et qoš-dur-iyan niken quriqa-ban alaju iseri-yer-en bolqaju merkidei-čaqa'an aman-čaqa'an-ke'er qoyar belen huyaqsad-i unuju söni-de yorčiju činggis-qahan-tur söni gürčü ger-ün ümereče badai kisiliq qoyar ügülerün yeke-čeren-ü ügüleksen üges kö'ün-i inu narin-ke'en-nü sumud-iyan hürün sa'uju ügüleksen-i merkidei-čaqa'an aman-čaqa'an-ke'er qoyar aqtas bariju huya ke'eksen üges bügüde-yi ügülejü ökba
basa badai kisiliq qoyar ügülerün činggis-qa'an-i soyurqa'asu ariyal ügei bui büčijü bariya ke'en üge baralduba ke'eba
170. teyin ügülekdejü činggis-qahan badai kisiliq qoyar- un üges büsirejü söni bö'et dergede'ün bükün itegelten-e kelen ki'et könggelen ya'u ke-ben ge'et burūilan söni bö'et gödölba
mau-ündür-ün gerü-'er gödölürün mau-ündür-ün gerü-de uriangqadai jelme-qo'a-yi itegejü qoyina-'an čaqdu'ulsun bolqan qara'ulsun talbiju gödöljü tere gödölükse'er manaqarsi üdür düli naran kebeli'ülün qalaqaljit-elet gürčü üderin ba'uba
üderitčü büküi-tür alčidai-yin aqtas adu'ula'ulsun čigidei yadir jüyil-e jüyil-e noqo'an-tur aqtas-iyan adu'ulan yabuqui-tur qoyinača mau-ündür-ün ebür-iyer hula'an-buruqat  da'arin ayisuqui dayin-u to'usun-i üjejü dayin gürba ke'ejü aqtas-iyan hülde'et irejü dayin gürba ke'ekdejü üje'esü mau-ündür-ün ebür-iyer hula'an-buruqat  da'arin to'osun qarqaju ong-qan tere nekejü ayisun aju'ui ke'ejü tendeče činggis-qahan to'osun üje'et aqtas-iyan bari'ulu'at ača'alaju morilaba
tedüi ese üje'esü genet büle'ei tere ayisuqui-tur jamuqa ong-qan-lu'a qamtu ayisulčaju ayisun aju'ui tende ong-qan jamuqa-dača asaqču'u temüjin kö'ün-tür qatqulduqun metüs ket bui ke'en asaqču'u jamuqa ügülerün tende uru'ut mangqut ke'en irgen inu bui tede irgen inu qatquldumui je to'oriqui tutum toyi jokiyu derelgü gü tutum dem jokiyu üčügen-eče üldü jida-tur daduqsan irgen tede qaraqči'ut alaqči'ut tuqtan bui tede serelten irgen bui je ke'ejü'üi 
tere üge-tür ong-qan ügülerün teyin bö'esü bida teden-tür jirgin-ba'atud-iyan qadag-i tusiyaldun jirgin-ba'atud-iyan dobtulqaya jirgin-ü gejige tümen-tübegen-ü ačiq-sirun-i  dobtulqaya tübegen-ü gejige olon-dongqayit ba'atud-i dobtulqaya dongqayid-un gejige ong-qan-u minqan turqa'ud-i uduridun qori-silemün-taisi dobtulduqai minqan turqa'ud-un gejige bida yeke qol dobtulai je ke'ejü'üi 
basa ong-qan ügülerün jamuqa de'ü bidan-u čerik či jasa ke'ejü'üi 
tere üge-tür jamuqa öre böldeyitčü qarču nököd-e'en ügülerün ong-qan ene čerig-iyen namayi jasa ke'emü anda-tur bi qatquldun yadan yabulu'a ene čerik namayi jasa ke'emüi ong-qan dület nadača činaru aju'u
čaqtu nökör buyu anda-tur kele oro'uluya anda qada'učituqai ke'ejü jamuqa doro'un činggis-qahan-tur kele oro'ulju ügülejü ilerün ong-qan nadača asaqba
temüjin kö'ün-tür qatqulduqun metüs ket bui ke'en asaqu'asu bi ügülerün uru'ut mangqud-i tumbulan ügüleba
bi minu üge-tür müt jirgin-iyen tumbulaju manglailan jasalduba
jirgin-ü gejige tümen-tübegen-ü ačiq-sirun-i ke'eldüba
tübegen-ü gejige olon-dongqayid-i ke'eldüba dongqayid-un gejige ong-qan-nu minqan turqa'ud-un noyan qori-silemün-taisi-yi ke'eldüba
te'ün-ü gejige mün ong-qan-nu yeke qol čerig-iyer bayisu ke'eldüba
basa ong-qan ügülerün jamuqa de'ü ene čerik či jasa ke'en namayi tüsin ügülemüi e'über uqa'asu čaqtu nökör buyu čerig-iyen jasaldun ya'u čidaqun erde bi anda-tur qatquldun yadaju yabulu'a ong-qan nadača činaru aju'u
anda bu ayu qada'uji ke'ejü ilejügü 
171. ene kele ire'ülü'et činggis-qahan ügülerün uru'ud-un jürčedei ebin či ya'u ke'emü čimayi manglailaya ke'eba
jürče dei-yi dongqotqu-yin urida mangqud-un quyildar-sečen ügülerün anda-yin emüne bi qatquldusu mono qoyina önečit kö'üd-i minu asaraqu-yi anda medetügei ke'eba
jürčedei ügülerün činggis-qa'an-u emüne ba
uru'ut mangqut manglailan qatquldusu ke'ejü'üi 
teyin ke'et jürčedei quyildar qoyar uru'ut mangqud-iyar-iyan činggis-qa'an-u emüne jasaju bayiba
bayiqui-lu'a dayin jirgin-i manglailaju gürčü ireba
ireküi-lü'e uru'ut mangqut esergü dobtulju jirgin-i daruba
daruju ayisuqui-tur tümen-tübegen-ü ačiq-sirun dobtulba
dobtulju ačiq-sirun quyildar-i qatquju bawūlju'u mangqut quyildar-un de'ere eke'erčü'üi jürčedei uru'ud-i'er-iyen dobtulju tümen-tübegen-i daruba
daruju gödölgejü ayisuqui-tur olon-dongqayit esergü dobtulba
jürčedei basa dongqayid-i daruba
daruju ayisuqui-tur qori-silemün-taisi minqan turqa'ud-iyar dobtulba
jürčedei basa qori-silemün-taisi-yi iču'aju daruju ayisuqui-tur ong-qan-nača eye ügei'ü senggüm esergü dobtulqu bolun enggesge qačar-iyan qaqdaju senggüm mün tende unaju'u
senggüm-i unaqdaju kereyit bügüde-'er senggüm-ün de'ere eke'erčü bayiba
ani daruju singgeküi naran quburi de'ere tasin büküi-tür bidan-u'ai eke'erčü quyildar-i unaqsan yaratu-yi abu'at qariju činggis-qahan bidan-u'ai ong-qan-nača qatqulduqsan qajar-ača qaqačaju üdesi-de gödöljü qaqačan qonoba
172. bayiju qonoju üdür geyi'ülün bügütge'esü öködei boroqul bo'orču qurban ügei aju'u
činggis-qahan ügülerün  öködei-lü'e itegelten bo'orču boroqul qoyar qočorču'u aju ber üküjü ber ya'u qaqačaqun tede ke'eba
bidan-u'ai söni-de aqtas-iyan bariju qonoju činggis-qahan ügülerün qoyinača bidan-u nekejü ire'esü qatqulduya ke'en jasaju bayiba
üdür gege'en bolqaju üje'esü qoyinača niken gü'ün ayisu gürčü ire'esü bo'orču aju'u
bo'orču-yi gürčü ire'ülü'et činggis-qahan ügülerün möngke tenggeri medetügei ke'ejü ebče'ü-ben möke'eletba
bo'orču ügülerün dobtulqui-tur morin-iyan unatala qaqdaju yabuqan güyijü yabuqui-tur mün kereyit senggüm-ün de'ere eke'er bayiqui so'or čölö-tür ači'atu morin ači'a-ban kebeli'üljü bayiyin büküi-yi ači'a inu hoqtolju inggirčaq-tur inu unuju qarču bidan-u qaqačaqu qaruqsan mör mütkin yabuju olju edüi ireba bi ke'eba
173. basa qorumut atala basa niken gü'ün ayisu gürčü ayisuqui-tur dōro inu köl-iyen unjiljaju ayisu üje'esü qaqča gü'ün metü buyu iren bara'asu öködei-yin qoyinača boroqul sundulaju aman-u jabajin-iyar čisun čuburi'ulju gürčü ireba
öködei sujiyasu-ban sumun-a tusdaju čisun inu haqdarun boroqul ama-'ar-iyan simijü bökleksen čisun jabajin-iyar čuburi'ulju ireba
činggis-qahan üjejü nidün-eče-'en nilbusun čuburi'ulju duran alja'at qal ötör tüle'ülü'et qala'un da'a'ulu'at öködei-e undān eri'üljü ökke'üljü dayisun ire'esü qatqulduya ke'ejü büle'ei boroqul ügülerün dayisun-u to'osun činaqsi mau-ündür-ün ebür-iyer hula'an-boruqat  jük to'osun urtu-da qarču činaqsi  yorčiba ke'eba
boroqul tere üge-tür ire'esü qatqulduqun büle'ei dayin-a buru'uilan gödölde'esü bida čerig-iyen jibsi'erčü qatquldut je ke'ejü gödölba
gödölürün ulqui-silügeljit ö'ede gödölü'et dalan-nemürges oroba
174. tende qoyinača qada'an-daldurqan eme kö'ün-eče-'en qaqas ireba
irejü qada'an-daldurqan ong-qan-nu üge ke'en ügülerün ong-qan kö'ü-ben senggüm-i učuma-'ar enggesge qačar unatala qaqdaju de'ere inu eke'erčü tende ügülejü'üi 
hiluqatqu-yū metü-tür hiluqatba
qalqu-yū metü-tür qalqun bolun qayiran kö'ün-ü minu qačar-tur qada'asun qada'ulba
kö'ün-ü ami erüsün dobtulduya ke'esü te'ün-tür ačiq-sirun ügülerün qan qan bütügei ečine bügü kö'ü erirün elbesün jalama kijü abui babui ke'en erin jalbarimui bida edün törün baraqsan kö'ü senggüm-i asaraya mongqol-un olonkin jamuqa-lu'a altan qučar-lu'a bidan-tur bui temüjin-lü'e dayijiju qaruqsan mongqol qa'a otqun tede morin unu'atan modun nemüreten bolba
tede ani ese ire'esü otču morin-u junda'ul metü qormailaju abčirat je bida tede'er-i ke'eba
ačiq-sirun-u ene üge-tür ong-qan ügülerün je teyin bö'esü kö'ün alja'ujai kö'ün-i ülü dengselgen asaratqun ke'et qatqulduqsan qajar-ača qarin ičuba ke'eba
175. tendeče činggis-qahan dalan-nemürges-eče qalqa huru'u gödölürün to'o to'olalduba
to'olaldu'asu qoyar minqan jirwa'an ja'ut bolba
niken minqan qurban ja'ut činggis-qahan  qalqa-yin höreneji eted-iyer newüba
niken minqan qurban ja'ut qalqa-yin doronaji eted-iyer uru'ut mangqut newüba
teyin newüjü ayisuqui-tur günesün-e abalan yabuqui-tur quyildar yaras-iyan ana'ai üdü'üi-e činggis-qahan-a itqa'asu ülü bolun görö'esün-tür dobtulqu bolun hükderejü nökčiba
tende činggis-qahan qalqa-yin or-nu'u-yin keltegei-qada-da yasun inu talbi'ulba
176. qalqa-yin buyur-na'ur-tur čitququ huja'ur-a terge amel-ten onggirat bui ke'en medejü jürčedei-yi uru'ud-iyar ileba
ilerün onggirat irgen erte üdür-eče je-yin jisü-'er ökin-ü öngge-'er ke'esü elset je müt bulqa inu ke'esü qatquldut je bida ke'ejü ile'esü jürčedei-tür elsen oroju'ui elsen oroqdaju činggis-qahan ya'u ber anu ese köndeba
177. tende onggirad-i oro'ulu'at otču tüngge-qoroqan-u dorona bawuju činggis-qahan arqai-qasar-a sügegei-je'ün qoyar-a dawu bari'ulurun tüngge-qorqan-u dorona bawuba
ebesün ber inu sayin bolju'ui aqtas manu üyeleba
qan ečige-de minu ügüle ke'en ügülerün qan ečige minu ya'un čimar-tur nama ayu'ulba
či ayu'ulqu bö'esü mawun kö'üd-iyen mawun berined-iyen nuyir qangqan yekin ülü ayu'ulu či ding sa'uqui iseri boqunitqaju de'eksi qarqui hüni dölüsgejü yekin teyin ayu'uluba
či qan ečige minu qaljirqu-yū gü'ün-e qatquqdaba
či köndeledü-yü gü'ün-e köki'üldeba
či qan ečige minu bida qoyar ya'u ke'eldüle'ei jorqal-qun-u hula'a-nu'ut-bolda'ut-ta bida ese-'ü  ügüleldülü'ei südütü moqai-a södürte'esü södürgen-tür inu bu oroya südü-'er ama-'ar olulčaju büsireye ese-'ü ke'eldüle'ei edö'e qan ečige minu südü-'er ama-'ar-ū olulčaju qaqačaba
či ara'atu moqai-a adarta'asu adarqan-tur bu oroya ama-'ar kele-'er olulčaju büsireya ese-'ü ke'eldüle'ei edö'e qan ečige minu ama-'ar kele-'er-ü olulčaju anggičiraba
či qan ečige minu bi čö'en ber bö'esü olon-ni ülü eri'ülgü büle'e
mawui ber bö'esü sayin-i ülü eri'ülgü büle'e
bi qoyar kilügütei tergen nökö'e kilügü-ben ququra'asu hüker inu jikdün yadayu tere metü nökö'e kilügün činu bi ese-'ü aju'u
qoyar gürdütei tergen nökö'e gürdü-ben ququra'asu newün yadayu tere metü nökö'e gürdün činu bi ese-'ü aju'u
erte üdür ke'esü qurčaqus-buyiruq-qan ečige-yü'en qoyina döčin kö'üd-ün aqa ke'ejü qan bolju'u je či qan bolun baraju de'ü-ner-iyen tai-temür-taisi buqa-temür qoyar-i alaba je či erke-qara de'ü činu alaqdarun ami-yan qoroqču qarču naiman-u inanča-bilge-qan-tur buru'utču oroju'u je de'ü-ner-iyen alaqči bolba ke'ejü gür-qan abaqa činu čimadur morilaju ire'esü či ja'un gü'ün ami-yan qoroqun buru'utču selengge huru'u tuta'aju qara'un-qabčal sirquldaba je či jiči tendeče qarurun merkid-ün toqto'a-da huja'ur-üjin ökin-iyen ni'urqan ökčü qara'un-qabčal-ača qarču yisügei-qan ečige-tür minu ire'esü či tende ügülerün gür-qan abaqa-dača ulus minu aburaju ök ke'ekdejü yisügei-qan ečige minu čimada teyin ke'en irekdejü tayiči'ud-ača qunan baqaji qoyar-i uduritču  ulus činu aburaju öksü ke'en čerik jasaju otču qurban-telesüt-te bükün gür-qan-i qorin qučin gü'ün-i qasin jük hüldejü ulus činu aburaju ökba je tendeče irejü tu'ula-yin qara tün-ne qan ečige minu yisügei-qan-lu'a anda bolulčaju tende ong-qan ečige minu büsiren ügülerün ene tusa-yin činu hači uruq-un uruq-a činu hači qari'ulqu-yi de'ere tenggeri qajar-un ihe'el medetügei ke'en büsireksen aju'u
 je či te'ün-ü qoyina erge-qara naiman-u inanča-bilge-qan-nača čeri'üt quyuju čimatur morilaju ire'esü či ami-'an quroqun ulus-iyan gejü čö'en gü'ün tuta'aju qarču qara-kidad-un gür-qan-tur čui-müren-e sarda'ul-un qajar-a otba je či niken hon ülü dawusun basa gür-qan-nača daijiju qarču ui'ud-un tang'ud-un qajar-iyar yadaju ayisurun tabun ima'at sirgölejü sa'aju idejü teme'en-ü čisun qanaju idejü qaqča soqor qali'un moritu ireba je či qan ečige-yin čimayi teyin yadaju ayisu ke'en medejü urida yisügei-qan ečige-lü'e minu anda ke'eldüksen-ü tula setkijü taqai sükegei qoyar-i esergü činu elči ile'et basa bi ö'esün kelüren-ü bürgi-ergi-deče uqdun yorčiju güse'ür-na'ur-a jolqalduba je bida čimayi yadaju ireba ke'en qubčiri qubčiju čimada ögü'et uridu ečige-tür minu anda ke'eldüksen yosu-'ar tu'ula-yin qara tün-ne bida qoyar-un ečige kö'ün ke'eldüksen yosun tere ülü-'ü bui tere übül čimayi güre'en dotora oro'ulju teji'eba je übül übüljejü jusaju namur inu merkit irgen-ü toqto'a-beki-tür morilaju qadiqliq-niru'un-u mürüče-se'ül qatqulduju toqto'a-beki-yi barqujin-tögüm jük hüldejü merkit  irge dawuliju olon adu'u ordo ger anu tariyat anu bügüde-yi abču qan ečige-de ökba je bi ölösüksen-i činu üdür düli-de ese gürgeba je turuqsan-i činu sara-yin jarim-a ese gürgeba je bi basa bida güčügürtei-buyiruq-qan-i uluq-taq-un soqoq-usun-ača altai daba'ulun hüldejü ürünggü huru'u odu'at kičil-baš-na'ur-a moqutqaju abu'ai je bida tendeče qariju ayisuqui-tur naiman-u kökse'ü-sabraq baidaraq-belčir-e čeri'üd-iyen jasaju bayilduqui-tur üdesi jilda boldaju manaqaru erde qatqulduya ke'en jasalduju qono'asu qan ečige minu či baidal-dur-iyan qal-nu'ut tüle'üljü söni-de qara-se'ül ö'ede gödölba je či manaqar erde üje'esü bayidal-dur-iyan ügei boldarun čimayi gödöldejü ede-či bidan-i tülesilen aju'u ke'ejü bi ber gödöljü eder-altai-yin belčir-iyer ketüljü irejü sa'ari-ke'er-e bawuba je tende čimayi kökse'ü-sabraq nekejü senggüm-ün eme kö'ü irge orqa bügüde-yi abu'at qan ečige-yin činu telegetü-amasar-a bükün jarimut irgen adu'un ide'en činu dawuliju odu'asu merkid-ün toqto'a-yin kö'ün qudu čila'un qoyar irge orqa-bar-iyan čimatur bürün tere so'or-tur ečige-dür-iyen neyilen barqujin oron čima-dača dayijin gödöljü'üi je tende qan ečige minu či naiman-u kökse'ü-sabraq-a irge orqa-ban dauliqdaba
bi kö'ün minu dörben külü'üd-iyen ökčü ile ke'ejü ile'esü činu metü ülü setkin tende bi bo'orču muqali boroqul čila'un-ba'atur ede dörben külü'üd-iyer-iyen čeri'üt jasaju ile'esü ede dörben külü'üd-ün minu urida hula'an-qut-da senggüm bayilduqu bolun morin-u'an quya qaqdaju abdaqu  bolju büküi-tür ede dörben külü'üt minu gürčü senggüm-i abura'at eme kö'ü irge orqa selte bügüde-yi aburaju ögü'esü tende qan ečige minu büsiren ügülerün kö'ün-ü'en temüjin-e odun baraqsan irge orqo-ban dörben külü'üd-iyen ilejü aburaju ökteba ke'ejü büle'e
či edö'e qan ečige minu yambar čimar-tur minu čimatba
či čimar-un yosun-tur elčin ile ilerün qulbari-quri idürgen qoyar-i ile qoyar-i ese ile'esü nököji-yi ile ke'ejü ile'esü 178. ede üges-tür ong-qan ügülerün ai soyiluq kö'ün-eče-'en qaqačaqu-yū törö-deče qaqačaba
hirijegü-yū üyile-deče hiričeba
bi ke'en dura alja'at ügülerün edö'e kö'ü-ben üjejü mawui setki'esü ene metü čisu-ban qarqaqdasu ke'en andaqaju sigi quru'un-u'an toli onubči kituqai-bar qatquju čisun čuburi'ulju üčü'ügen daqtai-tur kijü kö'ün-e minu ök ke'ejü ileba
179. basa činggis-qahan jamuqa anda-da ügüle ke'en ügülerün qan ečige-deče minu üjen yadaju qaqača'ulba
či urida bosuqsan bidan-u qan ečige-yin kökö čung u'uqu büle'e
nada urida bosču ūqdarun nayidaba je či edö'e qan ečige-yin kökö čung baratqun kedüi je qoroqun ta ke'ejü ileba
basa činggis-qahan altan qučar qoyar-a ügüle ke'en ügülerün ta qoyar nama tebčijü ile-ü'ü gesü ke'ele'ei ta juqaju-ū gesü ke'ele'ei ta qučar-i čimayi nekün-taisi-yin kö'ün ke'ejü bidan-ača či qan bol ke'esü ese bolba je či altan-i čimayi qutula-qan-lu meden yabulu'a ečige-yü'en meden aqsa'ar či qan bol ke'esü  ese gü bolba je či de'ere-eče bartan-ba'atur-un kö'ün ke'ejü sača taiču qoyar-i ta qat bolutqun ke'ejü yadaba je bi tan-i qat bolutqun ke'ejü yadaju tan-a či qan bol ke'ekdejü meden yabuba je bi tan-i qat boluqsan bö'esü olon dayin-tur alginči ha'ulqaqda'asu tenggeri-de ihe'ekde'esü dayisun gü'ün-ni dawuliqui-tur qačar qo'a öki qadun eme-yi qarqam sayin aqta abčiraju ögü'ei büle'e je bi ora'a görö'esün-tür utura'ulda'asu qada-yin görö'esün qa inu niketele siqaju ögü'ei büle'e je bi qun-nu görö'esü quya inu niketele siqaju ögü'ei büle'e je bi ke'er-ün görö'esü ke'eli inu niketele siqaju ögü'ei büle'e je bi edö'e qan ečige-de minu sayitur nököčejü ögütkün uyidangqa ke'ekde'üje ta ča'ut-quri-yin turuq ele aju'ui bu ke'e'ülütkün qurban müred-ün teri'ün ken-e ber bu bawūlutqun ke'ejü ileba
180. basa činggis-qahan to'oril de'ü-de ügüle ke'en ügülerün de'ü ke'egü yosun tumbinai čaraqai-lingqu qoyar-un oqda-bo'ol-i'ar bilaju ireba je oqda-bo'ol-un kö'ün sübegei-bo'ol büle'e
sübegei-bo'ol-un kö'ün kököčü-kirsa'an büle'e
kököčü-kirsa'an-u kö'ün yegei-qongtaqar büle'e
yegei-qongtaqar-un kö'ün to'oril či ken-ü ulusut öksü ke'en jusuridun yabuyu či minu ulus altan qučar qoyar ken-e ber ülü mede'ülkün buyu je čimayi de'ü ke'egü yosun borqai-yin minu bosoqa-yin bo'ol elinčüg-ün minu e'üden-ü emčü bo'ol ke'ejü ilegü-yi minu eyimü 181. basa činggis-qahan senggüm anda-da ügüle ke'en ügülerün degeltü döröksen kö'ün bi aju'u
 je ničügün döröksen  kö'ün či aju'u
 je qan ečige bidan-u bida qoyar-i sača'u asaraqu büle'e
ja'ura oroqdaqui-ača senggüm anda nama naidaju hüldeba je či edö'e qan ečige-yin bidan-u jürüge inu ülü jobo'an üde manaqari oroju qarču sergü'ejü yabu üyen-ü setkil-iyen ülü talbin qan ečige-yi amidu bö'etele qan bolsu ke'en qan ečige-yin bidan-u setkil jobo'aju bu alqasa'ul ke'et senggüm anda nadur elči ile ilerün bilge-beki tödö'en qoyar-un nököd-i ile ke'ejü ileba
nadur elčin ilerün qan ečige qoyar elčin ile senggüm anda qoyar gü elčin ile jamuqa anda qoyar gü elčin ile altan qoyar gü elčin ile qučar qoyar gü elčin ile ačiq-sirun qoyar gü elčin ile qači'un qoyar gü elčin ile ke'en arqai-qasar sügegei-je'ün qoyar-iyar edüi üges dawu bari'ulju ileba
ede üges eyin ügülekdejü senggüm ügülerün keli qan ečige ke'egü büle'e
kidu'ači ebügen ese-'ü ke'egü büle'e
nama keli anda ke'en büle'e
toqto'a-bö'e sartaqčin qonin-u se'ül jübčijü yabuyu ese-'ü ke'egü büle'e
ede'er üges-ün arqas uqaqdaba
qatquldu'an-u teri'üt üges bui bilge-beki tödö'en qoyar qatqulduqui tuq bosqatqun aqtas tarqula'ulutqun ariyal ügei bui je ke'eba
tedüi ong-qan-nača arqai-qasar qariqui-tur sügegei-je'ün-ü eme kö'ün tende to'oril-tur aju'u
otqu jürüge yadaju sügegei-je'ün arqai-yača qočorču'ui arqai irejü ede üges činggis-qahan-a ügüleba
182. tedüi činggis-qahan odu'at baljuna-na'ur bawuba
tende bawuqui-tur čo'os-čaqān qorulas jöb tende učiralduba
tede qorulas ülü bulqan elsen ireba
önggüd-ün alaquš-digit-quri-dača asan sartaqtai čaqān teme'etü minqan irges ta'uju ergüne-müren huru'u buluqat keremün qudalduju abura ayisurun baljuna usulan oroqui-tur učiraba
183. činggis-qahan mün baljuna usulan büküi-tür qasar eme kö'ü-ben yegü yisüngge tuqu-tan qurban kö'üd-iyen ong-qan-tur gejü čö'en beyes nököd-iyer-iyen qarču aqa-yu'an ke'en činggis-qa'an-i erin qara'un-jidün-ü niru'ut kigürijü olun yadan yadaju siri sirbusun idejü yabu'at baljuna-da činggis-qahan-tur neyileba
qasar-i ire'ülü'et bayasču činggis-qahan ong-qan-tur elčin ileya ke'en eyetüjü jewüredei qali'udar uriangqadai čaqurqan qoyar-iyar ügülejü ilerün qan ečige-de qasar-un üge ke'en ügületkün ke'en ügülerün aqa-yan qaraju qara'a inu jabqaba
qayiju qa'uluqa  inu olun yadaba
qayilaju dawu-ban ese sonosdaba
hot qaraju urbang deretü bolju gebtemü bi eme kö'ün minu qan ečige-tür bui itegemji ere'en olu'asu qan ečige-tür otqu bi ke'ejü ileba ke'en ügületkün basa ügülerün ba
tan-i uda'aran gödöljü kelüren-ü arqal-geügi-de boljalduya ta tende iretkün ke'en boljalduju tedüi qali'udar čaqurqan qoyar-i ile'et jürčedei arqai qoyar-i alginčilaju baljuna-na'ur-ača činggis-qahan uda'aran e'üsülčejü qarun morilaqsa'ar kelüren-ü arqal-geügi-de gürba
184. qali'udar čaqurqan qoyar ong-qan-tur gürčü qasar-un üge ke'en endeče ügülejü ileksen üges ügülejü'üi 
ong-qan  altan terme bosqaju genet qurimlan aju'ui qali'udar čaqurqan qoyar-un üge-tür ong-qan ügülerün teyin bö'esü qasar iretügei ke'ejü itegemji itürgen-i ileye ke'en ileldüjü'üi 
tedüi ire'et boljāl qajar-a arqal-geügi-de gürküi-lü'e baru'a yeke-yi üjejü itürgen elčin qarin tuta'aju'u
qali'udar-un morin qurdun aju'u
qali'udar güyičejü bariqu jürüge yadaju urida'un qoyina'un inu hoqtoriqan yabuqui-tur čaqurqan-u morin uda'an aju'u
qoyinača sumun-u gürküi üjü'ür-e itürgen-ü altan eme'eltü qara aqta-yin quyang huja'ur sa'utala qarbuju'u tende itürgen-i qali'udar čaqurqan qoyar bariju činggis-qahan-tur abčiraba
činggis-qahan itürgen-tür ülü keleleldün qasar-tur abču odutqun qasar medetügei ke'eba
abču odu'asu qasar itürgen-tür ülü keleleldün mün tende čabčiju geba
185. qali'udar čaqurqan qoyar činggis-qahan-a ügülerün ong-qan genet bui altan terme bosqaju qurimlamui ötörlen igülgüjü sönit düliligejü nenden büčiye ke'eba
ene üge-yi jöbsiyejü jürčedei arqai qoyar-i alginčila'ulju sönit düli'et gürčü jeje'er-ündür-ün jer-qabčiqai-yin amasar-a büküi-tür büčiba
qurban sönit qurban üdüt bulqaqdarun büčijü bayibasu qutu'ar üdür yadaju müt oroba
ong-qan senggüm qoyar-i söni ker ber qaruqsan-i ese medekdeba
ene bulqalduqči jirgin-ü qadaq-ba'atur aju'u
qadaq-ba'atur oroju irejü ügülerün qurban sönit qurban üdüt bulqaldurun tus qan-iyan üje'et bariju ker ala'ulqu ke'en tebčin yadaju ami-yan qoroqun küngketügei  ke'en su'ora'ulun bulqaldula'a bi edö'e ükü'ülde'esü üküsü činggis-qahan-a soyurqaqda'asu güčü öksü ke'eba
činggis-qahan qadaq-ba'atur-un üge-yi jöbsiyejü jarliq bolurun tus qan-niyan tebčin yadaju amin qoroqun küngketügei ke'en bulqalduqu ere tere ülü-'ü bui nököčekdegü gü'ün büle'e ke'e'et soyurqaju ülü ükü'ülün quyildar-un amin-u tula qadaq-ba'atur-i ja'un jirgin-i quyildar-un eme kö'ün-e inu güčü öktügei nu'un kö'ün törö'esü quyildar-un uruq-un uruq-a gürtele daqaju güčü öktügei ökin kö'ün törö'esü ečige eke anu ö'er-ün dura-'ar bu qudalatuqai quyildar-un eme kö'ün-ü emüne ümere-'en jarutuqai ke'en soyurqan jarliq bolba
quyildar-sečen-ü aman urida nekeksen-ü tula činggis-qahan soyurqaju jarliq bolurun quyildar-un uruq-un uruq-a gürtele quyildar-un tusa-yin tula önečid-ün abliqa abun atuqai ke'en jarliq bolba
186. tedüi kereyit irge dorayita'ulju jük jük qubiyaju tala'ulba
suldudai taqai-ba'atur-un tusa-yin inu tula niken ja'un jirgin-i ökba
basa činggis-qahan jarliq bolurun ong-qan-nu de'ü jaqa-gambu jirin ökit aju'ui egečimet inu ibaqa-beki-yi činggis-qahan ö'esün aburun döyimet sorqaqtani-beki-yi tolui-ya ökba
tere silta'an-iyar jaqa-gambu-yi imada qariyatan emčü irge ber tumda'a nökö'e kilgün bol ke'ejü soyurqaju ese tala'ulba
187. basa činggis-qahan jarliq bolurun badai kisiliq qoyar-un tusa-yin anu tula ong-qan-nu altan terme sa'uqsa'ar altan gürü'e ayaqa saba
asaraqsat haran salte ongqojit-kereyid-i  kesikten anu boltuqai qorčila'ulju ötökle'üljü uruq-un uruq-a gürtele darqalan jirqatqun olon dayin-tur ha'ulu'asu olja olu'asu oluqsa'ar abutqun ura'a görö'esün ala'asu alaqsa'ar abutqun ke'en jarliq bolba
basa činggis-qahan jarliq bolurun badai kisiliq qoyar-un amin ja'ura tusa gürgeksen-ü tula möngke tenggeri-de ihe'ekdejü kereyit irge doraida'ulju ündür-ün oron-tur gürba je mona qoyina uruq-un uruq-a minu oron-tur sa'uju ene metü tusa gürgeksed-i ulam ulam uqatuqai ke'en jarliq bolba
kereyit irge dawuliju ken-e ber ese dutatala tüge'eldüba
tümen-tübe'en-i tüge'eldüjü tügetele abulčaba
olon-dongqayit oquqa üdür-e ülü gürgen tala'ulba je čisutu tonoq abuqči jirgin-ba'atud-i jisüjü qubiyaju gürgeldün yadaba
kereyit irge tedüi qoru'aju tere übül abji'a-ködeger-i übüljeba
188. ong-qan senggüm qoyar beyes-iyen dayijiju qarču odu'at didik-saqal-un nekün-usun-a ong-qan hangqaju oroqu bolun naiman-u qara'ul qori-sübeči-tür oroju'u qori-sübeči ong-qan-ni bariju'u bi ong-qan buyu ke'esü ülü tanin ese büsirejü tende alaju'u
senggüm didik-saqal-un nekün-usun-a ülü oron qada'un yorčiju čöl-tür oroju usurqarun qulat hilu'atuju bayiqun-i senggüm bawuju mariyaju'u
senggüm-ün nökör kököčü aqtači emetü senggüm-lü'e qurba'ula aju'u
mori-yan kököčü aqtači-da'an bari'ulju'ui kököčü aqtači aqta inu kötölü'et qarin qataraju'ui eme inu ügülerün altatai-yi emüsküi-tür amtatai-yi ideküi-tür kököčü minu ke'egü büle'e
qan-niyan senggüm-i yekin  teyin tebčijü gejü odun buyu či ke'ejü eme inu bayiju qočorču'u kököčü ügülerün senggüm-i erelesü ke'en buyu je či ke'ejü'üi 
tere üge-tür eme inu ügülerün eme gü'ün noqai ni'urtai ke'ekdeyi je bi altan jantawu ber inu ök usun ber utquju u'utuqai ke'ejü'üi 
tendeče kököčü aqtači altan jantawu inu ab ke'en qoyinaqsi oru'at qataraju'u
tedüi ire'et činggis-qahan-tur kököčü aqtači irejü senggüm-i teyin čöl-tür gejü ireba
bi ke'en tende ügüleldüksen üges-iyen bügüde-yi tegüs ügülejü ögü'esü činggis-qahan jarliq bolurun eme-yi inu soyurqaju mün kököčü aqtači-yi tus qan-niyan eyin tebčijü irejü'üi 
eyimü gü'ün edö'e ken-tür nököče'esü itegekdegü ke'ejü čabčiju geba
189. naiman-u tayang-qan-nu eke gürbesü ügülerün ong-qan erten-ü ötögü yeke qan büle'e
teri'ü inu abčiratqun mün bö'esü tayiya bida ke'ejü qori-sübeči-tür elči ilejü teri'ü inu hoqtolju abčira'ulju taniju čaqān toloq de'ere talbiju berined-iyen berile'üljü ötökle'üljü qu'urda'ulju ayaqa bariju tayiju'ui tende teri'ün teyin tayiqdarun inejü'ü 
ine'eba ke'en tayang-qan kemkerü gečikile'üljü'üi 
tende kökse'ü-sabraq ügülejü'ü 
üküksen qan gü'ün-ü teri'ün inu ta gü hoqtolju abčirat nökö'e-te ta gü kemgerit ya'un jokiqui noqan-u bidan-u qučaqui dawun mawui bolbi 
inanča-bilge-qan ügülele'e eme jala'ui ere bi ötölba
ene tayang-i elbesü-'er töre'ülüle'e ayi torluq töreksen kö'ün minu törülmisi olon doromjin mawui ulus minu asaraju barin čidaqu-yū ke'ele'e edö'e noqan-u dawun idüreküi qučal  qučamui qadun-nu bidan-u gürbesü-yin jasaq qurča bolbi 
qan minu torluq tayang jö'ölen buyu či sibawulaqu abalaqu qoyar-ača busi setkil erdem ügei bui ke'ekdejü tende tayang-qan ügülerün ene dorona čö'eket mongqol bui ke'ekdemüi tede irgen ötögü yeke erten-ü ong-qan-ni qor-iyar-iyan ayu'ulju dayiji'ulju ükü'ülba
edö'e mün qan bolsu ke'en aqun-u tede tenggeri de'ere naran sara qoyar gereten gege'en boltuqai ke'en naran sara qoyar bui je qajar de'ere qoyar qat ker bolqu bida otču tedeket mongqol-i abčiraya ke'ejü'üi 
te'ün-tür eke inu gürbesü ügülerün yeki'üje tede'er-i mongqol irgen hünür mawutan qubčasu baratutan büle'ei anggida qolo büjü bütügei sili'un berinet ökid-i anu maqa abčira'ulju qar köl anu ukiya'ulju üni'et qonind-iyan maqa sa'a'ulqun ele ke'ejü'üi 
te'ün-tür tayang-qan ügülerün teyin bö'esü ya'utan aqun tede mongqol-tur otču qor anu maqa abčiraya ke'ejü'üi 
190. ede'er üges-tür kökse'ü-sabraq ügülerün ayi yeke üge ügület ta ayi torluq qan jokiqu-yū bui ni'utqun ke'ejü'üi 
kökse'ü-sabraq-a itqa'ulu'at bürün torbi-taš neretü elči önggüd-ün alaquš-digit-quri-da ügülejü ilerün ene dorona čö'eken mongqol bui ke'ekdemüi či bara'un qar bol bi endeče qamsaju tedeket mongqol-un qor anu abuya ke'ejü ilejü'ü 
tere üge-tür alaquš-digit-quri qari'u ügülerün bara'un qar bolun ülü čidaqu bi ke'ejü ile'et alaquš-digit-quri yuqunan neretü elči-yer-iyen činggis-qahan-na ügülejü ilerün naiman-u  tayang-qan qor činu abura iremüi namayi bara'un qar bol ke'ejü irejü'ü 
bi ese bolba
edö'e bi čimada sere'üljü ileba
irejü qor-iyan abda'ujai či ke'ejü ilejü'üi 
jöb tende činggis-qahan teme'en-ke'er-i abalaju tülkin-če'üd-i qomorču büküi-tür alaquš-digit-quri-yin ileksen yuqunan elči ene kelen gürgen ireba
ene kelen-tür aba
de'ere bö'et ker kikün ke'eldü'esü olon gü'ün ügülerün aqtas bidan-u turuqat bui edö'e yekikün bida ke'eldüjü'üi 
te'ün-tür otčigin-noyan ügülerün aqtas turuqat ke'en yekin siltaqdaqu minu aqtas tarqut bui eyimü üges sonosču yekin sa'uqdaqu ke'eba
basa belgütei-noyan ügülerün amidui bö'etele nökör-e qor-iyan abda'asu aqsan ya'un tusa bui töreksen ere-de ükü'esü taki qor numun-lü'e-ben yasun-lu'a niken-e kebte'esü ülü-'ü sayin bui naiman irgen ulus yeketü irge olotu ke'en yeke üge ügülen aju'u
bida ene anu yeke üge-tür siqan morilaju otču anu qor abu'asu berkedü-'ü aju'u
odu'asu olon adu'un anu joqsaju ülü-'ü qočoru'ujai ordo ger inu e'ürejü ülü-'ü qočoru'ujai olon ulus anu ündür etüget-tür qorura ülü-'ü qaru'ujai müt ene eyimü yeke üge ügüle'üljü ker sa'uqdaqu morilaya bö'et ke'eba
191. belgütei-noyan-u ene üge-yi jöbsiyejü činggis-qahan aba
bawu'at abjiqa-köteger-eče gödöljü qalqa-yin or-nu'u-yin keltegei-qada bawuju to'a-ban to'olalduju minqan tende minqalaju minqan-u noyan ja'un-u noyan harban-u noyan tende tüsiba
čerbin-i tende gü tüsiba
dödei-čerbi doqolqu-čerbi  ögele-čerbi tolun-čerbi bučaran-čerbi söyiketü-čerbi ede jirwa'an čerbin-i tende tüsiba
minqan minqalan ja'u ja'ulan harban harbalan baraju nayan kebte'ül dalan turqa'ut tende kesikten ilqaju oro'ulurun minqad-un ja'ud-un noyad-un kö'üd-i de'ü-ner-i ütü dürü-yin gü'ün-ü kö'üd-i de'ü-ner-i oro'ulurun erdemütten  beye sil sayitan ilqaju oro'ulba
tende arqai-qasar-i soyurqaju ba'atud-i ilqaju minqalatuqai qatquldu'an üdür emüne minu bayiju qatquldutuqai olon üdür turqaq kesikten minu boltuqai ke'en jarliq bolba
dalan turqa'ud-i ögöle-čerbi aqalaju atuqai qudus-qalčan-lu'a eyetüldüjü atqun ke'eba
192. basa činggis-qahan jarliq bolurun qorčin turqa'ut kesikten bawurči e'ütenči aqtači üdür kesik oroju naran singgegü-yin urida kebte'ül-e jayilaju aqtas-tur-iyan qarun qonotuqai kebte'ül söni ger horčin kebtegün-iyen kebte'üljü e'üten-tür bayiqun-iyan kesiklen bayi'ultuqai qorčin turqa'ut manaqari inu bidan-i šülen ide'esü kebte'ül-tür kelelejü qorčin turqa'ut bawurčin e'üdečin mün mün mör-dür-iyen yabutuqai sa'urin-dur-iyan sa'utuqai qurban söni qurban üdür kesik üdür-iyen dawusču mün gü yosu-'ar qurban söni qonolduju ye'ütgeldüjü söni kebte'ül atuqai horčin kebtejü qonotuqai ke'en jarliq bolba
tedüi minqan minqalan baraju čerbi tüsijü nayan kebte'ül dalan turqa'ut kesikten oro'ulju arqai-qasar-a ba'atut ilqaju qalqa-yin or-nu'u-yin keltegei-qada-dača naiman irgen-tür morilarun 193. quluqana jil jun-nu teri'ün sara-yin harban jirwa'an  üdür hula'an tergel-e tuq saču'at morilarun kelüren ö'ede jebe qubilai qoyar-i alginčilaju yabu'at sa'ari-ke'er-i gürü'esü qangqarqan-u  teri'ü-te naiman-u qara'ul tende aju'u
bidan-u qara'ul-a hüldeldüjü bidan-u qara'ul-ača niken singqula morin mawuqan eme'eltü-yi naiman-u qara'ul-a abtaju'ui naiman-u qara'ul tere morin abču ügüleldürün mongqol-un aqtas turuqat aju'u ke'eldüjü'üi 
bidan-u'ai sa'ari-ke'er-i gürčü tende töritčü ker kikün ke'eldü'esü tende dödei-čerbi činggis-qahan-a duratqarun bidan-lu čö'en bui čö'en de'ere čilejü ireba
eyin gü töritčü aqtas-iyan čattala ene sa'ari-ke'er-i delgen bawuju amitu ele gü'ün tutum ere-yin tabun anggida qal-nu'ut tülejü qal-iyar oqjatqaya naiman irgen olon ke'ekdemüi qan anu ger-teče ese qaruqsan tanggi ke'ekdemüi qal-iyar hülürige'ültele bidan-u aqtas ber čadumu je aqtas-iyan čatqan naiman-u qara'ul-i hülde'et daručaju qol-tur anu neyile'ülün tere samawui-tur qatquldu'asu bolqu-yū ke'en duratqa'asu ene üge-yi jöbsiyejü činggis-qahan jarliq bolurun teyin bö'et qal-nu'ut tüle'ülütkün ke'en čeri'üt-te jasaq tungqaba
tedüi sa'ari-ke'er-i delgen bawuju amitu ele gü'ün tabun anggida qal-nu'ut tüle'ülba
söni naiman-u qara'ul qangqarqan-u  teri'ün-eče söni olon qal üjejü mongqol-i čö'eken ese gü ke'en büle'ei hodun-nača olon qaltan bui ke'en tayang-qan-tur mawuqan eme'eltü singqulaqan morin ökčü ile'et mongqol-un čeri'üt sa'ari-ke'er-i bütetele bawulu'a üdür-tür ündür-ün aqun-ū hodun-nača olon qaltan bui  ke'ejü ilejü'üi 
194. qara'ul-un ene kele gürtejü tayang-qan qangqai-yin qačir-usun-a aju'ui ene kele gürge'ülü'et güčülük-qan kö'ün-dür-iyen kelelejü ilerün mongqol-un aqtas turuqat aju'ui hodun-nača olon qaltan ke'emüi mongqol olon aju'ui edö'e bida qamtudun bara'asu qaqačaqui berke bolqun-ū qamtudun bara'asu qara nidün-iyen hirmes ülü kikün tede qačar-iyan qatquqda'asu qara čisun qaru'asu qaltaril ügei qatanggin mongqol-tur qamtudu'asu bolqu-yū mongqol-un aqtas turuqat ke'ekdemüi bida ulus-iyan altai daba'ulun segü'ülün gödölju čerig-iyen jibsi'erčü ani uduju yabuju altai-yin ölkes gürtele noqai kerel kerejü yabuju bidan-u aqtas tarqut bui ke'eli segü'ülün mongqol-un aqtas biqarda'ulun ni'ur de'ere anu asqaya bida ke'ejü ilejü'üi 
tere üge-tür güčülük-qan ügülerün ana'ai-yin eme tayang jirüge yadarun ene üges ügülejü'üi 
mongqol-un olon qa'ača irejü'üi 
mongqol-un olongkin jamuqa-lu'a ende bidan-tur bui kündü eme-yin si'eküi qajar-a ese qaruqsan gürdün-ü tuqul-un belji'el-tür ese gürüksen eme tayang jirüge yadarun ese-'ü ede üges ügülejü ilejü'üi 
ke'en elčin-eče ečige-yü'en eberetele bertetele ügülejü ilejü'üi 
ene üge-tür tayang-qan ö'er-iyen emečilekden ügülekdejü tayang-qan ügülerün güčütü omoqtu güčülük gürülčeküi alalduqui üdür maqa ene omog-iyan bu talbituqai gürülčen qamtudun bara'asu qaqačaqui maqa berke bui je ke'eba
tere üge-tür tayang-qan-nu dōro medegü  yeke noyan qori-sübeči ügülerün inanča-bilge-qan ečige činu sača nökör-e ere-yin aru aqta-yin qarqam ese üje'ülüle'e edö'e či manaqar erte bö'et yekin jirüge yadamu či čimayi eyin jirüge yadaqui-yi medeksen bö'esü qadun ber gü'ün bö'esü eke-yi činu gürbesü-yi abčiraju čerik ülü-'ü jasa'ulqu büle'e
čima qayiran kökse'ü-sabraq-a ötöldeküi ya'un čerig-ün bidan-u jasal sülbergüi bolbi 
mongqol-un čaq jaya'an bui je ese bolbi 
ayi turluq tayang yadaqu metü ele buyu či ke'et qor-iyan deledü'et buru'u qataraba
195. te'ün-tür tayang-qan kilinglaju ügülerün ükügü amin joboqu beye bügüde niken buyu je teyin bö'esü qatqulduya ke'ejü qačir-usun-ača gödöljü tamir huru'u yabu'at orqon-i ketüljü naqu-qun-nu doronaji qormai da'arin čakirma'ut gürčü ayisuqui-tur činggis-qahan-nu qara'ul üjejü naiman gürčü ayisai ke'en kelen gürge'esü ene kelen gürge'ülü'et činggis-qahan jarliq bolurun olon-nača olon čö'en-neče čö'en qor bolumu je ke'et esergü anu morilaju qara'ul-i anu hülde'et čerik jasarun qaraqana yorčil yorčiju na'ur bayildu  bayilduju si'üči qatquldu'a qatqulduya ke'eldüba
teyin ke'et činggis-qahan ö'esün alginčilaju qasar-i qol jasa'ulba
otčigin-noyan-i kötöt jasa'ulba
naiman čakirma'ud-ača ičuju naqu-qun-nu ebür a'ula-yin qormai kijin bayiju'ui tedüi naiman-u qara'ul-i bidan-u qara'ul hülde'et naqu-qun-nu ebür yeke qol-tur anu neyiletele hülde'et gürčü'üi teyin hüldejü gürküi-yi tayang-qan üjejü jamuqa tende naiman-lu'a  čerik morilaju ireldüjü tende aju tayang-qan jamuqa-dača asaqču'u tede ya'ut olon qonit činō hüldejü qoton-tur gürtele hüldejü iregü metü ede ya'ut haran teyin hüldejü ayisai ke'en asaqba
jamuqa ügülerün temüjin anda minu dörben noqais-i gü'ün-nü miqa-'ar teji'ejü ginjilejü huyaju aqu büle'e
tede qara'ul-i bidan-u hüldejü ayisuqun tede bui je tede dörben noqais siremün manglaitan si'üči qosi'utan sibüge keleten temür öreten üldü mina'atan si'üder-i idejü kei unuju yabut tede alalduqui üdür haran-u miqa idet tede gürülčegü üdür gü'ün-ü miqa günesület tede ginji-ben mültüldejü edö'e ese-'ü buqsaju aqsat bayisču teyin silemeljen ayisai tede ke'ejü'üi 
tede dörben noqais ket tede ke'esü jebe qubilai qoyar jelme sübe'etei qoyar tede dörben bui ke'ejü'üi 
tayang-qan ügülerün ele tede doromji-ača qolo bayiya ke'ejü qoyinaqsi iquriju a'ula asan bayiba
te'ün-ü qoyinača duyalju to'oriqaju ayisqun-i üjejü basa tayang-qan jamuqa-dača asaqču'u tede ya'ut erte talbiqsat unuqan eke-yü'en sün kököjü eke-yü'en horčin torolun güyigü unuqat metü yekin teyin to'oriqan ayisai tede ke'en asaqču'u jamuqa ügülerün tede jidatu ere-yi ji'uju čisutu tonoq tonoqčin üldütü ere-yi hüldejü unaqaju alaju üb tonaq abuqčin uru'ut mangqut ke'ekdet tede edö'e ese-'ü bayasču teyin duyalun ayisai tede ke'ejü'ü 
tendeče tayang-qan ügülerün ele teyin bö'esü tede doromji-ača qolo bayiya ke'ejü basa qoyinaqsi a'ula abarin bayiba
te'ün-ü qoyinača ayisuqun öyeseksen sibawun metü sile melčejü qusi'uraju ayisqun ken buyu ke'en tayang-qan jamuqa-dača asaqču'u jamuqa ügülerün ene ayisqu temüjin anda minu gübčin beye inu siremü-'er sirekdeksen sibüge-de qatququi-a čölö ügei'ü temür-iyer dabtaqsan tebene-de qatququi-a čölö ügei'ü temüjin anda minu öyeseksen sibawun metü eyin silemeljen ayisu-lu üjebe-yü'ü ta naiman nököt mongqol-i üje'esü esige-yin qodu ülü hüle'ülküi-eče büle'ei ta üjetkün ke'eba
ene üge-tür tayang-qan ügülerün ele amsa'ari a'ula abarin baiya ke'ejü a'ula abariju bayiju'u basa tayang-qan jamuqa-dača asaqurun basa tere qoyinača juja'an-a ayisuqun ken buyu ke'en asaqba
jamuqa ügülerün hö'elün-eke niken kö'ü-ben gü'ün-ü miqa-bar teji'ejü büle'e
qurban alda beyetü qunajin bodo idesitü qurban dabqur quyaq emüsčü qurban buqa jitgü'üljü ayisu je qortu gü'ün-i qotola-yi jalgi'asu qo'olai-dur-iyan ülü tordayu gübčin ere-yi emgü'esü öre ülü jasayu a'urla'asu angqu'a sumu-ban delijü talbi'asu a'ula alus bükün harban qorin haran-i ülgetele qarbuyu gereldüksen nökör-i ke'er ketüs bügün-i keyibür sumu-ban delijü talbi'asu kelkitele ülketele qarbuyu yeke-de delijü qarbu'asu yisün ja'ut alda qajar-a qarbuyu tatan delijü qarbu'asu tabunja'ut alda qajar-a qarbuyu gü'ün gü'ün-neče busu gürölgü mangqus töreksen joči-qasar ke'ekdeyü tere buyu je ke'ejü'üi 
tende-eče tayang-qan ügülerün ele teyin bö'esü a'ula-yin ündür temečeye de'eksi abaritqun ke'ejü a'ula abarin bayiba
basa tayang-qan jamuqa-dača asaqurun  te'ün-ü qoyinača ayisuqun ken buyu ke'ejü'üi 
jamuqa ügülerün tere hö'elün-eke-yin nilqa kö'ün otčigin heligetü ke'ekdeyü erte untaqči orai-a bosuqči baru'an-ača ber ülü qočoruyu bayidal-ača ber ülü qočodayu ke'ejü'üi 
tayang-qan ügülerün teyin bö'esü a'ula-yin horgil de'ere qaruya ke'ejü'üi 
196. jamuqa tayang-qan-a ede üges eyin ügüle'et naiman-nača qaqačan böldeyitčü qarču činggis-qahan-na kele oro'ulju ilerün anda-da ügüle ke'en ügülejü ilerün tayang-qan üge-tür minu ükütgüjü ö'ede temečen ürgüjü qarba
ama-'ar alaqdaju ayuju a'ula abarin qarba
anda qada'uči müt a'ula-tur qarba
ede esergülegü čirai ügei'ün bui bi bürün naiman-nača qaqačaba ke'ejü ilejü'üi 
činggis-qahan naran jilda boldaju naqu-qun-nu a'ula-yi büselgün bayiju qonoba
tere söni naiman buru'uyilan gödölkün bolun naqu de'ereče qulatču de'ere de'ere-'en qutaqlalduju yasu hüsü-ban kemkerü unalduju hünji'ü bayitala daručaju üküldüjü'üi 
manaqasi inu tayang-qan-i muqutqaju abuba
güčülük-qan ö'ere aqsa'ar čö'en gü'ün daijin gödöljü güyičekderün tamir-a güre'elejü'ü 
tere güre'en-dür-iyen bayin yadaju gödöljü tuta'aju qarču otba
naiman irgen-ü ulus-i altai-yin ölke-de muqutqaju quriyaba
jamuqa-lu'a aqsat jadaran qatagin salji'ut dörben tayiči'ut onggirat ki'et tende gü oroba
tayang-un eke gürbesü-yi činggis-qahan abčira'ulju ügülerün či mongqol-un hünir mawui ke'ejü ese-'ü büle'e
edö'e yekin ireba
či ke'ejü činggis-qahan abula'a  197. mün quluqana jil namur qaradal-huja'ur-a merkid-ün toqto'a-beki-lü'e činggis-qahan bayilduju toqto'a-yi gödölgejü sa'ari-ke'er-e irge orqa ulus inu dawuliba
toqto'a qudu čila'un kö'üt-lü'e-ben čö'en gü'ün beyes-iyen tuta'aju qarba
tedüi merkit irgen dauliqdarun ho'as-merkid-ün dayir-usun öki-yen qulan-qatun-i činggis-qahan-na üje'ülsü ke'en abču ayisurun ja'ura čeri'üt-te jetgükdejü ba'aridai nayā-noyan-tur učiraju dayir-usun ügülerün ene öki-yen činggis-qahan-na üje'ülsü ke'en ayisu bi ke'ejü'üi 
tende nayā-noyan ügülerün ökin-i činu bida qamtu üje'ülüye ke'en töritgejü'üi 
töritgerün dayir-usun-i či qaqča-'ar odu'asu ja'ura čeri'üt samawui čaq-tur čimayi ber ülü a'ulqu öki taki činu samawuraqu ke'ejü qurban üdür qurban söni töritgejü'üi 
tendeče qulan-qadun-lu'a dayir-usun-i abu'at qamtu nayā-noyan činggis-qahan-tur gürgeba
tendeče činggis-qahan nayā-yi yekin töde'ejü aba
či ke'en masi kilinglaju qatangqui-a mara'an asaqču jasaq bolqaya ke'en asaqun büküi-tür qulan-qadun ügülerün naya'a ügülele'e činggis-qahan-nu yeke noyan buyu bi bida qamtu öki činu qahan-na üje'ülüye ja'ura čeri'üt samawuraqu ke'en itqalu'a edö'e naya'a-dača busut čeri'üt-tür učira'asu samawu-tur tüitküi-tür oroqu-yū aju'u
qai ene naya'a-tur učiraqui manu sayin bolba
edö'e naya'a-dača asaqtala qahan soyurqa'asu tenggeri-yin jayā-'ar ečige eke töre'ülüksen mariyan-nača asaqu'asu ke'en öči'üljü'üi 
naya'a asaqdarun qahan-nača busu ni'ur minu ügei bui je qari  irgen-ü qačar qo'a öki qadun qarqam sayin aqta učira'asu qahan-nu'an gü ke'ejü amu je bi e'ün-eče busu setkil minu bö'esü üküsü bi ke'ejü'üi 
činggis-qahan qulan-qadun-nu öčil jöbsiyejü mün üdür-iyer bö'et bolqan sori'asu qulan-qadun-nu öčil adali boldaju činggis-qahan qulan-qadun-ni soyurqaju ta'alaba
naya'a-yin üges adali boldaju jöbsiyejü ünen ügetü aju'u ke'en yeke üyile tüsisü ke'en soyurqaba
198. merkit irgen dauliju toqto'a-beki-yin yeke kö'ün qudu-yin qadunt tügei döregene jirin-eče döregene-yi tende ögödei-qahan-na ökba
merkid-ün jarimut ulus dayijiju taiqal-qorqa qorqalaju'ui tende činggis-qahan jarliq bolurun sorqan-sira-yin kö'ün čimbai-yi noyalaju jewün qar-un čeri'üd-iyer qorqalaqsat merkid-i e'ere'ülün ileba
toqto'a qudu čila'un kö'üd-iyer-iyen čö'en beyes dayijiju qaruqsan-i činggis-qahan nekejü altai-yin ebür-e übüljejü hüker jil qabur arai-iyar dabaju odu'asu naiman-u güčülük-qan ulus-iyan abqa'ulju tere dayijiju qaruqsa'ar čö'en gü'ün merkid-ün toqto'a qoyar neyilejü erdis-ün buqdurma huja'ur-a qamtutču čerig-iyen jasaju aju'ui činggis-qahan gürčü bayildu'asu toqto'a tende siba-yin sumun-a tusdaju unaju'u
kö'üt inu yasu inu barin yadaju beye-yi inu abču odun yadaju teri'ü inu hoqtolju abču yorčiju'u tende naiman merkit bolun qamtutču bayildun yadaju buru'uilan gödölürün erdiš ketülürün čübtüsčü olonki-yan usun-tur ükü'üljü'üi 
čö'en qaruqsat naiman merkit erdiš ketülün  baraju qaqačan gödöljü'üi 
naiman-u güčülük-qan ui'urtai qarlu'ud-i da'arin sarda'ul-un qajar-a čui-müren-e bükün qara-kidad-un gür-qan-tur neyilen otču'ui merkid-ün toqto'a-yin kö'üt qudu qat  čila'un teri'üten merkit qanglin-i kimča'ud-i da'arin yorčiju'ui tendeče činggis-qahan qariju arai-iyar dabaju a'uru'ut-tur bawuba
čimbai taiqal-qorqa qorqalaqsat merkid-i muqutqaju'ui tende merkid-i činggis-qahan jarliq bolurun kiduqun-i anu kidu'ulju hüleksed-i anu čeri'üt-te tala'ulba
basa urida oroqsan merkit a'uru'ud-ača dayijin bosču'u a'uru'ut-tur bükün kötöčin bidan-u teden-i daruju'u tende činggis-qahan jarliq bolurun tumdaqa ba
a'uluya ke'elü'e müt ele dayijin aju'u ke'en merkid-i jük jük hülüttele qubiya'ulba
199. mün hüker jil činggis-qahan jarliq bolurun sübe'etei-yi temür telegetü toqto'a-yin qudu qal čila'un teri'üten ko'üd-i inu neke'ülün ilerün sübetei-e činggis-qahan jarliq bolju dawu bari'ulurun toqto'a-yin qudu qal čila'un teri'üten kö'üt inu odun oqjatču qarin qarbučaju uqurqatu qulan sumutu buqu bolju otba
teden-i ji'ürtü bolju nisču tenggeri-tür qaru'asu či sübe'etei singqor bolju nisču ülü-'ü bari'ujiyi tarbaqan bolju kimusu-'ar-iyan maltaju qajar-tur oro'asu čalir bolju čokiju erijü ülü-'ü güyičegü či jiqasun bolju tenggis dalai-tur oro'asu či sübe'etei gölmi qubči'ur bolju si'üjü qubčiju ülü-'ü abqu či basa ündür daba'a daban örgen müren ketülün ileba
čimayi qajar-un qola-yi setkijü čerig-ün ula'a turu'ai üdü'üi-a qayiralatqun  günesü-ben bara'ai üdü'üi-a quči'atqun aqta turun bara'asu qayirala'asu ülü boluyi günesün baran bara'asu qučā'asu ülü boluyi mör-tür tanu görö'esün olon bui je alus setkijü yabuqui-tur čerig-ün gü'ün-i görö'esün-tür bu ha'ulqatqun kem ügei bu abalatqun čerig-ün gü'ün-e günesün-e neme'esün önggegü-yen  boltuqai ke'en abalabasu kemlejü abalatqun kemten aba-dača anggida čerig-ün gü'ün-ü eme'el-ün qudurqa bu qudurqala'ul qada'ar ülü nemürgen sudalbiju yabutuqai teyin jasalduju yabu'asu čerig-ün gü'ün ha'ulun ker čidaqu eyin jasaqlaju bö'et jasaq dabaqsad-i bariju nisituqai bidan-u jarliq dabaqsad-i bidan-a taniqdaqun metüs-i bidan-a ökčü iretkün bidan-a ülü taniqdaqun olon-i mün tende bö'et mököri'ülütkün müren-ü čina'un möseldükün ta mün yosu-'ar yabutqun a'ula-yin čina'un alqasalduqun ta anggida ö'ere bu setkitkün möngke tenggeri-de güčü a'uqa nemekdejü toqto'a-yin kö'üd-i qar-dur-iyan oro'ulu'asu bidan-tur abčiratala ya'un bui tende ta getkün ke'en jarliq bolba
sübe'etei-ye basa činggis-qahan ügülerün čimayi ayala'ulurun bi üčügen čaq-tur qurban merkid-ün uduyit-ta burqan-qaldun-ni qurban-ta quči'ulju ayu'uldala'a bi teyimü öšten irgen-i edö'e basa aman kelen aldaju otču'ui urtu-yin üjü'ür-e gün-nü hiru'ar-a gürülčetügei ke'en neke'ülün üjü'ülen temür telege deletčü hüker jil ča'ura'ulba
bidan-i ečine ber bö'esü ile metü qolo ber bö'esü oyira metü setkijü yabu'asu de'ere tenggeri-de ber ihe'ekdemüi je ta ke'en jarliq bolba
200. naiman merkid-i muqutqan bara'asu jamuqa naiman-lu'a bürün tende ulus-iyan abda'asu mün tabun nököttü o'orčaq bolju tanglu de'ere qarču uqulja alaju siraju iderün tende jamuqa nököt-te'en ügülejü'ü 
ken-ü kö'üt ene üdür uqulja alaju eyin idemü ke'ejü'ü 
tere uqulja-yin miqa iden büküi ja'ura tabun nököt inu jamuqa-yi qardaju bariju činggis-qahan-tur abčiraju'u
jamuqa nököt-te'en bariju irekdejü qahan anda-da ügüle qara keri'e qarambai noqosu bariqu bolba
qaraču bo'ol qan-tur-iyan qar gürgegü bolba
qahan anda minu ya'u endegü boro quladu borčin sono bariqu bolba
bo'ol nekün büdün ejen-iyen bosoju  nendejü bariqu bolba
boqda anda minu ya'u endegü ke'en ügüle'esü jamuqa-yin tere üge-tür činggis-qahan jarliq bolurun tus qan-dur-iyan qar gürgeksen gü'ün-i ker a'uldaqu teyimün gü'ün ken-tür nököčegü tus qan-dur-iyan qar gürgekset haran-i uruq-a anu gürtele mököri'ülütkün ke'en jarliq bolba
mün jamuqa-yin ile imayi qardaqsan haran-i mököri'üljü ökba
činggis-qahan jamuqa-da ügüle ke'en ügülerün edö'e bida qoyar qamtutba
nököčeya öre'ele kilgün bolulčaju a'asu ö'ermičilen qaqačan setkimü či edö'e niken-e qamtu aju umartaqsan-iyan duratqalduju untaraqsan-iyan seri'ülülčejü aya ö'ere ber anggida yabu'asu öljeitü qutuqtu anda minu büle'e
ünen üküldüküi üdür öre jürüge-ben ebetgü büle'e
či anggida ber ö'ere yabu'asu alalduqui üdür a'ušgi jürüge-ben ebetgü büle'e
či keli ke'esü kereyit irgen-lü'e qalaqaljit-elet-te qatqulduqui-tur  ong-qan ečige-de ügülekset üges-iyen sere'üljü ileksen tusa činu bui je basa naiman irgen-i üge-'er ükü'üljü ama-'ar alaju ayu'uluqsan-iyan adalitqatuqai ke'ejü kele ileksen činu tusa bolju'ui je ke'en 201. ügüle'esü jamuqa ügülerün erte üdür üčüget čaq-tur qorqonaq-jubur-a qan anda-lu'a anda ke'eldürün ülü singgeküi ide'e ideldüjü ülü umartaqu üges ügüleldüjü gönjile-de'en qaqaldaju aqdaju'u
 je köndöledü-de köki'üldejü qaljirqu-da qatquqdaju qaqačan baraju qadaqatu üges ügüleldüle'e ke'en qara ni'ur-iyan qa'uldaqui-ača qalidun yadan qan anda-yiyan qala'un čirai üjen yadaju yabuba je bi ülü umartaqu üges ügüleldüle'e ke'en hula'an ni'ur-iyan übčikdeküi-eče urtu setkiltü anda-yiyan ünen čirai üjen yadaju yabuba je bi edö'e qan anda minu soyurqaju namayi nököčeye ke'ejü'üi 
nököčeküi čaq-tur ese nököčeldüba
bi edö'e anda tögörigei ulus-i tübsitkeba
qari tutum-i qamtutqaba
či qan oro čimadur joriba
delegei edö'e belen boluqsan-tur nököčejü ya'un tusa bolqu bi munda anda-yin qara sönin-ü jewüdün-tür činu oroqu bi gege'en üdür-ün setkil činu joba'aqu bi jaqa-yin činu bö'esün jahing-un činu örügesün bolqu bi arbin emegetü büle'e
bi anda-ača alus-i setkigü bolun alji'as boldaba
bi edö'e ene törelki-tür anda ba
qoyar-un urququi naran-nača singgeküi naran-tur gürtele nere minu gürbe je anda sečen eketü törülki külük törejü erdemütten  de'ünertü örlü'üt nököd-iyer-iyen dalan qurban aqtas-iyar-iyan bolju anda-da hülekde ba je bi bürün eke ečige-deče üčügen qočorču de'ü-ner ügei'ü eme minu domoqči itegel ügei'ü nököttü tewüber tenggeri-eče jaya'atu anda-da hülekdeba je anda soyurqa'asu namayi ötör nökče'esü anda jürüge-ben amumu je či anda soyurqaju ala'ulurun čisu ülü qarqan ala'ul üküjü gebte'esü ölük yasun minu ündür etügen-tür e'üra turuq uruq-un uruq-a činu gürtele ihejü öksü hirü'er boluyu je bi huja'ur ö'ere törülkitü büle'e
bi hüle'ü törülkitü anda-yin sülder-e daruqdaba je bi ügüleksen üges minu ülü umartan üde manaqar duratču ügüleldütkün ta edö'e namayi ötörletügei ke'en ügüle'esü ede'er üges-tür inu činggis-qahan ügülerün anda minu anggida ber yabuju bidan-tur aman dü'üren kelelejü amin-tur qor setkigü-yi inu ese sonosdaba je surdaqu gü'ün büle'e
mün ülü bolumui ükü'ülüya ke'esü tölge-tür ülü oromui silta'an ügei amin-tur qor ki'esü ülü jokimui kündü mörtü gü'ün bui ene maqa silta'an inu ügületkün erte čoji-darmala taičar qoyar-un adu'u-ban de'ermedülčeksen-ü tula jamuqa anda či buru'ui-a bulqa köyitčü irejü dalan-baljut-ta qatqulduju jerene-qabčiqai-a qorqoju namayi tende ese-'ü ayu'ulula'a či edö'e nököčeya ke'esü ülü boluyu amin činu qayira'asu ese bolba
či ke'en ügületkün edö'e činu üge-ber čisu ülü qarqan nökči'etügei ke'en ügüle ke'et čisu ülü qarqan nökči'ejü yasu inu ile bu getkün sayitur baritqun ke'en jarliq bolba
jamuqa-yi tende nökči'ejü yasu inu bari'ulba
202. tedüi sisgei to'urqatu ulus-i sidurqutqaju bars jil  onan-nu teri'ün-e quriju yisün költü čaqa'an tuq bayi'ulu'at činggis-qahan-na qan nere tende ökba
muqali-da gui-ong nere tende gü ökba
jebe-yi naiman-nu güčülük-qan-i neke'ülün tende gü ča'ura'ulba
mongqoljin ulus-i jibsiyerün baraju činggis-qahan jarliq bolurun ulus bayi'ululčan yabulduqsat-ta minqan minqalaju minqad-un noyat tüsijü soyurqal üge ügülesü ke'en jarliq bolba
minqad-un noyat tüsin nereyidürün mönglik-ečige bo'orču muqali-gui-ong qorči ilügei jürčedei qunan qubilai jelme tüge degei tolon önggür čülgetei boroqul sigi-qutuqu güčü kököčü qorqosun hüsün quyildar siluqai jetei taqai čaqa'an-qo'a alaq sorqan-sira buluqan qaračar kökö-čos süyiketü naya'a jungšoi güčügür bala oronartai dayir müge bujir mönggü'ür dolo'adai bögen qudus maral jebke yuruqan kökö jebe udutai bala-čerbi kete sübe'etei möngkö-qalja qurčaqus geügi badai kisiliq ketei ča'urqai onggiran toqon-temür megetü qada'an moroqa dori-buqa iduqadai siraqul dawun tamači qa'uran alči tobsaqa tungquidai tobuqa ajinai tüyideger sečewür jeder olar-güregen kinggiyadai buqa-güregen quril asiq-güregen qadai-güregen čigü-güregen alči-güregen qurban minqat onggirat butu-güregen qoyar minqat ikires önggüd-ün alaquš-digit-quri-güregen tabun minqat önggüt hoi-yin irgen-eče anggida mongqol ulus-un minqad-un noyad-i činggis-qahan-nu nereyidüksen yeren tabun minqad-un noyat bolba
203. güreget-lu'a niken-e basa činggis-qahan jarliq bolurun ede nereyidükset yeren tabun minqad-un noyad-i minqan tüsi'et bürün tere dotora činggis-qahan jarliq bolurun tusatan-a soyurqal öksü ke'en bo'orču muqali teri'üten noyad-i iretügei ke'eküi-tür ger dotora sigi-qutuqu büle'e
urira ot ke'en sigi-qutuqu-da ügüle'esü sigi-qutuqu ügülerün bo'orču muqali-tan ken-eče hüle'ü tusa kile'e ken-eče hüle'ü güčü ögüle'e soyurqal ökdegüya bi ya'un duta'u tusa ese bolula'a ya'un duta'u güčü ese ögüle'e bi
 ölegeitei büküi-eče ündür bosoqa-tur činu eri'ün-tür edüi saqal uruqutala ösčü ö'ere ese setkiba je bi
 ala-tur si'ekte-eče altan bosoqa-tur činu aju aman-tur saqal edüi urqutala ösčü alji'as ese getkiba je bi
 köl-dür-iyen kebte'üljü kö'üčilen ösgeba je namayi derge-de'en kebte'üljü de'üčilen ösgeba-je
 namayi edö'e nada yambar soyurqal ögümü ke'ejü'üi
 tere üge-tür činggis-qahan sigi-qutuqu-da ügülerün jirqodu'ar de'ü busu-'ū či oroču de'ü-de'en čimada soyurqal de'ü-ner-ün qubi-yiyar qubilaldu basa tusas-un činu tula yisün aldal-tur bu aldatuqai ke'en jarliq bolba
möngke tenggeri-de ihe'ekdejü gür ulus-i jükle'üljü büküi-tür či üjegü-yin nidün sonosqu-yin čikin bolju gür ulus-i eke-de bidan-a de'ü-ner-e kö'üt-te qubi irgen-ü nere-'er isgei tu'urqatan-i iriče'üljü qabdasun e'üdeten-i qaqača'ulju qubilaju ök ken ber činu üge busi bu bolqatuqai ke'en jarliq bolba
basa sigi-qutuqu-yi gür ulus-un qulaqai-yi kese'ejü qudal-i moqa'aju ükü'üldekün yosutan-i ükü'ül alda'uldaqun yosutan-i alda'ul  ke'en gür de'ere-yin jarqu tüsiba
basa gür irgen-ü qubi qubilaqsan-i jarqu jarqulaqsan-i kökö debter bičik bičijü debterlejü uruq-un uruq-a gürtele sigi-qutuqu-yin natur eyetüjü yosulaju kökö bičik čaqa'an ča'alsun-tur debterleksen-i bu ye'ütketügei ye'ütkekün haran aldaltan boltuqai ke'en jarliq bolba
sigi-qutuqu ügülerün minu metü oroču de'ü sača'u denggečen qubi ker abqu soyurqa'asu siro'ai yo'urqatu balaqasun-ača ökgü-yi qahan-nu soyurqal medetügei ke'en öčijü'ü 
ene üge-tür ö'er-ün beye-ben či čaqlaba
či mede ke'eba
sigi-qutuqu ö'er-iyen teyin soyurqa'ulun baraju qarču bo'orču muqali-tan noyad-i uriju oro'ulju'u 204. tende činggis-qahan jarliq bolju mönglik-ečige-de ügülerün töregü-lü'e töreldüksen ösgü-lü'e ösülčeksen öljeitü qutuqtu či tusa iheyel činu kedün ber aju'u
 je tere dotora ong-qan ečige senggüm anda qoyar namayi arqadan uriqsan-tur ayisurun ja'ura mönglik-ečige-yin ger-tür qono'asu mönglik-ečige či ese itqa'asu huyilun büküi usun-tur hulalun büküi qal-tur oroqda'ai büle'ei je tere tusa-yi sayi setkijü uruq-un uruq-a gürtele ker umartaqdaqu tere tusa setkijü edö'e sa'uri ene nu'u huja'ur-a sa'ūlju hon-tur sara-tur sataju öklige soyurqal čimada öksü mali'an asuqai uruq-un uruq-a gürtele ke'en jarliq bolba
205. basa činggis-qahan bo'orču-da ügülerün üčügen čaq-tur sirqa aqta-tan naiman morit de'ermettejü ja'ura qurban qonoju nekejü ayisuqui-tur jolqalduba je či tende ügülerün  benglenijü ayisuqui nökör-tür nököčeldüsü ke'en ger-tür ečige-dür-iyen ber kelen ügei'ü ge'ü-ben sa'an arun nambuqa sa'uluqa-ban ke'er-e bürgüjü minu oqatur qongqor-i talbi'ulju nada oroq singqula-yi unu'ulju či ö'esün qurdun qubi-yi unuju adu'u-ban ejen ügei talbiju ya'araju ke'er-eče bü'et nama-lu'a nököčejü basa qurban qonoq nekejü sirqa aqta-tan-i de'ermedüksen güre'en-tür gürü'esü güre'en-ü kiji'ar-a bayiqun-i de'ermedün hüldejü duta'aju abčiraba je bida qoyar ečige činu naqu-bayan aju'u
či qaqča kö'ün inu ya'u medejü nadur nököčegü büle'e
setkil-ün külüg-iyer nököčeba je či te'ün-ü qoyina setkijü yabuju bi belgütei-yi ilejü nököčeya ke'esü či bökötür qongqor-i unuju boro örmege-ben böktürčü nököčen ire'esü qurban merkit bidan-tur irejü burqan-ni qurban-ta quči'ulqui-tur qučilduba je či basa te'ün-ü qoyina tatar irgen-tür dalan-nemürges-te sitü'e'eldüjü qono'asu qura üdür söni ürgülji jüsereküi-tür söni namayi noyir atuqai ke'en nemürge-ben nemürükse'er minu de'ere qura ülü čuburi'ulun söni da'ustala bayiju öre'ele köl-iyen qaqčan-da ye'ütkejü büle'e
či külüg-ün činu belge aju'u
 je te'ün-eče busu ali külüg-i činu ügülejü da'usqu bo'orču muqali qoyar jöb minu yabutala jiktüjü buru'u-yi minu bayitala itqaju ene oron-tur gürgeba
edö'e bürin-ü de'ere sa'uri sa'uju yisün aldal-tur bu aldatuqai bo'orču bara'un qar-un altai derelegün-ü tümen medetügei ke'en jarliq bolba
206. basa muqali-da činggis-qahan ügülerün bida qor qonaq-jubur-un qutula-qan-nu debsegü saqlār-modun-a bawu'asu muqali-da tenggeri-yin ja'arin ja'aqsan üge temteg-ün tula bi tende gü'ün-qo'a-yi setkijü muqali-da üge baralu'a tewüber sa'uri de'ere sa'uju muqali-yin uruq-un uruq-a gürtele gür irgen-ü gui-ong boltuqai ke'en gui-ong nere ökba
muqali-gui-ong jewün qar-un qara'un-jidün-i derelegün-ü tümen medetügei ke'en jarliq bolba
207. činggis-qahan qorči-da ügülerün jönglejü namayi üčügen büküi-eče eji'e turuq noyitan nobsilduju köyiten köbsildüjü nendü qutuq bolju yabuba je či qorči tere čaq-tur ügülerün jöng jöb bolu'asu tenggeri-de setkil-tür gürgekde'esü nama qučin emestü bolqa ke'ele'e či edö'e jöb tula soyurqaju ede oroqsat irgen-ü sayin eme-yi sayin öki üjejü qučin emes songquju ab ke'en jarliq bolba
basa qorči qurban minqat ba'arin-u de'ere taqai asiq qoyar-lu'a adarkin-u činos tö'ölös telengüt bolun tüme dü'ürčü qorči medejü erdiš-qudus hoi-yin irgen-tür gürtele nuntuq darqalan nuntuqlaju hoi-yin irgen-i daru'ulun qorči tümen medetügei ke'en jarliq bolba
qorči-dača eye ügei'ü hoi-yin irgen eyin teyin bu yabutuqai eye üge'ü yabuqu-yi ya'u sa'araqdaqu ke'en jarliq bolba
208. basa činggis-qahan jürčedai-a ügülerün erkin tusa činu kereyit-lu'a qalaqaljit-elet qatqulduqui-tur herüjü büküi-tür quyildar anda aman aldaba je üyile inu jürčedei či üyiletba je üyiledürün jürčedei či dobtulju jirgin-i tübegen-i dongqayid-i  quri-silemün-i minqan turqa'ud-i erkit čeri'üd-i bügüde-yi daruju yeke qol-tur gürčü senggüm-ün enggesge qačar učumaq-ār qarbuqsan-u tula möngke tenggeri-de e'üden jilo'a negekdeba je senggüm-i ese sirqaqsan bö'esü yambar maqa bolqun büle'ei bida jürčedei-yi erkin yeke tusa tere bolba je tere qaqačaju qalqa huru'u newürün jürčedei-yi ündür a'ula-yin nemüra metü setkijü yabuqu büle'e
bi tere otču baljuna-na'ur usulara gürba je jiči baljuna-na'ur-ača morilarun jürčedei-yi alginčilaju kereyit-tür morilaju tenggeri qajar-a güčü nemekdejü kereyit irge maqutqaju dawuliba
erkit ulus ongjaldaju naiman merkit čirai-ban ququraju bayildun yadaju busangqaqdaba je merkit naiman-i busangqui so'or-tur kereyid-ün jaqa-gambu jirin ökid-ü'en siltag-iyar ö'er-ün qariyatan ulus-iyar-ān tumtaqa aqsan aju'u
 je nökö'e-te dayisun bolun qaqačaqsan-i jürčedei uduju arqa-bar jaqa-gambu-yi qaqačan buraqsan-i qartaju bariju bütü'ejü'ü je tere jaqa-gambu-yin ulus-i nökö'e-te ülütken talaba
jürčedei-yin nökö'e tusa inu ene bui je alalduqui üdür ami-yan öreksan-u tula üküldüküi üdür ölümleksen-ü tula činggis-qahan ibaqa-beki-yi jürčedei-ye soyurqaju ögürün ibaqa-da ügülerün čimayi ülige če'eji činu üge'üi üjesgüleng tala mawui ese ke'eba je bi ebür-tür köl-tür oroqsan jerge-tür jergelen bawuqsan čimayi jürčedei-ye soyurqarun yeke töre setkijü jürčedei-yin qatquldu'an üdür qalqa boluqsan-u dayisun gü'ün-tür dalda boluqsan-u qaqačaqsan ulus qamtutqaqsan-u  butaraqsan ulus bügütgeldüksen tusas-un inu törö setkijü čimayi ökba
mono qoyina minu uruq bidan-u oro sa'uju ene metü tusa kiksen töre setkijü minu üge busi ülü bolqan uruq-un uruq-a gürtele ibaqa-yin oro bu tasultuqai ke'en jarliq bolba
basa činggis-qahan ibaqa-da ügülerün jaqa-gambu ečige činu čimada qoyar ja'ut injes čimada asiq-temür bawurči alčiq bawurči qoyar ökčü büle'e
edö'e uru'ut irgen-tür či odurun geriyes-iyen nada injes-eče-'en asiq-temür bawurči-yan niken ja'un-i ökčü ot ke'ejü abu'at basa činggis-qahan jürčedei-e ügülerün ibaqa-yiyan čimada ökba
dörben minqat uru'ud-iyan či medejü ülü-'ü aqu či ke'en soyurqaju jarliq bolba
209. basa činggis-qahan qubilai-a ügülerün güčütü-yin güjü'ün bökö-yin bökse daruju ökba je či ede qubilai jelme jebe sübegetei ta dörben noqas-iyan setkiksen-tür jori'ulju ile'esü gür ke'eksen-tür gürü kemkelün qal ke'eksen-tür qada qaqalun čeügen čila'un-i čewülün  če'el usun-i nitulun abai je ta qubilai jelme jebe sübe'etei ta dörben noyas-iyan joriqsan qajar-a ilejü bo'orču muqali boroqul čila'un-ba'atur ede dörben külü'üd-iyen derge-de'en a'asu qatquldu'an üdür bolu'asu jürčedei quyildar qoyar-i uru'ut mangqud-iyar-ān urida'an bayi'ulu'asu bügüde setkil-iyen amuqu büle'e bi ke'eba
či qubilai čerig-ün üyile bügüde-yi aqalaju ülü-'ü aqu ke'en soyurqaju jarliq bolba
basa bedü'ün-ü mojirqaq-un tula bi mawuilaju yabuju minqan ese ökba
či imada jöb bui je čima-lu'a minqalaju  eyetüldüjü yabuqdaqu ke'eba
basa mono qoyina bedü'ün-i uqat je bida ke'eba
210. basa činggis-qahan genigedei qunan-a ügülerün ta bo'orču muqali teri'üten noyat-ta dödei doqolqu-tan čerbin-e ene qunan qara söni gendü činō gege'en üdür qara keri'e bolju newüqüi-tür ese ünjiksen ünjiküi-tür ese newüksen bosu gü'ün-lü'e busi ni'ur ese jübčiksen öštü gü'ün-lü'e ö'ere ni'ur ese jübčiksen qunan kökö-čos qoyar-ača eye üge'ü bu üyiletkün qunan kökö-čos qoyar-tur eyetüjü üyiletkün ke'en jarliq bolba
kö'üd-ün minu aqa joči bui je qunan geniges-iyen teri'ülejü joči-yin dōro tümen-ü noyan boltuqai ke'en jarliq bolba
qunan kökö-čos degei üsün-ebügen ede dörben üjeksen-iyen ülü ni'un sonosuqsan-iyan ülü qabčiqun büle'e
ede dörben bui je 211. basa činggis-qahan jelme-de ügülerün jarči'udai-ebügen gürege-ben ürčü jelme ölegei-te'e-če burqan-qaldun-ača bawuju irerün onan-nu deli'ün-boldaq-a namayi töreküi-tür buluqan nelke ökčü büle'ei tere nököčekse'er bosoqa-yin bo'ol e'üden-ü emčü bolba je jelme-yin tusa inu olon bui je töreküi-lü'e töröldüksen ösküi-lü'e esülčeksen buluqan nelke huja'urtu öljetü qutuqtu jelme yisün aldal alda'asu ere'ü-tür bu orotuqai ke'en jarliq bolba
212. basa činggis-qahan tolun-a ügülerün ečige kö'ün ö'ere minqa ker medegü büle'e
či ulus quriyaldun ečige-deče öröle ji'ür bolun jiktüldüjü ulus quriyalduqsan tula čerbi nere  ökba je edö'e ö'er-ün oluqsan jö'eksen-iyer-iyen ö'er-ün minqa bolju turuqan-tur eyetüldüjü ülü-'ü aqu či ke'en jarliq bolba
213. basa činggis-qahan önggür-bawurči-da ügülerün qurban toqura'ut tabun tarqut mönggetü-kiyan-u kö'ü či önggür čangsi'ut baya'ud-iyar ta nadur niken güre'en bolju či önggin budan-tur ese tö'öriba je či bulqa-tur ese qaqačaba je či noyitan nobsilduju köyiten köbsildüjü yabuba je či edö'e yambar soyurqal abqu či ke'e'esü önggür ügülerün soyurqal songqu'ulu'asu baya'ut aqa de'ü minu qari qari tutum-tur bura tara bui soyurqa'asu baya'ut aqa de'ü-yen či'ulqasuqai ke'e'esü je teyin baya'ut aqa de'ü-yen či'ulqaju či mede minqan ke'en jarliq bolba
basa činggis-qahan jarliq bolurun önggür boro'ul qoyar bara'un jewün ete'et ta qoyar bawurčin ide'en tüke'erün bara'un ete'et bayiqsan sa'uqsan-a ülü duta'ulun jewün ete'et jergeleksen eseksen-e ülü duta'ulun ta qoyar-i teyin tüge'e'esü minu qo'olai ülü qučin setkil amuyu edö'e önggür boro'ul qoyar morilaju yabuju ide'e olon gü'ün-e tüge'etkün ke'en jarliq bolba
sa'uri sa'urun yeke tüsürge-yin bara'un jewün ete'et ide'e basa'alaju sa'utqun tolun-tan-lu'a tüblen sa'utuqai ke'en sa'urin ji'aju ökba
214. basa činggis-qahan boroqul-a ügülerün eke minu sigi-qutuqu boroqul güčü kököčü ta dörben-ni irgen-ü nuntuq-ača köser-eče olju köl-dür-iyen dürüjü kö'üčilen asaraju teji'erün güjü'ün-eče tanu tataju gü'ün-lü'e sača'un bolqaju egem-eče  tanu tataju ere-lü'e sača'u bolqaju kö'üd-ü'en man-a nökör se'üder bolqasu ke'en teji'eba je tan-i teji'eksen hači-ban eke-de maqa minu kedüi hači tusa qari'ulba
ta boroqul nadur nököčeldüjü qurdun ayan-tur qura söni qo'osun ese qono'ulba je či sitü'eleldüjü büküi dayisun-tur šülen ügei ese qono'ulba je či basa ebüges ečige-yi baraqsat öšten kišten tatar irgen-i doraida'ulju ösöl ösön kisal kisan tatar irgen-i či'ün-tür ülijü ülitken kiduqui-tur alaqdarun tatar-un qargil-sira o'určaq bolun qarču jiči yadaju ölösčü oroju irejü eke-tür ger-te oroju sayi eri'ülsün buyu bi ke'ejü sayi eri'ülsün bö'esü tende sa'u ke'ekdejü höreneji iseri-yin ala'un-a üjü'ür-e sa'uju büküi-tür tolui tabun nasutu qadanača oroju irejü jiči güyijü qarču odun büküi-yi qargil-sira bosu'at kö'üken-i su'u-dur-iyan qabčiju qarču yabuju ayisurun kituqai-ban temteljü juqulun yabuqui-tur boroqul-un gergei altani-eke-yin ger-tür dorona sa'uju büle'e
eke qayilaju kö'ün baraba ke'eküi-lü'e altani uda'araldun güyijü qarulčaju qargil-sira-yin qoyinača güyičejü sibilger inu bariju nökö'e qar-iyar-iyan kituqai juqulun büküi qar inu bariju tataqui-lu'a kituqai-ban aldaju'ui ger-ün ümere jetei jelme qoyar muqular qara hüker jemlen alaju büküi-tür altani-yin dawun-tur jetei jelme qoyar süke bariju nudurqaš-iyan hula'adaju güyijü irejü tatar-un qargil-sira-yi süke-ber kituqai-bar mün tende alaju'ui altani jetei jelme qurban kö'ün-ü amin aburaqsan juldu temečeldü'esü jetei jelme qoyar ügülerün man-i ügei bö'esü ötör güyijü  gürčü ese ala'asu altani eme gü'ün yekin büle'e
kö'ün-ü amin-tur qor gürgegü büle'e
juldu man-u'ai bui je ke'eba
altani ügülerün minu dawun ese sonosu'asu ta ker irekün büle'ei namayi güyijü güyičejü sibilger inu bariju kituqai juquluqsan qar inu tataju kituqai ese aldaqsan bö'esü jetei jelme qoyar-i gürčü iretele kö'ün-ü amin-tur qor ülü-'ü gürgegü büle'e ke'eba
ügülen bara'asu juldu altani-yin bolba
boroqul-un gergei boroqul-tur nökö'e kilgün bolun tolui-yin amin-tur tusa bolba
basa boroqul kereyit-lu'a qalqaljit-elet qatqulduqui-tur ögödei suji'asu-ban sumun-a tusda'asu una'asu boroqul de'ere bawulduju haquqsan čisun inu ama-'ar-iyan simijü söni qonolduju manaqarsi morin-tur unu'ulju sa'un yadaqu-yi sundulaju ögödei-yin qoyinača teberijü bökleksen čisun simin simin aman-u jabaji-yar hula'adaju ögödei-yin amin esen gürgejü irejü büle'e
eke-yin minu teji'en jobaqsan hači qoyar kö'üd-ün minu amin-tur tusa bolba je boroqul nadur nököčejü darba'an uriya-dača dawun dem-eče ese qojidaba je boroqul yisün aldal alda'asu bu aldatuqai ke'en jarliq bolba
basa ökin urug-iyan soyurqal ögüya ke'eba
215. basa ökin urug-iyan soyurqal ögüya ke'eba
216. basa činggis-qahan üsün-ebügen-e ügülerün üsün qunan kökö-čos degei ede dörben üjeksen-i'en sonosuqsan-iyan  ülü ni'un qabčin ji'an aqun büle'ei uqaqsan setkiksen-iyen kelelen aqun büle'ei mongqol-un törö noyan mör beki bolqui yosun aju'ui ba'arin aqa-yin uruq büle'ei beki mör bidan-u dotora de'ere-eče beki üsün-ebügen boltuqai beki ergü'et čaqa'an de'el emüsčü čaqān aqta unu'ulju sa'uri de'ere sa'ūlju takiju basa hon sara sataju teyin atuqai ke'en jarliq bolba
217. basa činggis-qahan ügülerün quyildar anda qatquldu'an-tur ami-yan örejü urida aman ne'eksen-nü tusa-yin tula uruq-un uruq-a gürtele önöčid-ün abliqa abun atuqai ke'en jarliq bolba
218. basa činggis-qahan čaqān-qo'a-yin kö'ün narin-to'oril-a ügülerün ečige činu čaqān-qo'a minu emüne kiči'ejü qatqulduqu bolun dalan-baljut-ta qatqulduqui-tur jamuqa-da alaqdalu'a edö'e to'oril ečige-yü'en tusa önöčid-ün abliqa abtuqai ke'ekdejü to'oril ügülerün soyurqa'asu negüs aqa de'ü minu qari tutum bura tara bui soyurqa'asu negüs aqa de'ü-yü'en či'ulqasuqai ke'e'esü činggis-qahan jarliq bolurun teyin bö'esü negüs aqa de'ü-yen či'ulqaju či uruq-un uruq-a gürtele medejü ülü-'ü aqu ke'en jarliq bolba
219. basa činggis-qahan sorqan-sira-da ügülerün namayi üčugen čaq-tur tayiči'ud-un tarqutai-kirultuq aqa de'ü-de nayitaju bari'asu tende aqa de'ü-de'en nayitaqdamu ke'en sorqan-sira čila'un čimbai kö'üd-iyer-iyen qada'an-i ökin-iyen asara'ulju ni'uju aju namayi talbiju ileba je ta tere tusa sayin-i  tanu setkijü qara söni jewüdün-tür gege'en üdür če'eji-tür setkijü yabuba je bi ta je nadur tayiči'ud-ača uda'an-a ireba je edö'e bi tan-i soyurqa'asu yambar soyurqal ta'alaqun ta ke'eba
sorqan-sira čila'un čimbai kö'üd-iyer-iyen bolun ügülerün soyurqa'asu nuntuq darqalasu merkid-ün qajar selengge-yi nuntuqlaju darqalasu basa busu soyurqal činggis-qahan medetügei ke'eba
te'ün-tür činggis-qahan ügülerün merkid-ün qajar selengge-yi nuntuqlaju nuntuq ba
darqalatqun gü uruq-un uruq-a gürtele qorčila'ulju ötökle'üljü darqalatqun yisün aldal-tur ere'ü-tür bu orotuqai ke'en jarliq bolba
basa činggis-qahan čila'un čimbai qoyar-i soyurqarun erte čila'un čimbai qoyar-un ügüleksen üges setkijü ker qandaqu ta čila'un čimbai ta qoyar setkil-iyen ügülekün bö'esü duta'ui-ban quyiqun bö'esü ja'ura gü'ün-e bu keleletkün ö'er-ün beyes-iyer ama-'ar nadur ta ö'esüt setkiksen-iyen keleletkün duta'u-yu'an ö'esün quyitqun ke'en jarliq bolba
basa sorqan-sir'a badai kisiliq ta darqat basa darqalarun olon dayisun-tur hawulju olja olu'asu oluqsa'ar abutqun oro'a görö'esün-tür abala'asu alaqsa'ar abutqun ke'en jarliq bolba
sorqan-sira ke'e'esü tayiči'ud-un tödege-yin haran aju'ui je badai kisiliq qoyar ke'e'esü čeren-ü adu'učin aju'ui je edö'e minu turuq qorčila'ulju ötökle'üljü darqalan jirqatqun ke'en jarliq bolba
220. basa činggis-qahan naya'a-da ügülerün sirgötü-ebügen alaq naya'a kö'üt-lü'e-ben tan-lu'a tarqutai-kiriltug-i  bidan-tur bariju ayisurun ja'ura qutuqul-nu'u-da gürčü tende naya'a ügülerün tus qan-iyan ker tebčijü bariju otqun bida ke'ejü tebčin yadaju talbiju ilejü sirgötü-ebügen alaq naya'a kö'üt-lü'e-ben irejü tende naya'a-bilji'ür ügülerün tus qan-iyan tarqutai-kiriltug-i qartaju ayisurun jiči tebčin yadaju talbiju ilejü ba
činggis-qa'an-a güčü ögüre ireba
qan-iyan qartaju ire'esü tus qan-iyan qartaqsat haran mono qoyina ker itegekdekün ede ke'ekdekün ke'ejü'ü 
qan-iyan tebčin yadaba
ke'esü tende tus qan-iyan tebčin yadaqsan yosu yeke törö-yi setkijü'üi 
ke'en üge inu jöbsiyejü niken üyile-tür tüsiye ke'ele'ei edö'e bo'orču-da bara'un qar-un tümen medetügei muqali-da gui-ong nere ökčü jewün qar-un tümen mede'ülba
edö'e naya'a tüb-ün tümen medetügei ke'en jarliq bolba
221. basa jebe sübe'etei qoyar ö'er-ün oluqsat jö'ekse'er-iyen minqalatuqai ke'eba
222. basa degei qoniči-da bükde'ül-i či'ulqaju minqa mede'ülba
223. basa güčügür moči-da irge tutaqdaju endeče tendeče qubčiju jadaran-ača mulqalqu jük-iyer nököčelü'e güčügür mulqalqu qoyar niken-e minqalaju eyetüldüjü atqun ke'eba
224. ulus bayi'ululčaqsat jobolduqsad-i minqad-un noyat bolqaju minqa minqalaju minqad-un ja'ud-un harbad-un noyat tüsijü tüme tümelejü tümed-ün noyat tüsijü tümed-ün minqad-un noyat-ta soyurqal öktekün metüs-e soyurqal ökčü soyurqal  jarliq bolqun-a bolju činggis-qahan jarliq bolurun urida nayan kebte'ülsütü dalan turqaq kesiktentü büle'e
edö'e möngke tenggeri-yin güčün-tür tenggeri qajar-a güčü auqa nemekdejü gür ulus-i sidurqutqaju qaqča jilu'a-dur-iyan oro'uluqsan-tur edö'e nadur kesikten turqaq minqat minqad-ača ilqaju oro'ulutqun oro'ulurun kebte'ül qorčin turqaq oro'ulurun tümen dü'ürgen oro'ulutqun ke'en jarliq bolba
basa činggis-qahan kesikten ilqaju oro'ulqu-yi jarliq minqat minqat-ta tungqarun bidan-tur kesikten oro'ulurun tümed-ün minqad-un ja'ud-un noyad-un kö'üt düri-yin gü'ün-ü kö'üt ororun erdemütten  sil sayid-i bidan-u dergede yabuqun metüs-i oro'ultuqai minqad-un noyad-un kö'üd-i oro'ulurun harban nököttü niken de'ü inu daqa'ulju iretügei ja'ud-un noyad-un kö'üd-i oro'ulurun tabun nököttü niken de'ü-yi daqa'ulju iretügei harbad-un noyad-un kö'üd-i oro'ulurun düri-yin gü'ün-ü kö'üd-i oro'ulurun qurban nökörtü niken gü de'ü-yi daqa'ulju huja'ur-ača ula'a güčü jasaju iretügei bidan-tur dergede yabu'ulqun-i bökelerün minqad-un noyad-un kö'üt-te harban nököt huja'ur minqan ja'un-ača qubčiju öktügei ečige-yen ögüksen qubi kesik bö'esü inu beye qad-iyar oluqsan jö'eksen ere aqta kedüi bö'esü inu emčü qubi-ača anggida bidan-u kemleksen kem-iyer qubčiju teyin qubčiju jasaju öktügei ja'ud-un noyad-un kö'üt-te tabun nököt harbad-un noyad-un kö'üt-te düri-yin gü'ün-ü kö'üt-te qurban nököt mün gü yosu-'ar inu emčü qubi-ača anggida mün teyin qubčiju öktügei ke'en  jarliq bolba
minqad-un ja'ud-un harbad-un noyat olon gü'ün bidan-u ene jarliq gürge'ülü'et sonosu'at bürün dabaqun haran aldaltan boltuqai bidan-tur kesik oro'uldaqun haran bultariju ülü bolqun haran bidan-u dergede yabuqui-ban berkesiye'esü busu-yi oro'ulju tere gü'ün-i ere'ülejü nidün-ü ečine qolo qajar-a ileya ke'en jarliq bolba
dotona bidan-u dergede yabuju surulčasu ke'ejü bidan-tur irekün haran-i bu itqatuqai ke'eba
225. činggis-qa'an-u jarliq boluqsa'ar minqad-ača ilqaju ja'ud-un harbad-un noyad-un kö'üd-i mün gü jarlig-iyar ilqaju qarqaju irejü urida nayan kebte'ül büle'ei naiman ja'ut bolqaba
naiman ja'ut de'ere minqa dü'ürgetügei ke'eba
kebte'ül-tür oroqun-i bu itqatuqai ke'en jarliq bolba
kebte'ül-i yeke-ne'ürin aqalaju minqa medejü atuqai ke'en jarliq bolba
urida dörben ja'ut qorčin ilqaba
ilqaju qorčin-i jelme-yin kö'ün yisün-te'e aqalaju tüge-yin kö'ün bügidei-lü'e eyetüldüjü atuqai ke'eba
turqa'ut-lu'a qorčin kesik kesik-tür oroldurun yisün-te'e niken kesik qorčin-i aqalaju orotuqai bügidei niken kesik qorčin-i aqalaju orotuqai horqudaq niken kesik qorčin-i aqalaju orotuqai lablaqa niken kesik qorčin-i aqalaju orotuqai qor aqsaqui-a turqa'ud-un kesik kesik qorčin-iyan teyin aqalaju oro'ultuqai qorčin-i minqan dü'ürgejü yisün-te'e aqalaju atuqai ke'en jarliq bolba
226. urida ögele-čerbi-lü'e oroqsat turqa'ut de'ere minqan dü'ürgejü bo'orču-yin uruq-ača ögele-čerbi medetügei ke'eba
niken minqan turqa'ud-i muqali-yin uruq-ača buqa niken minqan turqa'ud-i medetügei ke'eba
ilügei-yin uruq-ača alčidai-yi niken minqan turqa'ud-i medetügei ke'eba
niken minqan turqa'ud-i dödei-čerbi medetügei niken minqan turqa'ud-i doqolqu-čerbi medetügei ke'eba
niken minqan turqa'ud-i jürčedei-yin uruq-ača čanai medetügei niken minqan turqa'ud-i alči-yin uruq-ača aqutai medetügei niken minqan turqa'ud-i arqai-qasar niken minqan ilqaqsan ba'atud-i medejü olon üdür turqaq boltuqai qatquldu'an üdür urida bayiju ba'atut boltuqai ke'en jarliq bolba
minqat minqad-ača ilqaju irekset naiman minqat turqa'ut bolba
kebte'ül qorčin-lu'a qoyar gü minqat bolba
tümen kesikten bolba
činggis-qahan jarliq bolurun bidan-u ča'ada tümen kesikten-i bökelejü yeke qol bolun atuqai ke'en jarliq bolba
227. basa činggis-qahan jarliq bolju turqa'ud-un dörben kesi'üd-ün ötögülegün-i tüsirün buqa niken kesik kesikten-i medejü kesikten-i jasaju orotuqai alčidai niken kesik kesikten-i medejü kesikten-i jasaju orotuqai dödei-čerbi niken kesik kesikten-i medejü kesikten-i jasaju orotuqai doqolqu-čerbi niken kesik kesikten-i medejü kesikten-i jasaju orotuqai ke'en dörben kesi'üd-ün ötögüs-i tüsijü kesik oroqui jarliq tungqarun kesik ororun kesig-ün noyan ö'er-tür-iyen kesiklekset kesikten-i bügütkejü kesik oroju qurban qonolduju ye'ütkeldütügei kesiktü gü'ün kesik ho'ara'asu tere kesik o'araqsan kesiktü-yi  qurban beri'es süyitügei mün kesiktü basa nökö'e-te kesik ho'ara'asu dolo'an beri'es süyitügei basa mün gü'ün beye qat ebečin ügei kesig-ün noyat-tur eye üge'ü basa mün kesiktü qurban-ta kesik ho'ara'asu qučin dolo'an beri'es söyü'et bidan-tur yabuqui-ban berkesiyen aju'u
ečine qolo qajar-a ileya ke'en jarliq bolba
kesi'üd-ün ötögüs quta'ar quta'ar kesik-tür ene jarliq kesikten-e sonosqatqun ese sonosqa'asu kesi'üd-ün ötögüs aldaltan boltuqai jarliq sonosu'at bürün daba'asu jarliq-un yosu-'ar kesik ho'ara'asu kesikten aldaltan boltuqai ke'en jarliq bolba
kesi'üd-ün ötögüs aqalaqdaba
ele ke'en sača'un oroqsat minu kesikten-i nadača eye ügei bu hončidutqun jasaq könde'esü nada ji'atqun mököri'ülkün yosutan bö'esü bida mököri'ülü je nisiqdaqun yosutan bö'esü kebte'üljü nisit je aqalaba
ele ke'ejü sača'un kesikten-i minu ö'er-ün qar köl gürgejü beri'edesü beri'e-yin qari'u beri'e gü nudurqa-yin qari'u nudurqa gü qari'ultuqai ke'eba
228. basa činggis-qahan jarliq bolurun qadanadus minqad-un noyad-ača minu kesiktü de'ere bui je qadanadus ja'ud-un harbad-un noyad-ača minu kesiktü-yin kötöčin de'ere bui je minu kesikten-tür qadanadus minqali'ut sača'un bolju denggečen minu kesiktü-tür kereldü'esü minqali'udai gü'ün-i ere'üleya ke'en jarliq bolba
229. basa činggis-qahan jarliq bolurun kesik kesi'üd-ün noyat-ta jarliq tungqarun qorčin turqa'ut kesik oroju üdür-ün  yabudal jük jük mör mör-tür-iyen yabuju naran-u qaltai-a kebte'ül-e jayilaju qadana qarču qonotuqai bidan-tur söni kebte'ül qonan atuqai qorčin qor bawurčin ayaqa saba
kebte'ül-e ta'ulju ottuqai qadana qonoqsat qorčin turqa'ut bawurčin bidan-i šülen idetele kirü'e-tür sa'uju kebte'ül-tür kelečilejü šülen iden bara'asu qorčin qor-tur turqaq sa'urin-dur-iyan bawurčin ayaqa saba-dur-iyan ta'araldutuqai kesik kesik oroqun mün mün yosu-'ar ene qa'uli-bar teyin kitügei ke'en jarliq bolba
naran singgeksen-ü qoyina ordo-yin qoyina'un urida'un ketügeljen yabuqu gü'ün-i bariju kebte'ül bariju qonoju manaqari kebte'ül üges inu asaqtuqai kebte'ül kesik ye'ütkeldürün belge anu da'ulju oroju iretügei ye'ütgejü qarqun kebte'ül ta'ulju gü qarču ottuqai ke'eba
kebte'ül söni ordo horčin gebtejü e'üten daruju bayiqsat kebte'ül söni oroqun haran-i ekit anu dalbaru mürüs anu ba'utala čabčiju o'orutqun ya'aral keleten haran söni ire'esü kebte'ül-tür kelelejü ger-ün ümereče kebte'ül-lü'e qamtu bayiju kelele'ültügei ke'eba
kebte'ül-eče de'ere sa'uri ken ber bu sa'utuqai kebte'ül-eče kelen ügei ken ber bu orotuqai kebte'ül-ün dege'ün ken ber bu yabutuqai kebte'ül-ün jaqa'un bu yabutuqai kebte'ül-ün to'a bu asaqtuqai kebte'ül-ün dege'ün yabuqun haran-i kebte'ül barituqai jaqa'un yabuqun haran-i kebte'ül barituqai to'a asaquqsan gü'ün-i kebte'ül tere gü'ün-i tere gü üdür-ün unuqsan aqta eme'eltü qadārtu-yi emüsüksen qubčasun selte kebte'ül abtuqai ke'en jarliq bolba
eljigedei itegeltü bö'etele jilda kebte'ül-ün dege'ün yabuqu bolun kebte'ül-e ker bariqdala'a 230. činggis-qahan ügülerün e'ületei söni örügetei ger minu e'eren kebtejü örük nuta unta'ulju ene oron-tur gürgeksen ötögüs kebte'ül minu hodutai söni ordo ger minu horčin kebtejü oron dotora ese oqjatqaqsan öljeitan kebte'ül minu üntür oron-tur gürgeba
siljirin büküi boro'on-a silgütken büküi jü'en-e čitqun büküi qura-da siltesütei ger minu horčin jirin  ülü kin bayiju jirüge amu'uluqsan čing setkilten kebte'ül minu jirqalang oron-tur gürgeba
ibulun büküi dayisun dotora irgetei ger minu horčin hirmes ülü kin itqaju bayiqsat itegelten kebte'ül minu uyilsun qor ubis kiküi-tür udal ügei bayidaltan uriyarqun kebte'ül minu qutan qor qubis kiküi-tür qojit ese bayiqsat qurdun yabudaltan kebte'ül minu öljeiten kebte'ül minu ötögüs kebte'ül ke'ekdün ögöle-čerbi-lü'e oroqsat dalan turqag-i yekes turqa'ut ke'ekdün arqai-yin ba'atud-i ötögüs ba'atut ke'etkün yisün-te'e bügidei-tan qorčin-i yekes qorčin ke'etkün ke'en jarliq bolba
231. yeren tabun minqad-ača minu beye ča'ada emčülen ilqaju irekset tümen emčü kesikten-i minu mona qoyina minu oro sa'uqsan kö'üt uruq-un uruq-a minu ede kesikten-i geri'es metü setkijü ülü gemüri'ülün sayitur asaratqun ede tümen kesikten-i minu nendü'üt qutuq ke'ejü ülü-'ü aqdu'ai ke'eba
232. basa činggis-qahan ügülerün ordo-yin čerbin ökid-i  ger-ün kö'üt teme'ečin-i hükečin-i kebte'ül basa'alaju ordo-yin ger tergen-i asaratuqai tuq gü'ürge dōro jida kebte'ül asaratuqai ayaqa saba
kebte'ül gü asaratuqai bidan-u undān ide'en-i kebte'ül daruqalatuqai ötken ber miqan ide'en-i kebte'ül daruqalaju bolqatuqai undān ide'en-i qor qomsa bolu'asu daruqalaqdaqsat kebte'ül-eče eriya ke'eba
qorčin undān ide'en tüke'erün daruqalaqsat kebte'ül-eče eye ügei bu tüketügei ide'e tüge'erün urida kebte'ül-eče teri'ülen tüge'etügei ke'eba
ordo ger-tür oroqu qarqu-yi kebte'ül jasatuqai e'üten-tür kebte'ül-ün e'üdečin ger ča'ada bayituqai kebte'ül-eče qoyar oroju yeke tüsürge barin atuqai ke'eba
kebte'ül-eče nuntu'učin yabuju ordo ger bawūltuqai ke'eba
bidan-i sibawulaqui abalaqui-tur kebte'ül bidan-lu'a sibawulaldun abalaldun yabutuqai tergen-tür jarimud-iyan čaqlaju talbituqai ke'eba
233. basa činggis-qahan ügülerün bidan-u beye čerik ese qaru'asu kebte'ül bidan-ača anggida čerik bu qartuqai ke'eba
eyin ke'e'ülü'et jarliq dabaju kebte'ül-i nayitaju čerik qarqaqun čerik medegü čerbin aldaltan boltuqai ke'en jarliq bolba
kebte'ül-ün čerik ker ülü qarqaqdamui ke'emüi je ta kebte'ül-lü minu altan amin sakimui sibawulan abalan yabuqui-tur joboldumui ordo qadaqala'uldaju newüküi-tür örük-tür terge asaramui minu beye sakiju qonoqu kilbar-ū bui ger tergen yeke a'uruq newüküi-tür sa'uqui-tur asaraqui kilbar-ū bui teyin dabqur qaqas qaqas yabudaltan ke'ejü bidan-ača anggida ö'ere čerik bu yabutuqai  ke'eküi teyimü bui je ke'ejü'üi 
234. basa jarliq bolurun sigi-qutuqu-lu'a jarqu kebte'ül-eče jarqu sonosulčatuqai ke'eba
kebte'ül-eče qor numu quyaq jebe asaraju tüge'eldütügei aqtas-ača asaraju hö'ösin ačiju yabutuqai ke'eba
kebte'ül-eče čerbin-lü'e a'urasu tüge'eldütügei ke'eba
qorčin turqa'ud-un nuntuq ji'arun yisün-te'e bükidei-tan qorčin alčidai ögöle aqutai-tan turqa'ut ordo-yin bara'un ete'et yabutuqai ke'eba
buqa dödei-čerbi doqolqu-čerbi čanai-tan turqa'ut ordo-yin jewün ete'et yabutuqai ke'eba
arqai-yin ba'atut ordo-yin urida yabutuqai ke'eba
kebte'ül ordo ger terge asara'at ordo-yin dergede jewün ete'et yabutuqai ke'eba
bürin kesikten turqa'ud-i ordo horčin ordo-yin ger-ün kö'üd-i adu'učin qoničin temečin hükečin-i ordo darun dödei-čerbi uqaju atuqai ke'en tüsiba
dödei-čerbi darun aju ordo-yin qoyinača qoq idejü qoma'ul tülejü yabutuqai ke'en jarliq bolba
235. qubilai-noyan-i qarlu'ut-tur ča'ura'ulba
qarlu'ud-un arslan-qan qubilai-tur elsen irejü'üi 
qubilai-noyan arslan-qan-i abu'at irejü činggis-qahan-tur a'ulja'ulba
ese bulqaba ke'en činggis-qahan arslan-i soyurqaju öki ögüye ke'en jarliq bolba
236. sübe'etei-ba'atur temür telegetü merkid-ün toqto'a-yin qutu čila'un teri'üten kö'üd-i inu neken ča'uraju čui-müren-e güyičejü muqutqaju ireba
237. jebe naiman-u güčülük-qan-i nekejü sariq-qun-a güyičejü güčülük-i muqutqaju ireba
238. ui'ud-un idu'ut činggis-qahan-tur elčin ilejü'ü 
at-kiraq  darbai qoyar elčin-iyer öčijü ilerün e'ülen arilju eke naran üjeksen metü mölsün arilju müren usun oluqsan metü činggis-qa'an-u nere aldar sonosču masi bayasba
činggis-qahan soyurqa'asu altan büse-yin qorgi-dača al de'el-ün hürtesün-eče olu'asu dabtu'ar kö'ün činu bolju güčü öksü ke'en öčijü ilejü'üi 
tere üge-tür činggis-qahan soyurqaju qari'u ügülejü ilerün öki ber ögüya dabtu'ar kö'ün boltuqai altan mönggü subut tanas načit dardas torqat abu'at idu'ut iretügei ke'ejü ilebesü idu'ut soyurqaqdaba ke'en bayasču altan mönggü subut tanas torqat načit dardas a'urasun abu'at idu'ut irejü činggis-qahan-tur a'uljaba
činggis-qahan idu'ud-i soyurqaju al-altun-i ökba
239. ta'ulai jil joči-yi bara'un qar-un čeri'üd-iyer hoi-yin irgen-tür morila'ulba
buqa qajarčilaju otba
oyirad-un quduqa-beki tümen-oyirad-un urida elsen oroju ireba
irejü joči-yi uduritču tümen-oyirat-dur-iyan qajarčilaju siqsit-tur oro'ulba
joči oyirat buriyat barqun ursut qabqanas qangqas tubas-i oro'ulu'at tümen-kirgisut-tur gürü'esü kirgisud-un noyat yedi-inal aldi-er örebek-digin kirgisud-un noyat elsen oroju čaqa'a-nu'ut singqot čaqa'a-nu'ut aqtas qara-nu'ut buluqat abu'at irejü joči-da a'uljaba
sibir kesdim bayit tuqas tenlek tö'eles tas bajigid-ača inaqsi hoi-yin irgen-i joči oro'ulju kirgisud-un tümed-ün minqad-un noyad-i hoi-yin irgen-ü noyad-i abu'at irejü činggis-qahan-tur čaqa'a-nu'ut singqod-iyar čaqa'a- nu'ut aqtas-iyar qara-nu'ut buluqad-iyar a'ulja'ulba
oyirad-un quduqa-beki-yi uqtun urida elsen tümen-oyirad-iyan uduridun ireba ke'en soyurqaju kö'ün-e inu inalči-da čečeyigen-i ökba
inalči-yin aqa törölči-da joči-yin öki qoluiqan-i ökba
alaqa-beki-yi önggüt-da ökba
činggis-qahan joči-yi soyurqaju ügülerün kö'üd-ün minu aqa či ger-teče sayi qarču mör sayitu oduqsan qajar-a ere aqta-yi ülü sirqan ülü joba'an öljeitü hoi-yin irgen-i oro'ulju ireba
či irge čimada öksü ke'en jarliq bolba
240. basa boro'ul-noyan-i qori-tumat irgen-tür ča'ura'ulba
tumat irgen-ü noyan daiduqul-soqor-i ükü'esü eme inu botoqui-tarqun tumat irgen-i medejü aju'u
boroqul-noyan gürčü qurban haran yeke čerig-eče urida yabura otču üde jilda uqamsar berke hoi-tur horum-iyar yabuqun bolun qara'ul-a anu qoyina'un dermettejü horum bo'oju boroqul-noyan-i bariju alaju'ui tumat boroqul-i alaju'ui ke'en medejü činggis-qahan masi kilinglaju ö'esün morilan tu'urbi'asu bo'orču muqali qoyar činggis-qa'an-i bayitala itqaba
jiči dörbetei dörbei-doqsin-i tüsirün čerik qatangqui-a jasaju möngke tenggeri-yi jalbariju tumat irgen-i oro'ulun sori ke'en jarliq bolba
dörbei čerik jasarun urida čerig-ün yabuqu qara'ul-un sakiqu mör horum sübes-tür hoqtorqui erbegelje'üljü  hula'an buqa-yin yabuqsan mör-iyer čeri'üt-tür jasaqlarun čerig-ün to'otu gü'ün jirüge yada'asu nisiquya ere-tür harban müsüt ürge'üljü süke uqali kirü'e si'üči ere-yin jer jebsek jasa'ulju hula'an buqa-yin yabuqsan mör-iyer mör-tür  bayiqsan modut hoqtočin čabči'ulju kirügede'üljü mör bolqaju a'ula de'ere qaru'asu tumat irgen-ü erüge de'ereče genet qurimlan sa'uqui-tur dawuliba
241. urida qorči-noyan quduqa-beki qoyar tumat-ta bariqdaju botoqui-tarqun-tur tende aju'u
qorči-yin bariqdaqu yosun tumat irgen-ü ökit qo'astan qučin emes abtuqai ke'en jarliq boluqsan-tur tumat irgen-ü ökit abqu ke'en otqu bolun urida elsekset irgen jiči bulqa bolju qorči-noyan-i bariju'ui qorči tumat-da bariqdaju'u ke'en činggis-qahan medejü hoi-yin irgen-ü yabudal quduqa medemü je ke'ejü ile'esü quduqa-beki basa bariqdaju'u
tumat irgen-i oro'ulun bara'asu boroqul-un yasun-u tula ja'un tumad-i ökba
qorči qučin ökid-i abuba
quduqa-beki-de botoqui-tarqun-i ökba
242. činggis-qahan jarliq bolju eke-de kö'üt-te de'ü-ner-e irge qubiyaju ögüye ke'en ögürün ulus quriya'an jobaqsat eke buyu je kö'üd-ün minu aqa joči bui je de'ü-ner-ün minu nilqa otčigin bui je ke'ejü eke-de otčikin-u qubi ki'et tümen irge ökba
eke čimatču ese dorigqotba
joči-de yisün minqat irge ökba
ča'adai-a naiman minqat irge ökba
ögödai-a tabun minqat irge ökba
tolui-a tabun minqat irge ökba
qasar-a dörben minqat irge ökba
alčidai-a qoyar minqat irge ökba
belgütai-ya niken minqan tabun ja'ut irge ökba
da'aritai gereyit-lu'a bolulčaba ke'en nidün-ü ečine ečitgeya ke'ebesü bo'orču muqali sigi-qutuqu qurban ügülerün ö'er-ün qal-iyan sönö'egü  metü ö'er-ün ger-i'en ebdegü metü sayin ečige-yin činu geri'es qaqča abaqa činu qočorču amu ker tebčigü inu ese uqaqsan-tur bütügei sayin ečige-yin činu nilqa nuntuq hüni butara'ulčaju atuqai ke'ekdejü qabar-ača hüni qangsitala qaqas kelelekdejü je deli ke'en sayin ečige-yi setkijü bo'orču muqali sigi-qutuqu qurban-u kelen-tür amurliba je 243. bi eke-de otčikin-a tümen irge ökčü noyad-ača güčü kököčü jungsai qorqasun dörben-i tüsiba
joči-da qunan möngke'ür kete qurban-i tüsiba
ča'adai-tur qaračar möngke idoqudai qurban-i tüsiba
basa činggis-qahan ügülerün ča'adai keče'ü buyu narin aburitu buyu köke-čos üde manaqar dergede aju setkiksen-iyen kelelen atuqai ke'en jarliq bolba
ögödei-tür ilüge degei qoyar-i tüsiba
tolui-tur jedei bala qoyar-i tüsiba
qasar-tur jebke-yi tüsiba
alčidai-tur ča'urqai-yi tüsiba
244. qongqotadai mönglik-eči'e-yin kö'üt dolo'an büle'ei dolo'an-u dumdadu kököčü teb-tenggeri büle'e
tede dolo'an qongqotan qasar-i ömerejü jančiju'ui qasar dolo'an qongqotan-a ömerejü jančiqda'a ke'en činggis-qa'an-a sögödü'esü činggis-qahan busut-tur kilinglaju aqui dumda kelelegü bolun činggis-qahan kiling-dur-iyan qasar-i ügülerün amitu-da ülü ilaqdaqu-ača büle'e
či ker ilaqda'a či ke'ekdejü qasar nilbusu alda'at bosču yorčiju qasar ma'uilaju qurban üdür ese ireba
tende teb-tenggeri činggis-qa'an-a ügülerün möngke tenggeri-yin jarliq qan ja'arit ügülemü niken-te temüjin ulus barituqai ke'emü  niken-te qasar-i ke'emü qasar-i ese nende'esü mede'e ügei bui je ke'ekdejü činggis-qahan mün söni morilaju qasar-i barira odu'asu güčü kököčü qoyar qasar-i barira otba ke'en eke-de ja'aju'u
eke mede'et söni bö'et uda'aran čaqa'an teme'en köljü qara'utai tergetei söni-de dülin yorčiju naran urququi-lu'a gürü'esü činggis-qahan qasar-un qančut huyaju maqalai büse inu abču üge inu asaqun büküi-tür eke-de gürtejü činggis-qahan geyekčü eke-deče emi'eba
eke a'urlaju gürčü tergen-eče bawu'at eke ö'esün qasar-un huyaqsat qančut dalju talbi'at maqalai büse inu qasar-a ökčü eke kilinglaju a'ur-iyan darun yadan jabilan sa'uju qoyar kököd-iyen qarqaju qoyar ebüdük dege'ün bisari'ulju ügülerün üjebe-yü kököksen köken tanu ene bui ede qadalun da'un qarbisu-'an qajaqsat küi-iyen tasuluqsat qasar yekibe temüjin ene niken kökö minu baraqu büle'e
qači'un otčigin qoya'ula bolju niken kökö ülü baraqu büle'e
qasar bürün qoyar büri kököt minu baraju če'eji minu a'ui boltala amurli'ulju če'eji a'ui bolqaqu büle'e
te'über erdemtü temüjin minu če'eji erdemtü qasar minu qabu güčü erdemtü tula qarbučaju qaruqsan-i qarbuju oro'ulqu büle'e
oqjatču qaruqsan-i hontučaju oro'ulqu büle'e
edö'e daisun gü'ün-i muqutqaba ke'ejü qasar-i üjen yadamui ta ke'eba
eke-yi amurli'ulun baraju činggis-qahan ügülerün eke-yi kilinglaqdaju ayun ba
ayuba
hičen ba
hičeba
bi ke'ejü ičuya bida ke'ejü ičuba
eke-de ülü mede'ülün ečine'ün qasar-un irge inu abču qasar-a mingan dörben ja'ut irge ökba
eke medejü tere setkil-tür ötör dötöleksen yosun teyimü jalayirtai jebke tende qulajiju barqujin oron buru'utba
245. te'ün-ü qoyina yisün keleten irgen teb-tenggeri-tür quriju činggis-qa'an-u kirü'e-deče olon teb-tenggeri-tür quriqun bolba
teyin quriqui-tur temüge-otčigin-a qariyatan irgen teb-tenggeri-tür otču'ui otčigin-noyan oduqsan irge-ben quyira soqor neretü elči-yen ilejü'üi 
teb-tenggeri soqor elči-de ügülerün otčigin ta jirin elčiten bolju'ui ke'ejü soqor elči-yi inu ašgiju yabuqan eme'el inu urgejü qari'ulju'ui otčigin soqor elči-yen ašgiju yabuqan ilekdejü manaqarsi otčigin ö'esün teb-tenggeri-tür otču ügülerün soqor elči-yen ile'esü ašgiju yabuqan ilejü'ü 
edö'e bi irge-ben quyira ireba ke'ekdejü dolo'an qongqotan otčigin-i endeče tendeče qa'aju soqor elči-yen ilegü činu jöb bui ke'ejü bariqu-ača tusqu-ača kikderün ayuju otčigin-noyan ügülerün elči ilegü minu'ai buru'u ke'ejü'ü 
dolo'an qongqotan ügülerün buru'u bö'esü namančilan sögöt ke'ejü teb-tenggeri-yin qoyinača sögötgejü'üi 
irge-ben ba
ese öktejü otčigin manaqarsi erte činggis-qa'an-i bosu'ai üdü'üi-e oron dotora büküi-tür oroju uyila'at sögötčü ügülerün yisün keleten irgen teb-tenggeri-tür či'uldaju nada qariyatan irge-ben teb-tenggeri-deče quyura soqor neretü elči ilelü'e soqor elči-yi minu ašgiju yabuqan eme'el ürgejü ilekdejü bi ö'esün quyira odu'asu dolo'an qongqotan-a endeče tendeče qa'aju namančila'ulju teb-tenggeri-yin qoyinača sögötke'üldeba
ke'et uyilaba
činggis-qa'an-i dongqodu'ai üdü'üi- e börte-üjin oron dotora öngdeyijü sa'uju könjile-yiyen jaqa-bar ebče'ü-ben tüyitčü otčigin-u uyilaqu-yi üjejü nilbusu alda'at ügülerün yekikset qongqotan tede öčigen qasar-i ömörejü jančiju gü büle'ei edö'e basa ene otčigin-i yekin qoyinača-'an sögötgemüi yambar yosun bolumui bel ede čigöt narat metüs de'ü-ner-i činu eyin oyisulaldumui ünen ber mono qoyina ne'üle metü beye činu negüs odu'asu netkel metü ulus činu ken-e mede'ülkün tede tulu metü beye činu tulbas odu'asu tuyal metü ulus činu ken-e mede'ülkün tede čigöt narat metü de'ü-ner-i činu eyin oyisulatqun haran minu qurban dörben üčüget mawun mandutala minu ya'u mede'ülkün tede yekikset qongqotan büle'e
tede de'ü-ner-iyen teden-e teyin ki'üljü ker üjejü amu či ke'e'et börte-üjin nilbusun aldaba
börte-üjin-ü ene üge-tür činggis-qahan otčigin-a ügülerün teb-tenggeri edö'e iregü čidaqui-ača ker ba
üyiletdü'esü či mede ke'eba
te'ün-tür otčigin bosu'at nilbusu-'an arči'at qarču qurban bökös-i beletčü bayiba
qurumut atala mönglik-ečige dolo'an kö'üt-lü'e-ben irejü dolo'an büri oroju teb-tenggeri tüsürge-yin bara'un ete'et sa'uqui-lu'a otčigin teb-tenggeri-yin jaqa inu bariju öčigen üdür namayi namančilan büle'e
či sorilduya ke'ejü jaqa inu bariju e'üten jük čirba
teb-tenggeri otčikin-u esergü jaqa bariju barilduba
teb-tenggeri-yin (yin) maqalai barilduqui-tur qolumta teri'ün-e unaba
mönglik-ečige maqalai inu abču hünüsčü ebür-tür-iyen talbiba
činggis-qahan ügülerün qarču bökö güčü  temečeldütkün ke'eba
otčigin teb-tenggeri-yi čirčü qarurun e'üten bosoqa ja'ura urida beledüksen qurban bökös esergü teb-tenggeri-yi bari'at čirčü qarču niru'u inu ququlju jewün ete'ed-ün terged-ün üjü'ür-e o'orču otčigin oroju ügülerün teb-tenggeri namayi namančilan büle'e
sorilduya ke'esü ülü bolun arqalaju gebtemü čaqtu nökör aju'u
ke'esü mönglik-ečige uqaju nilbusu alda'at ügülerün dayir etügen-i danglasun-u tedüi büküi-eče dalai müren-i qoroqan-u tedüi büküi-eče nököčeba
bi ke'eküi-lü'e jirqo'an qongqotan kö'üt inu e'üten bosoju  qolumta to'orin bayiju qančud-iyan simaliqaqdarun činggis-qahan gereljü siqaqdaju jayila qaruya ke'e'et qarqu-lu'a činggis-qa'an-i horčin qorčin turqa'ut to'orin bayiba
teb-tenggeri-yi terged-ün üjü'ür-e niru'u ququlju o'oruqsan-i činggis-qahan üjejü qoyitu'ul-ača niken boro qosiliq abčira'ulju teb-tenggeri-yin de'ere inu talbi'ulju kölge oro'ulutqun newüya ke'ejü tendeče newüba
246. teb-i talbiqsan qosiliq-un erüge tülijü e'üten daruju hara saki'ulu'asu qutu'ar söni üdür sira-da ger-ün erüge ne'ejü beye selte qarču'u bolqa'asu maqat teb inu tende bolqaqdaba
činggis-qahan ügülerün teb-tenggeri de'ü-ner-tür minu qar köl gürgeksen-ü tula de'ü-ner-ün minu ja'ura oro ügei jinggügü-yin tula tenggeri-de ese ta'alaqdaju ami-yan beye selte abču otdaba je ke'eba
činggis-qahan mönglik-ečige-yi tende dongqodurun kö'üd-ü'en aburi ülü itqan denggečen setkikün bolun teb-tenggeri-yin teri'ün-tür gürba
ta tanu teyimü aburi uqaqsan bö'esü  jamuqa altan qučar-tan-u yosutan bolqaqtaqun büle'ei ta ke'ejü mönglik-ečige-yi dongqotču dongqodun baraju jiči manaqaru ügüleksen-i üdesi hudaru'asu üde-yin ügüleksen-i manaqar hudaru'asu hičere maqa ke'ekdegü ele urida üge baraqdalu'a je teli ke'en soyurqaju jiči jaliraba
alus aburi-yan tataqsan bö'esü mönglik-ečige-yin uruq-tur ken denggečekün büle'ei ke'eba
teb-tenggeri-yi ügei bolqa'at qongqotan čirai jibturaju'ui je 247. te'ün-ü qoyina činggis-qahan qonin jil kitat irgen-tür morilaba
vujiu-yi abču hünegen-dabā-'ar dabaju söndeivu-yi abču jebe güyigünek-ba'atur qoyar-i manglai ileba
čabčiyal gürčü čabčiyal-daba'an-i bekilekdejü tende jebe ügülerün ani uduju gödölgejü ire'ülün tende soriya ke'ejü qariba
qariqdaju kitad-un čeri'üt nekeye ke'en čölke a'ula bütetele nekejü ayisi söndeivu-yin qosi'un-a gürčü jebe qoyinaqsi hurba? tataju dobtulju sundurču ayisuqun dayin-i daruba
činggis-qahan qol čerik daručaju kitad-i gödölgejü qara-kidad-un jürčed-ün jüyin-ü erekün omoqun čeri'üd-i daruju čabčiyal-a gürtele hünji'ü bayitala kiduju čabčiyal-un qa'alqa jebe abču daba'at buliju dabaju činggis-qahan sira-dektür bawuba
jungdu-yi e'erejü qotot qotot balaqat-tur čeri'üt ilejü e'ere'ülba
jebe-yi dungčang-balaqasun e'ere'ülün ileba
dungčang-balaqasun-tur gürčü e'erejü abun yadaju qariju jirqo'an qonoq qajar-a gürčü genetgejü jiči qarin tata'at qar kötöltan söni düliligejü genet  büküi-tür gürčü dungčang-balaqasu abu'ai 248. jebe dungčang-balaqasun-i abču qariju irejü činggis-qahan-tur neyileba
jungdu-yi e'erekderün altan-qan-u yeke noyan ongging-čingsang altan-qan-a duratqarun tenggeri qajar-un jaya'an čaq yeke oro ye'ütgeküi čaq-u'u gürba
mongqol masi güčütei-e irejü bidan-u erekün omoqun qara-kitad-un jürčed-ün jüyin-ü erkit čeri'üd-i daruju büreltele kiduju'ui itegeltü čabčiyal-i ber buliju abču'ui edö'e bida basa čeri'üt jasaju qarqa'asu basa mongqol-a daruqda'asu qala'ar balaqat balaqat-dur-iyan butaraqun tede jiči bidan-a qura'ulu'asu ülü bolun bidan-tur dayisun bolju ülü nököčekün tede altan-qan-i soyurqa'asu mongqol-un qan-tur edö'et-tür elsen eyetüye eye-tür oroju mongqol-i iču'asu ičuqaqsan-u qoyina basa busu setkil bida tende eyetüldüt je mongqol-un ba
ere aqta qajar he'üsiyejü kölčirgemüi ke'ekdemüi qan-a inu öki ögüye altan mönggün a'urasut et čerig-ün gü'ün-e kündü-te qarqaju ögüye ene eye-tür manu oroqu ülü-'ü-yi ker medekdegü ke'en duratqa'asu altan-qan ongging-čingsang-un ene üge jöbsiyejü eyin bö'et boltuqai ke'en elsen činggis-qa'an-a gungjü neretei öki qarqaju altan mönggün a'urasun et tabar čerig-ün gü'ün-e güčün-e mede'ülün da'aqui-ača jungdu-ača qarqaju činggis-qahan-tur ongging-čingsang gürgejü ireba
elsen irekdejü činggis-qahan eye-tür anu oroju qotat qotat-tur e'eret bawuqsat čeri'üd-i qari'ulju ičuba
ongging-čingsang mojiu vujiu neretü qosi'un-a gürtele činggis-qa'an-i hüdejü qariba
a'urasun et bidan-u čeri'üt da'aqui-ača ačiju kibu'ud-iyar ači'a-ban tataju yabuba
249. tere morilaqsa'ar qasin irge-tür yorčiba
joriju gürü'esü qasin irgen-ü burqan elsen bara'un qar činu bolju güčü öksü ke'en čaqa neretei öki činggis-qa'an-a qarqaju ökba
basa burqan-qan ügülerün činggis-qa'an-u nere aldar sonosču ayuju ala'ai ba
edö'e süldertü beye činu gürčü irekdejü sülder-eče ayuba
ayuju ba
tang'ut irgen bara'un qar činu bolju güčü öksü ke'eba
güčü ögürün nunji nuntuqtan nödüksen balaqasutan bui je nököčejü qurdun aya ayalaqui-tur qurča bulqa bulqalduqui-tur qurdun ayan-tur güyičen je yadamui je qurča bulqa-tur bulqaldun je yadamui je ba
činggis-qa'an-i soyurqa'asu ba
tang'ut irgen ündür deresün-ü nemüre-te ösgejü olon teme'et qarqaju qa bolqaju öksü örmege nekejü a'urasun bolqaju öksü o'orqu sibawun surqaju qura'ulju sayid-i inu gürge'ülün asuqai ke'en öčiba
ügülejü üge-dür-iyen gürün tang'ut irgen-eče-'en teme'et qubčiju tawun yadatala abčiraju ökba
250. činggis-qahan tere morilaqsan-tur kitat irgen-ü altan-qa'an-i else'üljü olon a'urasun abču qasin irgen-ü burqan-ni else'üljü olon teme'et abču činggis-qahan qonin jil tere morilaqsan-tur kitat irgen-ü aqutai neretü altan-qan-i else'üljü tang'ut irgen-ü iluqu-burqan-ni else'üljü qariju sa'ari-ke'er-i bawuba
251. basa te'ün-ü qoyina jeugon-tur elsen ilekset jubqan  teri'üten olon elčin-iyen kitat irgen-ü aqutai altan-qa'an-a jetgükdejü činggis-qahan noqai jil kitat-irgen-tür basa morilaba
elsen baraju jeugon-tur ilekset elčin-i yekin jetkün bülegei ke'en morilarun činggis-qahan tunggon-amasar joriju jebe-yi čabčiyal-iyar bolqaba
činggis-qa'an-i tunggon-amasar-iyar bolba ke'en altan-qan medejü ile qada höbögetür qurban-a čeri'üt mede'üljü čerik böklejü hula'an-degelen-i manglailan jasaju tunggon-amasar-i temečen daba'a bu daba'ulutqun ke'en ile qada höbögetür qurban-i čeri'üt qurduilan ilejü'üi 
tunggon-amasar-a gürü'esü kitad-un čeri'üt qajar ke'en da'aju ireba
činggis-qahan ile qada höbögetür qurban-lu'a bayilduju ile qada-yi gödölgeba
tolui čügü-gürigen qoyar köndelen-eče dobtulju hula'an-degelen-i iču'aju gürčü ile qada-yi gödölgejü daruju kitad-i hünji'ü bayitala kiduba
kitat čeri'üd-iyen kiduju baraqdaba ke'en altan-qan medejü jungdu-dača qarču buru'udun namging-balaqasu oroju'ui hülekset čeri'üt anu turuju ükürün ö'er ja'ura gü'ün-ü miqa ideldüjü'üi 
tolui čügü-gürigen qoyar sayitur üyiletba ke'en činggis-qahan tolui čügü-gürigen qoyar-i masi soyurqaba
252. činggis-qahan qosivu-yi bawu'at jungdu-yin sira-ke'er bawuba
jebe čabčiyal-un qālqa ebdejü čabčiyal-i bariqsat čeri'üd-i gödölgejü irejü činggis-qahan-tur neyileba
altan-qan jungdu-dača qarurun jungdu dotora qada-yi liusiu bolqan tüsijü oduqsan aju'u
činggis-qahan jungdu-yin altan mönggün et  a'urasun ya'u ke inu to'ola'ulurun önggür-bawurči arqai-qasar sigi-qutuqu qurban-i ileba
ede qurban-i ayisai ke'en qada esergü uqdun altatai hartai a'urasu bari'at jungdu dotorača qarču esergü ireba
qada-da sigi-qutuqu ügülerün urida ene jungdu-yin et mün jungdu altan-qan-u'ai aju'u
 je edö'e jungdu činggis-qa'an-u'ai bui je činggis-qa'an-u et a'urasu ečine'ün yekin qulaqču abčiraju ögümü či bi ülü abqu ke'ejü sigi-qutuqu ese abu'a önggür-bawurči arqai qoyar abba
ede qurban jungdu-yin et ya'u ke to'olaju ireba
tende činggis-qahan önggür arqai qutuqu qurban-ača qada ya'u ökba ke'en asaqba
sigi-qutuqu ügülerün altatai hartai a'urasu abčiraju ögülü'e bi ügülerün urida ene jungdu altan-qan-u'ai aju'u
 je edö'e činggis-qa'an-u'ai bolba je či qada činggis-qa'an-u et ečine'ün qulaqču yekin ögümü či ke'ejü bi ese abuba
önggür arqai qoyar ögüksed-i inu abula'a ke'eba
činggis-qahan tende önggür arqai qoyar-i masi dongqotba
sigi-qutuqu-yi yeke yosu setkijü'ü 
či ke'en masi soyurqaju üjegü-yin minu nidün sonosqu-yin minu čikin bolju ülü-'ü aqu či ke'en jarliq bolba
253. altan-qan namging oroju ö'er-iyen elsen mürgüjü tenggeri neretü kö'ü-ben ja'un nököttü-yi činggis-qahan-tur turqaq boltuqai ke'en ilejü'ü 
imada elsekdejü činggis-qahan ičuya ke'en čabčiyal-iyar tende ičurun qasar-i jewün qar-un čeri'üd-iyer dalai gijin ilerün beiging-balaqasu bawutqun beiging-balaqasun-i else'üljü činana jürčed-ün vuqanu-yi da'arin  otču vuqanu bulqa setki'esü ha'ulutqun else'esü inu giji'ar balaqat anu da'arin ula na'u müret gijin otču tawur-müren ö'ede dabaju yeke a'uruq-tur neyilen iretkün ke'ejü ileba
qasar-lu'a noyad-ača jürčedei alči tolun-čerbi qurban-i ileldüba
qasar beiging-balaqasun oro'ulju jürčed-ün vuqanu-yi else'üljü mör-e bükün balaqasun-i oro'ulu'at qasar tawur-müren ö'ede irejü yeke a'uruq-tur bawuju ireba
254. te'ün-ü qoyina činggis-qahan sarta'ul irgen-e uquna teri'üten ja'un elčin-iyen jetgüjü alaqdaju činggis-qahan ügülerün altan arqamji-yan sarta'ul irgen-e ker tasuldan büle'ei ke'en uquna teri'üten ja'un elčin-nü'en ösöl ösön kisal kisan sarta'ul irgen-tür morilaya ke'en morilaqui-tur tende yisüi-qadun činggis-qa'an-a duratqan öčirün qahan üntür daba'a daban örgen müret ketülün urtu ča'ur ča'uran olon ulus-iyan jibsi'erün setkiba
töreksen ele amitan-tur möngke ügei aju'u
ne'üle metü beye činu negüs odu'asu netkel metü ulus-iyan ken-e gemü tulu metü beye činu tulbas odu'asu tuyal metü ulus-iyan ken-e gemü töreksen dörben külü'üt kö'üd-ü'en ken-i inu ke'emü kö'üt-te de'ü-ner-e olon qaračus-a man-a ber mawun-a uqaju aqui-a uqaqsan-iyan duratqaqsan bolbajarliq medetügei ke'en öči'esü činggis-qahan jarliq bolurun qadun ber gü'ün bö'esü yisüi-yin üge jöb-eče jöb ket ber de'ü-ner kö'üt ta ber bo'orču muqali-tan eyin ese duratqaba
bi ber uridus-i ülü uda'araqui-ača umartaju aju'u
üküleng-e ülü erüstegüi-eče  untaraju aju'u ke'e'et kö'üd-ün minu aqa joči bui je ya'u ke'emü či kelele ke'eba
joči-yi dongqotqu-yin urida ča'adai ügülerün joči-yi kelele ke'erün joči-yu'u tüsin ügülemüi ene merkidei čul ulja'ur-a ker mede'ülkün bida ke'eküi-lü'e joči bosu'at ča'adai-yin jaqa-tur tusču ügülerün qan ečige-de busu ese ke'ekdelü'e či namayi ker ilqamui yambar erdem-iyer hüle'ü či qaqča kečewü-ber-iyen maqa hüle'ü ele či hontučaju čimada qarda'asu heregei-yen hoqtolju o'orsuqai abalduju čimada ilaqda'asu unaqsan qajar-ača bu bossuqai qan ečige-yin jarliq medetügei ke'eba
joči ča'adai qoyar jaqa-ča barilduju bayin büküi-tür joči-yin qar-ača bo'orču tataju ča'adai-yin qar-ača muqali tataju büküi-tür činggis-qahan sonosču sem sa'un bui tende kökö-čos jewün ete'et bayiju ügülerün ča'adai yekin ya'arayu či qan ečige činu kö'üd-ün dotora čima-dača erejü büle'e
tan-i töregü-yin urida hodutai tenggeri horčiju büle'e
olon ulus bulqa büle'e
oron-dur-iyan ülü oron oljalaldun büle'e
körisütei etügen körbejü büle'e
gür ulus bulqa büle'e
könjile-de'en ülü gebten görüleldün büle'e
teyimü čaq-tur güsejü ese yabuba je gürülčeküi-tür bolba je buru'utču ese yabuba
bulqalduqui-tur bolba je amaraju ese yabuba je alalduqui-tur bolba je boqda qadun eke-yü'en tosun duran qoru'ulju sün jürügen e'ede'üljü ügülemüi či büle'en-eče bület mün ke'eli-deče ese-'ü törele'ei ta qala'un-ača qalat qaqča qaqunaq-ača ese-'ü qarula'a ta jürügen-eče töreksen eke-yü'en čimatqa'asu činar  inu jekirčü jalira'ulu'asu ülü boli ke'eli-deče töreksen eke-yü'en gemüri'ülü'esü genü'er inu gesge'esü ülü boli qan ečige tanu qamuq ulus-i bayi'ulurun qara teri'ü-ben qanjuqalaju qara čisu-ban nambuqalaju qara nidü-ben hirmes ülü kin qabtaqai čiki-ben dere-tür ülü talbin qanču-ban derelejü qormai-ban debüsčü silüsün-iyen undālaju sigi-yen qonaqlaju manglai-yin kölesün ula-tur gürtele ula-yin kölesün manglai-tur qartala ölümlen kiči'en yabuqui čaq-tur eke tanu qamtu-bar joboldurun horaitala boqtalaju ho'ojitala büselejü niyitaitala boqtolaju niduratala büselejü tan-iyan ösgerün jalgiqui ja'ura jarim-iyan ökčü qo'olai-yan qučiju qotola-iyan ökčü qo'osun yabuqui büle'ei egem-eče tanu tataju ere-lü'e sača'un ken-e bolqaqu güjü'ün-eče tanu tataju gü'ün-lü'e sača'un ken-e bolqaqu ke'ejü buyi tanu arilqaju burbui tanu ergü'üljü ere-yin egem-tür aqta-yin qarqam-tur gürgejü edö'e tan-u'an sayi üjesü ke'en setkijü ese-'ü amui boqta qadun bidan-u naran metü gege'en na'ur metü delger setkiltü büle'e ke'eba
255. tendeče činggis-qan ügülerün joči-yi yekin teyin ke'emüi ta kö'üd-ün minu aqa joči ülü-'ü bui qoyina teyin bu ke'etkün ke'en jarliq bolba
ene üge-tür ča'adai müčiljejü ügülerün joči-yin güčütü-yi erdem-ün qari'u ülü ügülen ama-'ar alaqsan ači'asu ülü boli üge-'er ükü'ülüksen übči'esü ülü boli kö'üd-ün aqa joči ba
qoyar bui je qan ečige-de qolbaran güčün öksü daldariqsan-iyan dalbaru čabčildusu qojidaqsan-iyan  borbin-iyan kinggürü čabčildusu ögödei-lü örük bui ögödei-yi ke'eldüye ögödei qan ečige-yin dergede aju bara'a yeke maqalai-yin bauliya tani'ulu'asu bolu je ke'eba
ene üge-tür činggis-qahan ügülerün joči ya'u ke'emü kelele ke'eba
joči ügülerün ča'adai-lu ügüleba
ča'adai ba
qoyar qolba'aran güčü öksü ögödei-yi ke'eldüye ke'eba
činggis-qahan jarliq bolurun qolba'aratala ya'un bui ötögen eke a'ui bui müret usut olon bui salqu sitü nuntuq a'utkin qari daru'ulun salqaya ke'e'et joči ča'adai qoyar üges-tür-iyen gürülčetkün irgen-e bu ine'e'ülütkün haran-a bu habqari'ulutqun erte altan qučar qoyar ene metü üge baralduju jiči üge-tür-iyen ülü gürgü-yin tula ker kikdelü'ei yambar bolqaqdalu'ai edö'e altan qučar qoyar-un uru'ud-ača tan-lu'a salqalduya teden-i üjejü ya'u osoldaqun ta ke'e'et ögödei ya'u ke'emü kelele ke'eba
ögödei ügülerün qahan eče soyurqaju ügüle ke'ekde'esü ya'u-ban ügülegü bi ülü čidaqu ke'en ker ügülegü čidaqui-bar qata'učisuqai gü ke'emü je mona qoyina maqa uruq-tur minu öleng-tür quči'asu hüker-e ülü idekdegü e'ükün-tür quči'asu noqai-a ülü idekdegü töre'esü qandaqai ketüs quluqana čöles aldaqu-yu'u edüi-yü'en je ke'emü busu ya'u ügülegü bi ke'eba
ene üge-tür činggis-qahan jarliq bolurun ögödei eyimün üges ügülegü bö'esü bolu je ke'eba
basa tolui ya'u ke'emü kelele ke'eba
tolui ügülerün bi qahan ečige-yin nereyidüksen aqa-yu'an dergede aju umartaqsan-i duratqaju untaraqsan-i seri'üljü  je-yin nökör je'erde-yin mina'a bolju je-deče ülü qojidan jerge-deče ülü čolayitan urtu ča'ur ča'uraju oqor bolqa bolqaju öksü ke'en ügüle'esü činggis-qahan jöbsiyen jarliq bolurun qasar-un uruq niken-iyen mede'ül alčidai-yin uruq niken-iyen mede'ül otčigin-u uruq niken-iyen mede'ül belgütei-yin uruq niken-iyen mede'ül teyin setkijü minu urug-i niken-i mede'üljü minu jarliq busu ülü bolqan ese hutaru'asu ülü endekün ülü aldaqun ta ögödei-yin urug-i öleng-tür quči'asu hüker-e ülü idekdegü ö'ükün-tür quči'asu noqai-a ülü idekdegü töre'esü minu uruq-tur niken-ü'ü sayin ülü töregü aju'u ke'en jarliq bolu'at 256. činggis-qahan morilarun tang'ut irgen-ü burqan-tur elčin ilerün bara'un qar činu bolsu ke'elü'e či sarta'ul irgen-e altan arqamji-yan tasuldaju olulčan morilaba
bi bara'un qar bolun morila ke'ejü ile'esü burqan-ni dongqodu'ai üdü'üi-a urida aša-gambu ügülerün güčü yadan bö'etele qan boltala ya'un ke'ejü čerik ülü nemen yeke üge ügülejü ilejü'ü 
tende činggis-qahan ügülerün aša-gambu-da ker eyin ügülekden büle'ei ke'en arqa-ča andur bö'et kelbes joriju ile'esü ya'un berketü büle'ei ö'ere maqa gü'ün-tür joriju büküi-tür je teli möngke tenggeri-de ihe'ekde'esü altan jilo'a batu-da tataju ire'esü tende maqa boltuqai teli ke'ejü 257. taulai jil sarta'ul irgen-tür arai-iyar daban morilarun činggis-qahan qatun-ača qulan-qatun-i abun ayalarun de'ü-ner-eče otčigin-noyan-ni yeke a'uruq-tur tüsijü morilaba
jebe- yi manglai ileba
jebe-yin gejige sübe'etei-yi ileba
sübe'etei-yin gejige toqučar-i ileba
ede qurban-i ilerün qada'un otču sultan-u činana qarču bidan-i gürge'ülün qamsatqun ke'ejü ileba
jebe tere otču qan-melig-ün balaqat da'ariju ülü könden qada'un nökčijü'ü 
te'ün-ü qoyinača sübe'etei mün yosu-'ar ülü könden nökčijü'ü 
te'ün-ü qoyinača toqučar qan-melig-ün kiji'ar balaqat ha'ulju tariyajin-i inu dawuliju'ui qan-melik balaqad-iyan ha'ulda'a ke'en dayijin gödöljü jalalding-soltan-tur neyilejü'ü 
jalalding-soltan qan-melik qoyar činggis-qa'an-u esergü mori-laju'ui činggis-qa'an-u urida sigi-qutuqu manglai yabuju'ui sigi-qutuqu-lu'a bayilduju jalalding-soltan qan-melik qoyar sigi-qutuqu-yi daruju činggis-qahan-tur gürtele daruju ayisuqui-tur jebe sübe'etei toqučar qurban jalalding-soltan qan-melik qoyar-un qoyinača oroju jiči ani daruju kidu'at buqar semisgab udarar balaqasun-tur ani ülü neyile'ülün daruju sin-müren-e gürtele hüldejü yabuqdarun sin-müren-tür čübtüsčü oroqun bolun olon sarta'ul-iyan tende sin-müren-tür sö'eba je jalalding-soltan qan-melik qoyar ami-yan qoroqun sin-müren ö'ede tuta'aba
činggis-qahan sin-müren ö'ede yorčiju batkesen-i dauliju otču eke-qoroqan ge'ün-qoroqan gürčü baru'an-ke'er-i bawuju jalayirtai bala-yi jalalding-soltan qan-melik qoyar-i neke'ülün ilejü jebe sübe'etei qoyar-i masi soyurqaju jebe či jirqo'adai neretü büle'e
tayiču'ud-ača irejü jebe bolba je či toqučar-i qan-melig-ün kija'ar balaqat ö'er-ün dura-'ar ha'ulju  qan-melig-i dayiji'ulba
jasaq bolqan mököri'ülüya ke'en baraju jiči ülü mököri'ülün masi dongqotču čerik medegü-deče inu ere'ülejü bawūlba
258. tedüi činggis-qahan barula-ke'er-eče qariju joči ča'adai ögödei qurban kö'üd-i bara'un qar-un čeri'üd-iyer amui-müren ketüljü ürünggeči-balaqasu bawutqun ke'en ileba
tolui-yi iru isebür teri'üten olon balaqat bawutqun ke'en ileba
činggis-qahan ö'esün udirar-balaqasu bawuba
joči ča'adai ögödei qurban kö'üt öčijü ilerün čeri'üt manu bügütba
ürünggeči-balaqasu gürba
ken-ü'en üge-'er yabuqun ba ke'en öčijü ile'esü činggis-qahan jarliq bolurun ögödei-yü'en üge 'er yabutqun ke'ejü ileba
259. tedüi činggis-qahan udurar-balaqasu oro'ulju udurar-balaqasun-ača gödöljü semisgab-balaqasu bawuba
semisgab-balaqasun-ača gödöljü buqar-balaqasu bawuba
tende činggis-qahan bala-yi güličen altan-qorqan-u niri'un soltan-u jusalang jusaju tolui-tur elčin ileba
hon qala'un bolba
busut čeri'üt bawut je či bidan-tur neyile ke'ejü ile'esü tolui iru isebür-tan balaqat abču sisten-balaqasu ebdejü čuqčeren-balaqasu ebden büküi-tür elčin ene kelen gürge'esü tolui čuqčeren-balaqasu ebde'et qarin bawuju ire'et činggis-qahan-tur neyileba
260. joči ča'adai ögödei qurban kö'üt örünggeči-balaqasu oro'ulju qurbaula balaqat irgen qubiyalduju činggis-qa'an-a qubi ese qarqaju'u
ede qurban kö'üd-i bawuju ire'esü činggis- qahan joči ča'adai ögödei qurban kö'üd-i čimatču qurban üdür ese a'ulja'ulba
tende bo'orču muqali sigi-quduqu qurban öčirün öčin meljen aqsat sarta'ul irgen-ü soltan-i doroyitda'ulju balaqat irge anu abu'ai bida qubiyaju abdaqu örünggeči-balaqasun qubiyalduju abqun kö'üt bügüde činggis-qa'an-u'ai bui tenggeri qajar-a güčü nemekdejü sarta'ul irgen-i edüi doroyita-'uluqsan-tur ba
olon ere aqta činu bayasču maqaiju amui qahan yekin eyin kilinglaju amu kö'üt buru'u-yan uqaju ayuba je qoyiči-yu'an surtuqai kö'üt aburi-yan alqasa'ujai soyurqa'asu a'ulja'ulu'asu bolqu-yū ke'en öči'esü činggis-qahan jaliraju joči ča'adai ögödei qurban kö'üd-i a'ulja'ulju dongqodurun ötögüs üges orkitču qa'učin üges qadalju bayiqsan qajar-a baqta aldatala manglai-yin kölesün arčin yadatala badarkiju čimar-i'ar söyü-'er du'ulqan büküi-tür qongqai-qorči qongtaqar-qorči čormaqan-qorči ede qurban qorčin činggis-qa'an-a öčirün boro sibawun bauliya-tur sayi oroqu metü kö'üt sayi edüi ayalan surun büküi-tür kö'üd-i singtalun mene metü yekin eyin dongqodumu kö'üt ayuju setkil-iyen alqasa'ujai naran singgegü-eče urququ-da gürtele dayin irgen bui man-i töbödüt noqod-iyan tukirču ile'esü dayin irgen-i ba
tenggeri qajar-a güčü nemekdejü altan mönggü a'urasun tabar irgen orqan čimada abčirasuqai ali irgen ke'e'esü ene höröne baqtat irgen-ü qalibai-soltan ke'egü bui ke'emüi te'ün-tür ba
ayalasuqai ke'en öčiesü qahan so'oraju ede üges-tür jaliraju činggis-qahan jöbsiyejü jarliq  bolurun qongqai qongtaqar čormaqan qurban qorčin-i soyurqaju adargidai qongqai dolonggirdai qongtaqar qoyar-i minu dergede atuqai ötegedei čormaqan-i baqtat irgen-tür qalibai-soltan-tur ayala'ulba
261. basa hindus irgen baqtat irgen qoyar-un ja'ura aru maru madasari irgen-ü abtu-balaqasun-tur dörbetei dörbei-doqsin-i ayala'ulba
262. basa sübe'etei-ba'atur-i ümeksi qanglin kibčaut bajigit orusut majarat asut sasut serkesüt kesimir bolar raral ede harban niken ayimaq qarin irgen-tür gürtele idil jayaq usutan müret ketülün kiwa men-kermen balaqasun-tur gürtele sübe'etei-ba'atur-i ayala'ulba
263. basa sarta'ul irgen-i abun baraju činggis-qahan jarliq bolurun balaqat balaqat-tur daruqačin talbiju ürünggeči-balaqasun-ača yalawači masqut nereten ečige kö'üt qoyar qurumsi oboqtan sarta'ul irejü balaqasun-u yosu dörö činggis-qa'an-a ügülejü yosun-tur adali meden kelelekdejü kö'üd-i inu masqut qurumsi-yi bidan-u daruqas-lu'a buqar semisgen ürünggeči udan kisqar uriyang güsen-daril teri'üten balaqad-i mede'ülün tüsijü ečige-yi inu yalawači-yi abčiraju kitad-un jungdu-balaqasu mede'ülün abčiraba
sartaqtai gü'ün-neče yalawači masqut qoyar-un balaqasun-u törö yosun čidaqu-yin tula kitat irgen-i mede'ülün daruqas-lu'a tüsiba
264. sarta'ul irgen-tür dolo'an hont yabuju tende jalayirtai  bala-yi güličejü büküi-tür bala sin-müren-i ketüljü jalalding-soltan qan-melik qoyar-i hindus-un qajar-a gürtele nekejü jalalding-soltan qan-melik qoyar-i jabqaju hindus-un dumda gürtele erijü yadaju qariju hindus-un kiji'ar irgen-i dauli'at olon teme'et olon serkes-i abu'at irejü'üi 
tende činggis-qahan qariju ja'ura erdiš jusaju dolodu'ar hon takiya jil namur tūla-yin qara tün-na ordos-tur bawuba
265. tere übül übüljejü tang'ut irgen-tür morilaya ke'en sini to'a to'ulaju noqai jil namur činggis-qahan tang'ut irgen-tür morilaba
qadun-dača yisüi-qadun-ni abču otba
ja'ura übül arbuqa-yin olon qulad-i abala'asu činggis-qahan josotu-boro-yi unuju büle'e
qulat da'ariju ire'esü josotu-boro ürgüjü činggis-qahan-ni morin-ača una'asu mariya-ban masi ebetčü čo'orqat bawuba
tere söni qono'asu manaqar yisüi-qadun ügülerün kö'üt noyat keleleldütkün qahan söni mariya qala'un qonoba ke'eba
tende kö'üt noyat qura'asu qongqotadai tolun-čerbi duratqan ügülerün tang'ut irgen nödüksen balaqasutan nunji nuntuqtan bui nödüksen balaqasu-ban ü'ürčü ülü otqun tede nunji nuntug-iyan gejü ülü otqun tede bida ičuju qahan-u mara'a seri'üdü'esü basa jiči morilat je bida ke'e'esü bürin kö'üt noyat ene üge jöbsiyejü činggis-qahan-a öči'esü činggis-qahan ügülerün tang'ut irgen bidan-i jürüge yadaju qariba ke'ekün bida elčin maqa ilejü elčin-i ebečin-i mün ene čo'orqat-ta sobilaju üge anu uqaju iču'asu bolu je ke'ejü tende elčin-e da'u  bari'ulju ilerün nidöni burqan či ügülerün ba
tang'ut irgen bara'un qar činu bolsu ke'elü'e čimada teyin ke'ekdejü sarta'ul irgen-e eye-dür-iyen ese oroqdaju morilasu ke'en quyuju ile'esü či burqan üge-dür-iyen ülü gürün čerik ba
ülü ögün üge-'er da'ariju irejü büle'e
ö'ere joriqsan-tur qoyina olulčasu ke'en sarta'ul irgen-tür morilaju möngke tenggeri-de ihe'ekdejü sarta'ul irgen-i jük-tür oro'ulju edö'e burqan-tur üge olulčasu ke'en ayisai ke'ejü ile'esü burqan ügülerün da'aringqu üge bi ese ügülelü'e ke'ejü'üi 
aša-gambu ügülerün da'aringqu üges bi ügülelü'e edö'e ber bö'esü ta mongqol qatquldu'a surču qatqu-ldusu ke'e'esü bi bürün alašai nuntuqtu terme gertü teme'en ači'atu buyu alašai joriju nadur iretkün tende qatqulduya altan mönggün a'urasun tabar kerektü bö'esü eri-qaya eri-je'ü-yi joritqun ke'ejü ilejü'üi 
ene üge-yi činggis-qahan-a gürge'esü činggis-qahan mariya qala'un arun ügülerün je teli eyimü yeke üge ügüle'üljü ker ičuqdaqui ükürün yeke üge-tür siqan yabuya ke'ejü möngke tenggeri či mede ke'en činggis-qahan alašai joriju gürčü aša-gambu-lü'e qatqulduju aša-gambu-yi daruju alašai de'ere qorqola'ulju aša-gambu-yi abču terme gertü teme'en ači'atu irgen-i inu hünesü-'er keyistele tala'ulba
erekün omoqun erebin sayit tang'udud-i kiduju eyimün teyimün tang'udud-i čeri'üt gü'ün-e bariqsa'ar oluqsa'ar abutqun ke'en jarliq bolba
266. činggis-qahan časutu de'ere jusaju aša-gambu-lü'e  a'ulalaqsat dayijiqsat terme gerten teme'en ači'atan tang'udud-i čeri'üt ilejü onoqsa'ar ülittele tala'ulba
tendeče bo'orču muqali qoyar-a soyurqarun güčün-e medetele abtuqai ke'en jarliq bolba
basa činggis-qahan jarliq bolurun bo'orču muqali qoyar-a soyurqal ögürün kitat irgen-eče ese ögüle'e ke'en kitat irgen-ü jüyin-i ta qoyar sača'u qubiyalduju abutqun sayit kö'üd-i anu sibawu-ban bari'ulju daqa'ulju yabutqun sayit ökid-i anu ösgejü emes-iyen qormai jasa'ulutqun kitat irgen-ü altan-qan-nu itegelten ina'ut mongqol-un ebüges ečiges-i baraqsan qara-kitat jüyin irgen aju'ui je edö'e minu itegelten ina'ut bo'orču muqali ta qoyar buyu je ke'en jarliq bolba
267. činggis-qahan časutu-ača gödöljü uraqai-balaqasu bawuju uraqai-balaqasun-ača gödöljü dörmegei-balaqasu ebden büküi-tür burqan činggis-qahan-a a'uljara ireba
tende burqan a'uljarun altan sümes teri'ülen altan mönggün ayaqa saba
yisün yisüt nu'ut ökit yisün yisüt aqtas teme'et yisün yisüt eldeb-iyer yisün yisüt jisülejü a'uljaqui-tur burqan-i e'üten büte'üi-e a'ulja'ulba
tere a'uljaqui-tur činggis-qahan dotora dura bulqaba
quta'ar üdür činggis-qahan jarliq bolurun iluqu-burqan-a sidurqu nere ökčü iluqu-burqan sidurqu-yi irekdejü tende činggis-qahan iluqu-yi nökčiyetkün ke'en tolun-čerbi qardaju nökči'etügei ke'en jarliq bolba
tende tolun-čerbi iluqu-yi qardaju büte'eba ke'en öči'esü činggis-qahan jarliq bolurun tang'ut irgen-tür üge olulčan ayisuqui-tur ja'ura arbuqa-yin  qulat abala'asu ebedüksen mariya minu anatuqai ke'en amin beye minu qayiralaju üge duratqaqsan tolun bui je nökör gü'ün-ü qoron üge-tür irejü möngke tenggeri-de güčü nemekdejü qar-dur-iyan oro'ulju öš-iyen abu'ai je bida iluqu-yin ene abču ireksen newügü qarsi ayaqa saba
selte tolun abtuqai ke'en jarliq bolba
268. tang'ut irgen-i dawuliju iluqu-burqan-i sidurqu bolqaju imayi büte'ejü tang'ut irgen-ü eke ečige-yi uruq-un uruq-a gürtele muquli musquli-yi ügei bolqan ide'e ideküi ja'ura muquli musquli ügei ke'en ükü'ülün ečitken kelelen atqun ke'en jarliq bolba
tang'ut irgen üge ügülejü üge-tür ülü gürgü-yin tula tang'ut irgen-tür činggis-qahan nökö'e-te ayalaju tang'ut irgen-i muqutqaju irejü qaqai jil činggis-qahan tenggeri-tür qarba
qaruqsan-u qoyina yisüi-qadun-a tang'ut irgen-eče masi ökba
269. quluqana jil ča'adai batu teri'üten bara'un qar-un kö'üt otčigin-noyan yegü yisünge teri'üten jewün qar-un kö'üt tolui teri'üten qol kö'üt ökit güreget tümed-ün minqad-un noyat bürin bolju kelüren-ü köde'ü-aral-a gür-iyer quriju činggis-qahan-u nereyidüksen mün jarlig-iyar ögödei-qahan-ni qan ergüba
ča'adai-aqa ögödei-qahan-ni de'ü-yü'en qan ergüjü činggis-qahan ečige-yü'en altan amin sakin aqsat kebte'ül qorčin naiman minqat turqa'ut qan ečige-yin minu beye ča'ada yabun aqsat emčü tümen kesikten-i inu ča'adai-aqa tolui qoyar ögödei- qahan-na tawulba
qol-un ulus-i mün yosu'ar tawulba
270. ögödei-qahan ör-iyen qan ergü'üljü dotona yabuqun tümen kesikten-i qol-un ulus-i ö'er-dür-iyen bolqa'ulun baraju urida ča'adai-aqa-tur eyetüjü činggis-qahan ečige-yü'en dorqut talbiqsat irgen-ü baqtat irgen-ü qalibai-soltan-tur ayalaqsan čormaqan-qorči-yin gejige oqotur mönggetü qoyar-i ayala'ulba
basa urida sübe'etei-ba'atur-i kanglin kibča'ut bajigit orusut asut sesüt majar kesimir sergesüt bular kerel irgen-tür gürtele adil jayaq usutan müret ketülün meket men-kermen keyibe teri'üten balaqat-tur ayalaqsan sübe'etei-ba'atur tede irgen-e berkeldükdejü sübe'etei-yin gejige batu büri güyük möngge teri'üten olon kö'üd-i morila'ulba
ede ayalaqsat bürin kö'üd-i batu aqalatuqai ke'en jarliq bolba
qol-ača qaruqsad-i güyük aqalatuqai ke'en jarliq bolba
ede ayalaqun-i ulus medekün kö'üt kö'üd-ü'en gü yeke kö'ü ayala'ultuqai ulus ba
ülü medekün kö'üt tümed-ün minqad-un ja'ud-un harbad-un noyat olon gü'ün ken ber bö'esü kö'üd-ü'en aqa-yi ayala'ultuqai ökit güriget mün yosu-'ar kö'üd-ü'en gü aqa-yi ayala'ultuqai ke'en jarliq bolu'at basa ögödei-qahan ügülerün ene ba
kö'üd-ün aqa-yi ayala'ulqu yosun ča'adai-aqa-ača bolju'u je ča'adai-aqa ügülejü irerün sübe'etei-yin gejige kö'üd-ü'en aqa büri-yi ayala'ulumu kö'üd-ün aqa ayala'asu čerik arbin qarqu čerik olon bolu'asu čirai de'ere güčütei-e yabuyu činadu dayisun gü'ün olon qarin bui tere üjü'ür-e keče'ün irgen tede kilingla'asu ö'er-ün mese- dür-iyen ükükün irgen tede meses qurčatan ke'ekdemüi ke'ejü irejü'üi 
ögödei-qahan ügülerün tere üge-tür bidan-u ber ča'adai-aqa-yin kiči'enggü güčü-'er kö'üd-ün aqa-yi qarqaya ke'en jük jük tungqa'aju batu büri güyük möngge teri'üten kö'üd-i ayala'ulqui yosun eyimü bui je 271. basa ögödei-qahan ča'adai-aqa-tur eyetüjü ilerün činggis-qahan ečige-yü'en belen-tür sa'uba
yambar erdem-iyer sa'uba ke'en ügülekdegü-yü bi ča'adai-aqa-yi jöbsiye'esü qahan ečige bidan-u kitat irgen-ü altan-qan-ni dorqut talbilu'a edö'e bi kitat irgen-tür morilasu ke'en eyetüjü ile'esü ča'adai-aqa jöbsiyejü ya'u aljaqu a'uruq-tur sayin gü'ün tüsijü morilatqun bi endeče čeri'üt qarqaju ile'esü ke'ejü ilejü'üi 
yekes ordos-tur oldaqar-qorči-yi tüsijü 272. taulai jil ögödei-qahan kitat irgen-tür morilaju jebe-yi manglai ileba
tedüi kitad-un čeri'üd-i daruju hünji'ü bayitala kidu'at čabčiyal-i dabaju jük jük qotot balaqat anu e'ere'ülün čeri'üt yabu'ulju ögödei-qahan sira-dektür bawuba
tende ögödei-qahan ebetčin gürtejü aman kelen jabqan aljaqdarun bö'es bö'es tölgečin-e tölgele'ülü'esü kitat irgen-ü qajar usun-u ejet qant irgen orqo-ban dawuliqdarun balaqat qotod-iyan ebdekderün türgün-e adalamui irgen orqa altan mönggün adu'usun ide'en joli'a ökgüye ke'en abitla'asu ülü talbiran dület türgün-e adalamui uruq-un gü'ün-eče bolqu-yū ke'en abitla'asu qahan nidün-en ne'ejü usun quyuju u'uju ya'un bolbi  ke'en  asaqtaju bö'es öčirün kitat irgen-ü qajar usun-u ejet qant qajar usun-iyan ebdekderün irgen orqa-ban dawuliqdarun türgün-e adalamui busu ya'un ber joli'a ögüye ke'en abitla'asu dület türgen-e ji'ürmedemüi uruq-un gü'ün-eče bolqu-yū ke'e'esü talbiramui edö'e jarliq medemü je ke'en öči'esü jarliq bolurun dergede kö'üd-eče ken bui ke'esü tolui kö'ün dergede büle'e
ügülerün sutu činggis-qahan ečige bidan-u de'ere aqa-nar dōro de'ü-ner bö'etele qahan aqa-yi čimayi aqta metü songquju irge metü bilijü yeke oro-ban beye-tür činu čučuju olon ulus-i de'ere činu ačiju ökba je namayi bürün qahan aqa-yin dergede aju umartaqsan-i duratqaju untaraqsan-i seri'üljü yabu ke'ekdelü'e edö'e qahan aqa-yan čimayi alda'asu bi ken-ü umartaqsan-i duratqaqu ken-ü untaraqsan-i seri'ülgü ünen ber qahan aqa minu jöb ese bolu'asu olon mongqol ulus önečirekün kitat irgen kibqangqun qahan aqa-yu'an orun-a bi bolsu tulu-yin niru'un bi tulbalba
kileme-yin niru'un bi kinggülba
ile-yi bi ilaqba
qadā-yi bi qatquba
ni'ur qo'a niru'un urtu bi gü bui je bö'es arbatqun jügerütqün ke'ejü bö'es jüger'esü jügergen usu tolui kö'ün u'uba
qorom sa'uju ügülerün soqtaba
bi soqtaqu-yi minu sergütele önečit üčüget de'ü-ner-iyen belbisün beri-yen berüde oyin-a gürtele asaraqu-yi qahan aqa medetügei ali ber üge-ben ügülele'e bi soqtaba ke'e'et qarču otču jöb ese boluqsan yosun teyimü 273. tedüi altan-qan-ni muqutqaju se'üse nere ökčü altan  mönggün altatai hartu a'urasun tabar alašas se'üses-i anu dawuliju alginči tammačin talbiju namging jungdu jük jük-tür balaqasun-tur daruqačin talbiju tübsin tükel qariju qara-qorum-a bawuba
274. čormaqan-qorči baqtat irgen-i else'üljü'ü 
tere qajar sayin et sayin ke'ekdemüi ke'en medejü ögödei-qahan jarliq bolurun čormaqan-qorči-yi mün tende tamma sa'uju sira altan siramal altatan naqut načidut dardas subut tanas güjü'ü 
urtus köl ündür tobiča'ut güring elö'üt da'usi kičidut ači'an-a qačidut lausasut hon-tur gürge'üljü ilen atqun ke'eba
sübe'etei-ba'atur-un gejige ayalaqsat batu büri güyük möngge teri'üten olon kö'üt qanglin kibča'ud-i bajigid-i oro'ulju ejil jayaq meget balaqasu ebdejü orusud-i kiduju ülüttele talaba
asut sesüt bolar man-kerman kiwa teri'üten balaqad-un irgen-i dawuliju else'üljü daruqačin tammačin-i talbiju qariba
urida jürčet solangqas-tur ayalaqsan jalayirtai-qorči-yin gejige yisüder-qorči-yi ayala'ulba
tamma sa'utuqai ke'en jarliq bolba
275. batu kibčaqčin ayan de'ereče ögödei-qahan-a elčin-eče öčijü ilerün möngke tenggeri-yin güčün-tür qahan abaqa-yin su-tur meget-balaqasun ebdejü orusut irgen-i dawuliju harban niken qarin irgen-i jük-tür oro'ulju altan jilu'a ičun tataju salulčaqui qurim qurimlaya ke'eldüjü yeke čačir bosqaju qurimlaqui-tur bi ede bükün kö'üd-ün aqaqan boluqsan bolju niken qoyar ayaqa ötök urida u'uba ke'en nadur büri güyük qoyar mawuilaju qurim ülü qurimlan morilaqdaba
morilaju büri ügülerün batu  sača bö'et bolju urida ker u'uqun büle'e
saqaltan emeget sača'un bolju ösöge-iyer türijü ölmi-iyer gečikileküi ke'ejü'ü 
güyük ügülerün tede qortan emeged-i ebče'üt anu jorqaldaya-či bida tede'er-i ke'ejü'üi 
eljigidei-yin kö'ün harqasun ügülerün modun se'ül jübčiya teden-i ke'ejü'üi 
ba bürün busu heligetü bulqa irgen-tür morila'uldaju jöb-i tab-i bolqu bolba ke'ejü büküi-tür büri güyük qoyar-a eyin ke'ekde'et eye ügei tarqaqdaba
edö'e qahan abaqa-yin jarliq medetügei ke'en öčijü ilejü'üi 
276. batu-yin ene üge-tür qahan masi kilinglaju güyüg-i ülü a'ulja'ulun ügülerün ene dörmegei ken-ü üges-tür dölüsgüjü aqa gü'ün-i aman dü'üren ügüleyü qaqča öndegen hü'ütügei mün aqa gü'ün-ü ebče'ün-tür dayisurqan aju'u
alginči talbiju harban quru'ud-un kimul inu ha'uttala a'ulas metü balaqat-tur abari'uluya tamma talbiju tabun quru'ud-un kimul inu tamutala dabtamal qatangqu balaqat-tur abari'uluya či beter mawui dörmegei harqasun ken-i enggesigejü  bidan-u uruq-tur aman dü'üren yeke üge ügülen büle'e
güyük harqasun qoyar-i qamtu ileye harqasun-i mököri'üldegü büle'e
alaqčilaba ke'ekün ta büri-yi bürün ke'e'esü batu-da ügüle ča'adai-aqa-da ügülejü iletügei ča'adai-aqa medetügei ke'eba
277. kö'üd-eče mönggei noyad-ača alčidai qongqortai janggi teri'üten noyat duratqan öčirün činggis-qahan ečige-yin činu jarliq ke'er-ün üyile ke'er-e gü noyalaqu büle'e
ger-ün üyile ger-tür gü noyalaqu büle'e
qahan-ni soyurqa'asu qahan  güyük-tür kilinglaju amu ke'er-ün üyile buyu batu-da tüsijü ile'esü bolqu-yū ke'en öči'esü ene üge-yi qahan jöbsiyen jaliraju güyüg-i a'ulja'ulju söyü-'er üge dongqodurun ayalaju odurun ja'ura böksetü gü'ün-ü bökse inu ese hüledeba ke'ekdemü či čerig-ün haran-u čirai ququlju otba ke'ekdemü či orusut irgen-i tere činu a'ur kiling-dur ayuju oraqdaqsan-a bolqan aqu-yū či orusut irgen-i qaqča-'ar oro'uluqsan metü setkijü omoq dura bariju aqa gü'ün-tür dayisurqan ayisu či činggis-qahan ečige-yin bidan-u jarliq-tur bui olon ayu'uli gün ükü'üli ke'egü ese-'ü büle'e
qaqča-'ar tuniqsan metü sübe'etei büjek qoyar-un dalda-da yabuju olo-'ar büri-yer qamsaju orusut kibča'ud-i oro'ulju niken qoyar orusut kibča'ud-i olju esige-yin si'ira olu'ai jö'e'ei üdü'üi-e eremsijü niken-te ger-teče qarču ya'u ber qaqča-'ar tuniqsan metü üge dawu ülisčü irejü či mönggei alčidai qongqortai janggi-tan-a dekdeksen jürügen-i derge nökör bolju töde'ejü debülküi toqo'an-i delegei sinaqa bolju amurli'uldaju je teli ke'er-ün üyile batu-yi ke'ele'ei güyük harqasun qoyar-i batu medetügei ke'ejü ileba
büri-yi ča'adai-aqa medetügei ke'eba
278. basa ögödei-qahan jarliq bolurun činggis-qahan ečige-tür minu yabuqsat kebte'ül qorčin turqa'ut bürin kesikten-ü yabudal tungqun du'ulqaqui jarliq tungqa'arun qahan ečige-yin jarlig-iyar urida ker yabuqun büle'ei edö'e mün yosu-'ar yabutuqai ke'en jarliq bolurun qorčin turqa'ut uridu yosu-'ar üdür mör mör-dür-iyen yabuju naratai-a kebte'ül-e jayilaju qadana  qonotuqai ke'en jarliq bolba
söni bidan-tur kebte'ül qonotuqai e'üten-tür ger-ün qorčin kebte'ül bayituqai ordo-yin qoyina'un urida'un kebte'ül muqurituqai naran singgeksen-ü qoyina söni yabuqun haran kebte'ül bariju qonotuqai olon tarqaqsan-u qoyina qonoqsat kebte'ül-eče busut dotoqsi jöričen oroqun haran-i bariqsat kebte'ül ekit anu dalbaru čabčiju o'ortuqai söni ya'aral keletü gü'ün ire'esü kebte'ül-tür kelelejü ger-ün ümereče kebte'ül-lü'e qamtu bayiju keleleldütügei ordo ger-tür oroqu qarqu-yi qongqortai siraqan-tan jasa'ul kebte'ül-lü'e qamtu jasatuqai eljigidei itegeltü bö'etele jilda kebte'ül-ün dege'ün yabuqu bolun kebte'ül-e bariqdala'a ke'en jarliq busu ülü bolqaqu kebte'ül itegeltü bui je ke'en jarliq bolju kebte'ül-ün to'a bu asaqtuqai kebte'ül-ün sa'urin dege'ün bu yabutuqai kebte'ül-ün jaqa'un bu yabutuqai kebte'ül-ün dege'ün yabuqun jaqa'un yabuqun haran-i kebte'ül barituqai kebte'ül-ün to'a asaqu gü'ün-ü tere üdür-ün unuqsan aqta eme'eltü qada'artu-yi emüsüksen qubčasun salte kebte'ül abtuqai kebte'ül-ün sa'urin-u de'ere ken ber bu sa'utuqai kebte'ül tuq ke'ürge dōro jida ayaqa saba
asaratuqai undān ide'en-i ötken miqa kebte'ül daruqalatuqai ke'en jarliq bolba
ordo ger tergen kebte'ül asaratuqai bidan-u beye čerik ese qaru'asu bidan-ača anggida ö'ere kebte'ül čerik bu qartuqai bidan-i sibawulaqui abalaqui-tur jarimud-iyan ordo ger tergen-tür čaqlaju talbiju bidan-lu'a jarim kebte'ül yabutuqai kebte'ül-eče nuntu'učin yabuju ordo bawūltuqai e'üten ča'ada kebte'ül  e'üdečin bayituqai bürin kebte'ül qada'an minqa medetügei ke'en jarliq bolba
basa kebte'ül-ün kesik kesig-ün noyat tüsirün qada'an bulaqadar qoyar niken kesik bolju eyetüldüjü niken kesik oroju ordo-yin bara'un jewün ete'et qaqas sa'uju jasatuqai amal čanar qoyar eyetüldüjü niken kesik bolju kesik oroju ordo-yin bara'un jewün ete'et qaqas sa'uju jasatuqai qadai qori-qačar qoyar eyetüldüjü niken kesik oroju ordo-yin bara'un jewün ete'et qaqas sa'uju jasatuqai yalbaq qara'udar qoyar eyetüldüjü niken kesik bolju kesik oroju ordo-yin bara'un jewün ete'et qaqas sa'uju jasatuqai basa qada'an bulqadar-un kesik amal čanar-un kesik ede jirin kesi'üt ordo-yin jewün ete'et nuntuqlaju kesik orotuqai qadai qori-qačar qoyar-un kesik yalbaq qara'udar qoyar-un kesik ede jirin kesi'üt ordo-yin bara'un ete'et nuntuqlaju kesik orotuqai ke'eba
ede dörben kesik kebte'ül qada'an medetügei basa kebte'ül minu beye ča'ada ordo horčin bayiju e'üten daruju kebtetügei kebte'ül-eče ordo-tur oroju qoyar haran tüsürge barituqai ke'en jarliq bolba
basa qorčin-i yisün-tö'e bükidei horqudaq labalqa dörben kesik kesik bolun qor aqsaqui-a turqa'ud-un dörben kesik kesik-tür ačid-un qorčin-iyan jasaju oroldutuqai ke'en jarliq bolba
basa turqa'ud-un kesi'üd-ün ötögüs-i urida meden aqsad-un uruq-ača tüsirün urida meden aqsan alčidai qongqortaqai qoyar eyetüldüjü niken kesik turqa'ud-i jasaju orotuqai temüder jegü qoyar eyetüldüjü niken kesik turqa'ud-i jasaju orotuqai mangqutai  gejigele'ül-i mede'et niken kesik turqa'ud-i jasaju orotuqai basa qahan jarliq bolurun bürin noyat eljigidei-yi aqalaju eljigidei-yin üge 'er yabutqun ke'e'et basa jarliq bolurun kesiktü gü'ün kesik oroqui-tur ho'ara'asu uridu jarliq-un yosu-'ar qurban beri'es süyütügei mün kesiktü gü'ün basa nökö'e-te kesik ho'ara'asu dolo'an beri'es söyütügei basa mün gü'ün ebetčin silta'a ügei kesig-ün ötögü-tür eye ügei quta'ar-ta kesik ho'ara'asu bidan-tur yabuqui-yan berkesiyen aju'u
qučin dolo'an beri'es söyü'et qola qajar-a nidün-ü ečine ileye basa kesi'üd-ün ötögüs kesikleksen kesikten-i ülü bügütken kesik ho'ara'asu kesi'üd-ün ötögüs-i ere'üleye basa kesi'üd-ün ötögüs quta'ar quta'ar kesik oroqui-tur ye'ütkeldüküi-tür ene jarliq kesikten-e sonosqatuqai jarliq sonosu'at bürün kesikten kesik ho'ara'asu jarliq-un yosu-'ar ere'üleye ene jarliq kesikten-e ese sonosqa'asu kesi'üd-ün ötögüs aldaltan boltuqai basa kesi'üd-ün ötögüs sača'un oroqsat minu kesiktü-yi bidan-ača eye ügei aqalaqdaba
ele ke'en bu onjituqai jasaq könte'esü bidan-a ja'atuqai ükü'üldegü yosutu bö'esü bida mököri'ülüt je kese'ekdegü yosutu bö'esü bida söyüt je aqalaqdaba ke'en bidan-a ülü ja'an ö'esüt qar köl gürge'esü nudurqa-yin qari'u nudurqa beriye-yin qari'u beriye qari'ultuqai ke'eba
basa qadanadus minqad-un noyad-ača minu kesikten de'ere bui je qadanadus ja'ud-un harbad-un noyad-ača minu kesikten-ü kötöčin de'ere bui je qadanadus minqali'ut minu kesikten-tür kereldü'esü minqali'udai-yi ere'üleye ke'en jarliq  bolba
279. basa ögödei-qahan ügülerün činggis-qahan ečige-yü'en joban bayi'uluqsan ulus-i bu jobo'aya köl anu köser-e qar anu qajar-a talbi'ulju jirqa'uluya qahan ečige-yü'en belen-tür sa'uju irge ülü jobo'an šülen-e ede ulus-ača sürüg-ün niken silegü qonin hon hon-tur öktügei ja'un qonid-ača niken qonin qarqaju mün ja'ura üge'ün duta'un-a öktügei basa aqa de'ü olon ere aqta kesikten či'ulu'asu undān tere tutum irgen-eče ker qubčiqdaqui jük jüg-ün minqat minqad-ača ge'üt qarqaju sa'a'at sa'arinčintan-i adu'ula'at nuntuqčitan-i orosin tölet qarqaju unuqučin boltuqai basa aqa de'ü či'ulu'asu öklige soyurqal ögüye a'urasun sükes qot numut quyaq jebe sang'ut tüsürčü balaqat saki'uluya jük jüg-eče balaqačin amučin ilqaju saki'ultuqai basa ulus irgen-e nuntuq usu qubiyaju ögüye nuntuq nuntuqla'ulqui-a minqat minqad-ača nuntu'učin ilqaju qarqa'asu bolqu-yū basa čöl qajar-a görö'esün-eče busu ülü amui irgen-e a'ui-a saqut čanai ui'urtai qoyar nuntu'učin-i teri'ülejü čöl-ün qudu'ut eri'üljü qasituqai basa bida elčin ha'ulurun ulus bitü'ülün ha'ulqamui ha'ulqun elčin-ü ba
yabudal uda'an bui ulus irgen-e ba
jobolang bui edö'e bida oqo'ata orosi'ulun jük jüg-ün minqat minqad-ača jamučin ula'ačin qarqaju sa'urit sa'urit jam talbiju elčin-i qadaqa ügei ulus-iyar ülü bitü'ülün jam-iyar ha'ulqa'asu bolqu-yū ede üyiles-i čanai bolqadar qoyar uqaju bidan-a duratqa'asu jöb aqu-yū ke'en setkijü  ča'adai-aqa medetügei ede ügülekdekün üyiles jokiqui bö'esü jöbsiye'esü ča'adai-aqa-ča boltuqai ke'ejü ile'esü ča'adai-aqa asaqču ileksen ede ele üyiles-i bügüde-yi jöbsiyejü teyin bö'et kitügei ke'ejü ilejü'üi 
basa ča'adai-aqa ügülejü irerün bi endeče jamut esergü barildu'ulsuqai basa endeče batu-tur elčin ilesügei batu ber esergü jamud-iyan barildu'ultuqai ke'et basa ügülejü irerün bügüden-eče jamut talbi'ulqu üyile jöbe-eče jöb duratqaju'ui ke'ejü ilejü'üi 
280. tendeče ögödei-qahan ügülerün ča'adai-aqa batu teri'üten bara'un qar-un kö'üt aqa-nar de'ü-ner bürin otčigin-noyan yegü teri'üten jewün qar-un aqa-nar de'ü-ner bürin kö'üt qol-un ökit güriget tümed-ün minqad-un ja'ud-un harbad-un noyat büri-yer jöbsiyejü'üi 
jöbsiyerün dalai-yin qahan-u šülen-e hon-tur sürüg-ün niken silegü irge qarqa'asu ya'un bui ja'un qonid-ača niken jusaq qarqaju üge'ün duta'un-a ökküi sayin bui jam talbi'ulju jamučin ula'ačin qarqa'asu olon ulus-a amuqulang elčin-e ber yabuqui-a ilübte bui ke'e'esü büri-yer ele jöbsiyejü'üi 
ke'en qahan-nu jarliq ča'adai-aqa-tur eyetüjü ča'adai-aqa-da jöbsiyekdejü bürin ulus-ača jük jüg-ün minqat minqad-ača qahan-nu jarlig-iyar hon hon-tur šülen-e sürüg-eče niken silegü irge ja'un qonid-ača niken jusaq qonin qarqa'ulba
ge'üt qarqa'ulju unuqučin sa'ūlba
unuqučin balaqačin amučin qarqa'ulba
jamučin ula'ačin-i qarqa'ulju sa'urin sa'urid-un qajar čaqla'ulju jam talbi'ulurun aračan toqučar qoyar-i jasa'ulju jam niken sa'urin- tur qorin ula'ačin bolqaba
sa'urin tutum-tur qori'at ula'ačin bolqaba
ula'an-u aqtas si'üsün-ü qonit sa'arin ge'üt telegen-tür kölgü hüker terget endeče bidan-ača kemleksen kem-eče oqor bugi duta'ulu'asu orqol-iyar qaqas aldaltan boltuqai qalbuqa kekesün duta'ulu'asu qabar qaqas aldaltan boltuqai ke'en jarliq bolba
281. ögödei-qahan ügülerün ečige-yü'en yeke oron-tur sa'uju qahan ečige-yin qoyina üyiledüksen minu jaqud-un irgen-tür ayalaju jaqut irgen muqutqaba
bi nökö'e üyile minu elčin bidan-u ja'ura öterlen ha'ulqui basa kerek jarag-iyan jö'e'ülgüi-e jamut talbi'ulba
basa nökö'e üyile usu ügei qajar-a qudu'ut eri'üljü qarqa'ulju ulus irgen usun ebesün-e gürge'ülba
basa jük jük balaqad-un irgen-tür alginčin tammačin talbiju ulus irgen-ü köl köser-e qar qajar-a talbi'ulju a'ulba
bi qahan ečige-yü'en qoyina dörben üyiles nemeba je basa qahan ečige-de'en yeke oro ba
sa'uldaju olon ulus-iyan de'ere minu ačiju ottaju bö'et bor darasun-a ilaqdaqu minu buru'u bolba
niken buru'u minu ene bolba je nökö'e buru'u yosu ügei eme gü'ün-ü üge-tür oroju otčigin-abaqa-yin ulus-un ökit abčira'ulqu alji'as bolba je ulus-un ejen qahan bö'etele yosu ügei alji'as üyile-tür dölesgegü minu niken buru'u ene bolba je basa doqolqu-yi kegesülegü niken buru'u ker buru'u ke'esü qan ečige-yin minu tus-u'an emüne ölümlegü doqolqu-yi kegesülegü buru'u alji'as edö'e minu emüne ken teyin ölümlejü ökgü qahan ečige-yin minu  bürin-ü emüne dörö kičiyegü gü'ün-i ülü uqan öyisüledüksen-iyen ö'er-iyen buru'usiyeba
bi basa tenggeri qajar-ača jaya'atu töröksen görö'esün-i aqa de'ü jük odu'uji ke'en qaramlaju quru'a yo'urqa nödü'üljü jetgüjü aqu bolun aqa de'ü-deče čimaliqai üge sonosba
bi buru'u gü bolba
qahan ečige-yü'en qoyina dörben üyiles nemeba je bi
dörben üyiles buru'u bolju'ui je ke'eba
282. yeke qurilta quriju quluqana jil quran sara-da kelüren-ü köde'e-aral-un dolo'an-boldaq-a silginček qoyar ja'ura ordos bawuju büküi-tür bičijü dawusba.